[情慾小說] 上左家姐的中學美女同學: 第十三章
飯後, 我送住美欣行去搭車, 「好嘞強仔, 我就響呢度搭車得嘞, 係呢強仔…., 原本我聽到妳家姐講你近況嘅時候, 我個心就真係有啲唔係咁舒服, 但今晚見到你咁, 我而家又真係已經放心咗好多嘞。」
我笑住同佢講, 「妳使同我擔心, 不如妳就疊埋心水, 等遲啲就做個幸福少奶奶咁咪仲好。」
美欣笑住咁打咗我手臂一拳, 「咁好啦, 嗱, 到時我要你同 Catherine 都要嚟參加我個婚宴架。」
我笑住點咗一吓頭, 跟住就同美欣講完拜拜之後, 然後我就自己行去搭車番屋企。
美欣繼續自己等住車, 但突然, 「呀死嘞, 漏咗 Catherine 份嘢唔記得交比強仔添。」
美欣即時向住我頭先走嘅方向快步行去, 美欣正不斷地響街度搜尋住我,一便正想攞個電話出嚟打比我,但突然…….. 路邊一間銀行門口嘅樓梯之處,美欣正發現一個熟悉身影正呆呆咁坐住響度。
美欣見到我正揸住罐啤酒, 一個人正眼濕濕咁坐響梯級上呆望住前方, 美欣慢慢咁行到埋嚟踎響我面前。 「強仔….」
美欣同我兩個都索住個鼻, 「強仔…你唔好咁啦…, 你咁樣…我個心…反而仲更加會唔安樂架….」
我用手臂抺咗一吓眼淚嚟講, 「美欣姐…我….我無嘢呀, 我只不過係…響度…坐一陣…之嗎。」
我透咗啖大氣, 跟住好快我就企咗起身, 「走嘞美欣姐, 我真係無事架, 拜拜….」 講完, 我就頭都唔回好快咁就跑咗落去地鐵站內。
街頭上, 就只剩番美欣一個人正呆望住地鐵站口嘅方向。
![](https://www.userver.net/Uploads/20201106/5fa50f1bb2a0f.jpg)
已經無見美欣一排, 但心底入面依然對佢仲係牽腸掛肚住, 每次諗起佢將要嫁作人婦, 心內嘅刺痛感覺又再令我經常都會徹夜難眠。
呢一日, 家姐收工之後番到屋企無耐, 見佢接咗個電話之後, 跟住即時走去著番對鞋好緊張咁同我講, 「強仔, 美欣佢出咗事, 我而家要同班姊妹即刻出去睇吓佢呀。」
我聽到咁, 反應比家姐仲更為緊張, 我響梳化度彈咗起身咁講, 「家姐, 美欣姐佢到底發生啲咗咩事呀?」
「唉, 總知就唔係好嘢啦, 但我都要出去了解吓先, 今晚番嚟我先再將成件事講番比你聽啦。」
「唔好家姐, 我都要跟埋出去睇吓佢到底發生咗啲咩事。」
家姐有啲奇怪我咁緊張, 「哦…., 咁…你就同埋我一齊出去啦。」
沿途上, 家姐同我講, 話啲姊妹通知佢, 美欣個未婚夫要同佢取消婚事, 而且仲好似話係佢啲未來夫家嫌佢腳頭唔好, 但至於詳細情況就要到咗一陣先至知道。
我聽到美欣似乎結唔成婚, 呢個消息對我嚟講其實都應該算係一個喜訊嚟, 但事實剛好相反, 我個心似乎仲更加唔開心咁, 因為, 我居然可以感受到美欣響呢一刻嘅果種難受, 傷心同刺痛住嘅心情, 我呆呆咁望住車窗出面。