一個月嘅救贖期限: Day1-乞討
5月19
8:04am.學校個鐘不嬲都咁準。
我班房係二樓。一出去走廊轉角就係locker，一打開書包拎番叠寫好曬日數嘅memo紙出黎，貼入去自己嗰個已經佈滿銹跡兼且鎖都懶得上嘅locker，貼得有咁隱蔽得咁隱蔽。
.
8:35am.又到咗毫無意義嘅週會時間。
今日我哋班要負責提早落去禮堂搬櫈set場。係呀，每次唔同班都要輪流做呢個義務。
的確，啲櫈同地板磨擦產生嗰啲滋滋聲真係好難聽..咁都要搬㗎。
靖瑤企左埋一邊，去咗搵慧雲傾計，一路手指指咁指住我哋呢大班人竊笑。
哈，就咁望佢個樣，
唔知重以為佢喺度睇緊動物園表演咁。
.
今日個週會主題係團契分享。
我坐喺慧雲隔離，口快快咁就問咗佢一句:「你唔係團契啲人嚟㗎咩，做咩唔上台分享？」
「我好耐冇返團契啦..」佢好冷靜咁講，
同時可以睇得出佢好努力咁擠出一個笑容。
「對唔住..冇心...」我後知後覺咁道歉。
差啲唔記得，佢同之凌已經唔再係朋友，佢哋兩個都係基督徒都會番團契。所以，為左避免尷尬，
佢寧願以後都唔返。
或者，大家傾偈有時都會有意無意咁同佢提起之凌，
但係，佢依然係一貫咁扮得好冇乜所謂。
或者，掉翻轉諗，呢個先係佢嘅優點。
.
10:40am
「呼...」坐我斜角嘅謙仔抖左一大啖氣。
咪以為過左好耐，呢家先小息咋。
我已經攰到唔想走出班房，唯有執下抬寫下功課咁扮有野做。
一望過去，
「喂..喂！」兆風想嗌停慧雲。
佢係慧雲嘅男朋友。
慧雲冇理佢，一支箭標左入toilet。
就算唔知咩事都好，我敢肯定，
佢一定唔係純粹係想去廁所。
急屎都未見過佢行得咁快。
其實我同佢唔算太熟，只係坐喺我前面咁大把。所以我決定搵另一個女同學入去睇下佢。
不出我所料，冇估到嘅係..出咗嚟都仲係淚流披面。
襯打咗上堂鐘聲又未有老師黎到，我就拍一拍佢膊頭問咗佢做咩事點解咁。
佢話...
其實只係兆風一時燥底fing左一fing開佢隻手。
或者佢都會預咗我會有不屑嘅態度同埋覺得佢on9。
但係我冇。
因為我知道，佢之所以為咗男朋友一個小動作就咁大反應，
係因為，佢除咗佢條仔，
真係冇任何人可以留係佢身邊，呢點佢心中有數。
唔難理解，如果頭先fing開嗰一下動作真係代表分手嘅話，佢就真係一無所有。
佢只係一個有日番學，
無啦啦之凌就冇再理過佢嘅女仔。
我相信，
佢唔會再想無啦啦有日番學，
連男朋友都冇埋。
.
1530pm
放學啦..終於。
今日好似仲未有啲咩人同事發生喺我身上動搖到我嘅期限，不過唔緊要，第一日咋嘛。
未完...
差啲唔記得今日放學hall有talent show 睇。
我間硬拉埋同班嘅子淇一齊睇，但佢亦都講明佢有事要早走，唔緊要啦，起碼兩個入去冇咁樣衰。
.
四點先開始有得睇表演，一路等等等...
佢無啦啦捉住我隻手，自言自語:「上年再上年睇sing con嗰陣，仲有隻手畀我拖住架..」隔左咁耐，佢嘅性格仲係冇乜點變，兩年前都攞返出嚟講。
我都好慨嘆咁望實佢講咗句:
「其實...今日呢個係talent show 唔係sing con... 」
佢睥左我一眼然後冇聲出。
.
「依家有請4B班嘅...」
不經不覺，已經睇到第六組參賽者。
人地話，
音樂可以打動人心。
我信㗎，我真係信㗎。
.
三個女仔係台上面，冇腳震冇口窒，未唱已經感受到嗰種無形嘅默契同友誼。
佢哋係以處境劇嘅框架形式間斷咁唱唔同歌，情節係咁，
.
中間個女仔，鍾意左個男神。
一左一右嘅好朋友，叫佢表白。
個女仔失敗左。
.
睇到呢刻，都覺得似曾相識。
不過，去到個女仔一開口唱歌，我唔敢再代入自己入去。
.
「突然好想你 突然鋒利的回憶..」個女仔開始藉呢首歌剖白。
.
我嘅回憶呢？
唔係俾人拒絕嗰一刻，
唔係後悔做左啲乜。
.
轉眼間，左右兩個朋友搭住佢膊頭，話仲有佢地係身邊，唱起count on me。
「I can count on you like 4, 3, 2
you'll be there..」
我笑而不語。
432...432...432. ？
要數幾多次先會等到有人黎。
等到依家啦。
.
我嘅回憶，
係得番自己，去度過嗰段時間。
係係我望下左右嘅時候，冇人係身邊同我講陪我去面對。
我可以怨啲咩，
:「cause that's what friends are supposed to do oh yeah...」
.
等緊賽果嗰陣有個break。
前面有好幾堆小圈子打成一片
有攬，有傾，有笑。
當我睇到有啲眼訓，
伸一伸懶腰，挨一挨向後，
唔洗望後面，
剩低嘅只係一班早走嘅人留落黎嘅空櫈。
唔緊要。
.
「頭先嗰組咁柒都有獎好唔公平..」走嘅人都一窩蜂咁去，同時高談闊論咁討論賽果。
落樓梯嘅時候，
另一班嘅朋友見到我，
問:「典解自己一個？好毒啊。」
我？
典解？
「我都唔知。」嘴角微微咁勾起答道，或者好似咁會自然啲。
.
就嚟返到屋企嘅時候，經過隧道，
有個小妹妹，見到個乞衣伯伯，
好奇咁踎低問佢:「典解你自己一個嘅？點解會冇錢嘅？典解..」
當然，童言無忌，喺未等到答覆之際，佢媽媽已經好尷尬咁拉走咗小妹妹。
個乞衣望住我好似睇住佢放空咗好耐，相視而笑。
我仲係好想知，佢係唔想答唔識答定點。
.
佢厚面皮行乞都起碼知自己想要咩，
我...
連我乞討緊咩都唔知。