[人性] [感情事]我不會講你知，其實是第幾次: 小學雞
唔知你記唔記得第一次發綺夢係幾時？
唔知點解我記得好清楚。
個年小六，毛都未生齊。可能睇得電視太多，
我第一次覺得自己中意左人。
個女仔就係坐係我後面。個時唔識番分靚同唔靚，
淨係覺得佢好順眼，見到佢就好開心。
但正如其他小學雞一樣，咁細個邊到識表達丫。
為左引佢注意，個陣番學成日都蝦果個女仔，
得閒就扯下佢頭髮，得閒又偷下佢既文具。
換番黎既當然係 “你好煩呀。唔好整啦。”
俾人鬧但又好鬼開心好鬼興奮，諗番起都覺得自己低能。
有一晚，我居然夢見佢唔著衫勾引我，嚇到我一額汗就醒左。
鬼咩，平時發夢唔係哥斯拉比卡超就係阿古獸，緊係驚啦。
但未經人事既我又覺得好鬼得意，竟然心思思想發多次同一個夢。
之後番學，我就更加想引起佢注意。
成日撩佢講野，又係佢面前做埋D低能野。
例如我有一次，我見到佢同另外個男同學傾緊計，
我就行埋去一野除左個男仔條褲落黎。
“呀!!!” 個女仔就大聲尖叫，我就係側邊笑到停唔到。
如是者，小六好快就到尾聲，個時都仲係會寫紀念冊，
我當然就冇放過呢個機會俾個女仔寫啦。
“萬里長城長又長，你我友誼比它長。”
“My pen is blue, my friend is you.”
“頭可破 血可流 靚女不可不追求。”
真係令人懷念。
到後尾放榜（我個年代仲係要考學能測驗），
我竟然同個女仔考到同一間學校，我就對中學生活有無限憧憬。