《揸住水槍打喪屍》: 結局:ominous f[A]ntasy

雙雙帶住殺意的眼神和閃動著寒光的利刃,化成遮掩天窗的巨大黑影。

「我既意義..係要為香港帶來災難,你既意義,就係要殺我.....我地都幾相似呀...咳咳咳!!」我咳出血絲。

紅姑娘追上來拉住雙雙:「等陣呀,雙雙,佢講既會唔會係真?」

視力開始回復了。

「....我唔理,我要復仇..!」





「但..但係佢如果真係有既話.....」

「紅姑娘,你到底係幫邊個?!」雙雙一對妙目通紅,揮刀指向紅姑娘,「如果你係幫佢既,我就殺埋你!!」

看到她這樣子,我真的很痛心。

但使她變成這樣的,也是我。

多可笑。





「唔係..只係我地殺左佢之後要點做?我地..我地下一步要點做?」

雙雙沉默。

痛楚也消散得差不多了。

反擊的第一瞬間,我突然從地上躍起!雙雙料不到我還有行動能力,連忙拔刀向我砍來!

「呀!!」慘叫的是紅姑娘。





被我拉過來當人肉盾牌的她被雙雙重重砍了一刀,血也噴到雙雙面上,機不可失我連忙向她背上補上一腳使她的身軀撞向雙雙。雙雙連忙接住紅姑娘,但那一刀可是雙雙要取我性命的一刀,本來就體格較弱的紅姑娘正面接了這刀後連站也站不住,直接壓向雙雙。

「嘿,雙雙,你盲目既仇恨最後就做成咁既結果。」

「卑鄙!!紅姑娘救過你,你咁對佢?!」

「留意返,個一刀係你斬落黎。」

「點解..點解...偏偏係你..」雙雙情緒開始失控,大概是因為誤傷了紅姑娘的自責成為她心頭的最後一根稻草吧。

「你唔好再追殺我,雙雙,紅姑娘如果冇人幫佢止血,好快就會死..」

「賤人!賤人!賤人!賤人!!」

「雙雙..我真係好愛你...」





「收聲呀!!你..你唔好走呀你!!」

只有近戰手段,還要照顧紅姑娘的雙雙沒法阻止我走到大佬坤旁執起那兩樣東西:「雙雙,好好幫我照顧紅姑娘,應承我,OK?」

「我一定會,然後再向你復仇....你一定要殺係我刀下...」

我淡然一笑:「你地之後點?有咩打算?」

「關你撚事呀!」她撕碎自己的衣服掩住紅姑娘的傷口。

「放心啦,我會去搵方法阻止呢一切,為左你。」

雙雙沒有說話。





我站起來,藍塔外的美景映入眼底,這城市以往在我眼中是醜陋無比的,我恨不得它可以毀滅,然後才能重生。

毀滅,我做到了。

重生,從現在開始。

「雙雙,我地有緣再見。」

接著,我縱身從藍塔跳下。

「陳一水!!」

「呼呼呼...!!!」直昇機在我駕駛下從下一層的直昇機坪飛起,捲起的強風使雙雙只能往後退。

藍塔很快在直昇機窗外變成地圖上的一個小藍點。





--------------

口供室中,警察聽畢後也沉默了下來。

「架直昇機,係大佬坤黎個時個架?」

我白眼一反:「唔係佢係邊個?你弱智架?」

「你..!!」

「冷靜...咁之前你講既咩西菜洋街戰線呀,停空屍個D呀,又係咩事?」

「都未講到。我地相遇係我飛離藍塔之後既事。繼續講?都講左10幾個鐘咁濟...」





「我再提醒多你一次呀陳一水先生。」那個警察的視線由記錄口供的板子上移開,「你面臨既起訴係反人類罪行,之前所有被判呢個罪既人一係就死刑,或者係80年以上既監禁。知道成件事既來龍去脈對我地黎講好重要。」

「咁再講囉。」

「不過..你都講左好耐啦,俾時間你休息下。聽朝我地會再叫你黎問野,今晚我地為你準備左休息既地方。」

一個女警很準時地開門,把警帽壓到甚低的她我連她的面貌也看不見。

「帶佢去臭格。」

「Yes Sir.」她把手扣套到我手上,「呢邊。」

一走出口供房的門,我笑笑道:「雙雙..好耐冇見你..」

她停門,背影似乎在抖動著。

我繼續說:「全港性狂化,喪屍戰爭....你同紅姑娘都冇事就好。」

「我地都冇事,好在你都冇事...」雙雙轉身,拔出刀子,「依加冇晒喪屍,你記唔記得你應承過我D咩?」

我點點頭:「的確..我記得。」

「你俾我解除呢堆喪屍,我親自黎俾你殺」

「即使你做過咩,救過幾多人,你都係我不共載天既仇人。」

「我知道。我接受。」

我不想閉上眼,只求能多看她幾眼。

幾眼也好,幾秒也好。

雙雙面上不帶半點感情,舉刀指天:「為左所有喪屍潮中死既人,復....復仇!!」

銀光從天砍下。

少女的臉上,綻放最可愛的笑容。



完