《我家姐竟然做咗我班主任？？？》: 【25】

到第一次召集嘅時候，唔知係咪冤家路窄，我見到同我跑同一輪嘅人入面，有Daivd。

佢臉上嘅傷痕仲未退，同我一樣，身體上嘅我就唔知啦，可能我打到佢內出血啦。

見返佢，心中嘅戰意被燃燒起嚟，好旺盛。

本來覺得初賽姐，求其跑下都應該入到決賽嘅，決賽再認真都未遲。

我平時都有做開運動，之前有參加短跑，都唔差嘅，雖然唔勁，但都唔算屎。





我同Daivd對望咗一眼，佢都留意到我嘅存在，眼神嘅敵意一點都無少。

而且嘴角牽起一個得意洋洋嘅笑容。

我知呀，佢體育方面好勁，但咁又點姐？

身為一個男仔，就算你明知打唔過人，贏唔到人，都唔好輸咗個氣勢呀。

就算輸咗，都要留返啲男人嘅霸氣係度！！！





落到場，我眼入面只有些David，我哋都用咗好多眼神嘅交流，都係屌下大家老母之類嘅。

與此同時，令我感到意外嘅係，我竟然係選手區度見到漫澄。

簡直係大出我意料之外，佢一個弱質女流，點睇都唔似識運動呀？

就算運動，都似係會游水多，就算係游水，都淨係識蛙式。

個種驚訝就好似一個由細到大都食素嘅人，出現係一間炸雞店入面。係，佢係可以嚟，但會好奇怪囉。





仆街，就係因為咁樣望一望，搞到我分神添。

我再望返David，佢得得戚戚咁對住我笑，真係狗改不了吃屎，都係一樣咁賤，無改過。

下一組就到我哋啦，我深呼吸一下，調整一下自己心態同埋吸引，抖擻一下精神，然後眼光銳利咁望住前面，眼裡只有終點。

唔知點解，我腦海入面好似傳嚟漫澄嘅一句打氣，「加油！」

我快速咁望過去，只見漫澄同緊隔離位嘅女仔係度傾偈。

每一個上戰場嘅男人，都想自己心愛嘅女人係旁邊為自己打氣。

我都想自己女神幫我加油，但可惜一切都只係我FF......