《我家姐竟然做咗我班主任？？？》: 【28】

當佢跑咗大半個圈，我見到漫澄跑得上氣不接下氣，好辛苦咁，而且臉泛紅暈，雖然睇得唔係好清楚，但遠望都依稀睇到佢臉紅紅咁。

漫澄佢經過我喱邊嘅時候，我見到，佢望咗我一眼。我同漫澄係對望咗一眼，從眼神裡，我睇得出佢係無諗住放棄。

可能你會覺得，有無咁誇張呀？一個眼神就知？

但係一個堅定嘅眼神，足以證明喱一切。即使佢落後人哋大半個操場，都仲諗住努力跑埋佢。

足以值得我打從心底去佩服佢，加上佢係做緊自己唔善長嘅嘢。





一個平時讀書多，運動神經接近0嘅女仔，肯嘗試去參加自己唔叻嘅嘢，係要有足夠勇氣。

我覺得至少佢係知道後果——就係一定唔會贏。

但都會繼續跑落去，你試下俾著家姐，可能已經放棄咗啦，以佢嗰種懶人嘅性格。

我差啲想企起身拍手叫好架啦，可惜呀，一個柒字阻止咗我咁做。

我發覺原來真心鐘意一個女仔，眼裡就真係容不下其他女仔。





一唔一齊到就係其次啦，至少自己行動過，唔後悔。

中學嘅愛情就係咁純真，無其他雜質。

原本係好簡單嘅感覺，唔知點解，越大嘅時候，卻變得越複雜。

當第一個人衝線嘅時候，漫澄仲係操場嘅對面，依家應該係全校嘅人睇緊佢一個人跑。

但佢都堅持落嚟，跑到終點。雖然係老土，但我覺得值得人俾個掌聲佢。





衝過終點後，佢企係隔離稍稍休息下，回順條氣，然後一步一步瞧住我個方向行過嚟。

我唔敢肯定，唔敢相信。佢每行一步，我怕醜值就上升一份，我唔敢同佢對視。

我一直就係咁迴避佢嘅視線，然後又會忍唔住咁偷望佢。

「你無事呀嘛？」一把熟悉又溫柔嘅聲音震動我全身嘅神經。

「無事呀！」

男仔特別容易係鐘意嘅女仔面前逞強，我都不例外。

小小嘢就嗌生嗌死嗰啲根本就唔係男人！