《我家姐竟然做咗我班主任？？？》: 【11】

「我唔知.....我只係覺得依家好亂咋。」其實我覺得兩邊都有錯，但David錯得更加離譜！仲要搞到我家姐咁。

「講真，你有無後悔應承David？」

「有呀......如果唔係都唔會嚟搵你啦。」佢單手嗚住塊面。

此刻，我覺得家姐好可憐，為咗愛情，無曬尊嚴，更加無咗為身老師嘅自覺。

心中嗰一點點敬佩，好似慢慢消失咁。





「如果今日你唔係我家姐，只係我班主任，我諗我會食埋一份花生，但正正因為你係我家姐，我唔想你一路錯落去。」

「我希望喱番說話你聽得入耳啦。」

我講到口乾，去隔離汽水機度買支嘢飲，都幫家姐買埋。

見到佢臉上面嘅妝容都化曬咁，就覺得何必搞成咁？

「飲啲嘢啦，補充下啱啱流失嘅水份。」





「依家返轉頭都仲嚟得切，唔係個個都有機會返轉頭。」

家姐佢抬高頭望住我，「細佬，你會唔會覺得家姐好污糟呀？」

「估唔到要細佬教返我轉頭.......我做家姐真係做到好失敗。」

我會心一笑，見到咁樣，相信家姐佢已經知道應該點做，大把人係家姐嗰個年紀都會做錯嘢，但起碼要知道自己做得唔啱。

「唔會呀。」我笑道，「你仲記唔記得細細個我成日追啲動畫嘅？咩爆旋陀螺呀之類嘅？」





家姐佢拭乾眼淚，「記得呀，成日煩住我要我幫你錄，等你返嚟有得睇。」

「但我次次返嚟都有得睇，雖然你把口成日話喱樣話嗰樣，但係我知你都錫住我嘅。」

「幾耐之前嘅事仲拎嚟講！」好兇狠，但家姐佢係笑住嚟講。

笑返埋咪幾好，靚女返啦。我唔想話俾佢知David係玩鳩佢，我唔想家姐佢又再傷心多一次。

但我一定唔會放過David條撚樣！！！！！

之後我帶住滿腔嘅怒火返班房，但所有人都睇唔出我頭上面嘅火。

點知一入到班房，爛口輝就叫住我，「喂英雄！過嚟呀，有好消息同你講。」

見到佢我又諗返起自己當初點解咁on9會應承佢玩自己家姐，不過就算我唔應承，佢哋都會照做。





「咩事呀？！」我唔好老脾咁講，心中道氣仲係扯住扯住咁。

「做咩咁好火呀？啱啱同漫澄嘈完嚟呀？」佢自以講到好好笑，然後係咁係度笑，唔知笑乜柒。

「我同邊個嘈關你叉事呀？」我睥住佢。

其他男仔見到已經變曬相，唯獨眼前嘅爛口輝仲笑笑口，繼續講，「老實講呀，漫澄係得個樣靚......但性格好鬼騎呢架，又睇埋啲唔知咩書，又唔講嘢咁制，但無計啦，全班最靚就係佢，其他都......NoNo。」

「但依家唔同啦！自從嚟咗Miss Tai，日日上堂都扯曬旗咁，幾撚正呀！」

「男人呀，都係鐘意性感火辣多過樣靚！唉...搞到我都好想執返Miss Tai一執！哈哈。」

又多一條人渣。





「哦～係呀？」我瞬間變臉，扮曬無知，然後等待機會，「咁你叫我做咩？」

「呀係喎，唔記得咗添，嚟嚟嚟，又要講多次啦！」爛口輝好熱情咁拉住我入嚟講。

「你知唔知呢......」佢降低聲線，但我都估到咩事，「David成功溝到Miss Tai啦！」

「係呀？」預料之內。

「下？乜你反應咁冷淡架？以為你會好驚訝架嘛......」爛口輝失望地道。