(災難/科幻) MASS MUTATION X 我係一個理科仔 [不定期更新]: #29 真相

我推開門，衝落樓梯。

「老闆娘……」我邊跑邊問「我想問，佢地幾個嚟咗， 點解無啦啦會斷咗聯絡?你地實有舊飛機跟住佢地。」

「佢地三個嘅任務同你差唔多，不過我地只係要求佢地三個去個舊粉紅色donut 圈附近睇下，幫手拎下樣本咁樣。」老闆娘嘅聲音係耳機響起。

「Donut? 你講個舊粉紅色雲?」我問。

「嗯，就係個度！ 我地呢邊嘅科學家都叫佢做Donut，因為形狀好似士多啤梨Donut。」老闆娘輕鬆咁講。





「嗯。」我繼續沿樓梯向下跑，用咗半分鐘左右，已經落到10樓。

飛奔起上嚟，感覺身心舒暢，體能好咗唔少。

「Geoff, 你可唔可以跑慢啲？」老闆娘問。

「吓？」我停低回頭， 望見黑色無人機慢慢由遠處飛近我身邊。

「我地有啲難跟住你係咁轉彎，再講，如果一陣有怪物撲出嚟，我地趕唔上就慘。」





「哦，而家又會保護我安全咁多謝……」

「暫時我地係合作關係吧，你唔記得咗? 你就乖乖地接受。」老闆娘又講。

「合作？你太睇得起我，我覺得同幫你打工無分別。呀…唔係，打工都有人工，我而家係義工。」我自嘲。

我聽到老闆娘開懷咁大笑咗陣。

「哈哈! 有機會嘅話，我私底下再獎勵你。」老闆娘打趣道。





一邊同老闆娘講一啲無關痛癢嘅說話，一邊慢慢行樓梯。唔知點解 ，同老闆娘傾計呢個過程，俾我一種好親切嘅感覺。
不過我同老闆娘相識嘅日子並唔長，點解會有一種咁嘅感覺？我覺得好迷茫。

我知道佢係造成一切死傷嘅原凶，不過我直覺話我知，老闆娘唔係個種鍾意見到人受傷害嘅性格。

我可唔可以相信佢?

唔係，


我係無得揀。 係呢個地方，我基本上唔可以靠自己生存到一個星期。
--------------------------------------------------------------------------

我唔經唔覺就行到樓梯盡頭。





我伸手按下木門控制開關嘅鐵棒，點知木門郁都唔郁，顯然係上咗鎖。

「shit…」我喃喃自語。

我隨手向門用力一推，本來只求發洩，點知砰一聲，門鎖一下子就懷掉,門就自自然咁打開。

我一呆，望一望雙手。

「老闆娘？我有啲野想問，你老實答我……」

「咦?嗯…好呀，你問喇。」老闆娘錯愕。

「你地……係唔係對我身體做咗……手腳?」我講。

耳機另一邊一片沈默，我行入大廈大堂，尋找通往街道嘅出口。





「你……你點解咁問?」老闆娘終於出聲。

「身體係我自己，好難唔發覺。」

「咁又係……」

「就好似頭先咁，我明明就無用盡力，門鎖就俾我撞爛。仲有，我跑起上嚟，根本就唔係我以前個回事。體能好咗咁多，應該係你地搞鬼喇。我唔記得我有做過gym……我甚至連食嘅野都無咩營養，點會反而身體好咗?你老實同我講，我同你分開之後，你地做咗咩手腳。」雖然力氣好咗，但有諗真啲，會有副作用都未定。

「嗯…你記唔記得好耐之前，你仲係coffee shop嘅時候，暈咗幾日?」老闆娘問，聲音有啲猶豫。

「嗯，記得。」當時我確係昏迷咗幾日，而Mindy 係我身邊照顧住我。

「你昏迷係因為俾我打咗藥，就係你係條街度，俾怪物差啲咬死個陣，我打死怪物之餘，更加打咗藥俾你。」





我估昏迷不醒就係因為副作用作怪吧。

「所以呢？我就暈咗，而你咁關心我，就係想近距離睇下隻藥有咩作用?」

「你要咁講，我唔會否認。」老闆娘講「你個隻藥，係隻新藥。你亦都係第一個人試……」

「咁我真係榮幸……」我吐槽。

「你聽埋我講，你係第一個人試，而死唔去嘅第一個人。」老闆娘口氣平淡咁講。

「吓!即係咩? 隻藥有毒?」

「我要澄清，幾乎所有藥都有毒性……」

「係係……」





「俾你試呢種藥，自然有我嘅理由。你而家好地地死唔去，係咪? 再講，呢種藥係老鼠身上試，結果反映，多數生存到嘅實驗品，肌肉力量會加強，咁唔係幾好咩?」老闆娘講。

我唉一口氣「最少毒唔死我，算我好彩……」我打開老闆娘俾我嘅背包，入面有兩把短刀，一把同之前一樣嘅手槍，幾個彈匣，一枝電筒，幾樽水，仲有幾包疑似食物嘅野，仲一件黑色外套。

「又準備得幾周到……」我輕輕道，同時將兩把刀同手槍放係腰間皮帶之上，再將黑色外套穿上「Mindy 佢地最後出現嘅地點係?」我問。

「袋前面個一格，有一副眼鏡，你拎出嚟。」

袋前面有一個暗格，唔係老闆娘講，真係唔容易發現。我打開暗格，入面有個膠盒。我打開膠盒，入面有一副「柯南」款式嘅眼鏡，黑身金屬鏡框，大大塊透明鏡面。

「戴眼鏡呀。」老闆娘講。

我戴上眼鏡，鏡片由本身透明，突然變出一個電腦介面。電腦畫面開出一幅地圖。

我唔理解鏡片同眼球咁近，影像都會咁清晰。

「你而家見到嘅係我地素描出嚟，你附近嘅地形……」

地圖係一個3D素描，街道、大廈等等細緻嘅圖像出現係眼前，而地圖中心有一個留白嘅圓形。

「中間空白嘅部份就係個座玻璃大廈嘅範圍，個度粒子濃度太高，干擾我地嘅機械運作，所以飛機入唔到去。干擾嘅原理我地都唔係好清楚，飛機一飛入去圈入面嘅範圍，電磁波就無辦法傳遞。」老闆娘解釋。

地圖上面有一個紅色圓圈閃下閃下，圈圈離中心空白部分好近。

「紅色圈圈就係阿明佢地失去聯絡之前嘅位置，你就去個度搵下先。」老闆娘講。

我和應一聲，然後利用地圖辨明方向。確定要點行之後，我就直接推門離開大廈。

老闆娘嘅眼鏡非常高科技，有埋實時定位。同Google Map導航功能一樣，我唔洗擔心會行錯路。更加厲害嘅係，無人機係上空不斷素描附近有無怪物或者熱能反應。有的話，地圖會以一個綠色點標示。

我盡可能避開地圖上嘅綠點，雖然不時要繞道而行，行多唔少路，但總比要同怪物打鬥嚟得好。

我係荒涼嘅城市街道中穿梭，街上面嘅舖頭全部都空空如也, 景象似曾相識。舖頭嘅招牌大多係寫中文同英文仲有日文，老闆娘話呢度係AW52嘅香港，我就只好相信。但係總係覺得，街道上面嘅面貌，唔似係我熟悉嘅香港。

點解我會咁樣諗?一來街道嘅設計同面貌有啲唔同。二來呢度啲舖頭同我熟悉嘅香港有啲唔同，就拎便利店做例子，我跑咗一段時候，便利店只有Lawson同埋7-11。 就係無circle-K。何況明明係我嘅時空入面，香港根本無Lawson。

不過諗諗下，或者呢個時空嘅香港，有住唔一樣嘅命運。

突然感覺腳上踩住啲野，我鬆開腳，發現係疊報紙。

我拎起一睇，封面寫住「香城日報」，頭版有一行令我在意嘅標題:「港日政府建議下年度增加教育開支」

香港最後無回歸?

港日政府?

即係二戰係日本打贏咗，呢度嘅香港根本係日本人嘅地方?

「Caution!Heat signature incoming.」耳機傳嚟電腦嘅聲音。

眼鏡上面嘅地圖放大，一個綠點正在向我所在嘅位置移動。

我立即向相反方法移動，係街角轉彎，試圖同綠點拉開距離「老闆娘，點解你唔幫我開路? 你部飛機唔係有槍架咩?」我一邊跑一邊問。

「Geoff, 我地射得幾多隻? 你睇下上面有幾咁多熱能反應，個個反應都送一粒子彈過去要洗幾多錢?」老闆娘吐槽。

「唉，你唔搞搞陣咪唔洗用咁多錢囉......」我埋怨。

老闆娘輕輕一笑「我估都係，但係咁未無機會識到.......Geoff，你跑快少少，你轉角真係有一隻野，係你十點鐘方向。」

我望一望地圖，有一個綠點飛快咁樣移動，雖然距離雖然唔係好近，但我亦感覺到有一種隱隱嘅不安感，都係早走早著為上。

我抽出手槍， 先睇定行邊條路線最好。地圖顯示東北方向無咩熱感後應，我就決定行靠東北嘅路線，跑起嚟。

我盡可能放輕腳步，因為怪物聽覺敏銳，佢地一聽到異樣，勢必追趕起上嚟。

雖然跑咗唔少冤枉路，但總算係地圖上面見到我離紅色圓圈愈來愈近。

當我跑到一間便利店前面，見到周邊都無接近嘅熱能反應。突然心念一動，就停低對老闆娘講「老闆娘，可唔可以入便利店睇下?」

我無等老闆娘回應，就入咗Lawson 便利商店。

「Geoff,你真係八卦。」老闆娘嘴上面雖然咁講，但係毫無責怪嘅感覺。

我首先行去雜誌架，上面完整無缺嘅書已經唔多。我拎起一本雜誌，上面又係中、英、日字。封面有一個打扮時尚嘅日本女性，中文標題係「宮野志保來港演出!」，係娛樂雜誌吧。

我想搵下有無時事資料，好可惜搵唔到。

畢竟呢度理論上已經荒廢咗三年，四周圍非常凌亂。我再四周圍咁睇，都無咩發現。

之後，我再往店內其他地方八卦，食品日用品已經唔多，多數係三年前俾人搶走晒。

「Geoff，你想搵咩呀?報紙?」老闆娘透過耳機問。

「嗯，報紙係想搵，不過都唔算我最想搵嘅野。呀......係呢，點解呢度咁多野用日文寫嘅? 」我問。

「哈哈! 好奇心旺盛嘅後生仔! 呢個時空嘅香港係日本殖民地，所以法定文字會有日文......不過你唔係趕時間救人咩? 你仲對呢度嘅歷史有興趣?」

我暗笑我嘅推理竟然得以印證。

雖然好想問下日本殖民之下嘅香港係點，但係我都係忍住先。

「嗯，我係趕。但係你有無留意到，Mindy 佢地唔見嘅地方.......你地mark 個紅色圈，附近超多綠色點?」我說。

「嗯，係呀，無錯。」

「唉.....，我係恨不得即刻飛過去，但係要入去唔係一味避就可以.......所以，我要一啲掩護......」我無奈咁講，因為我並無殺入去紅色圈嘅自信。

「不過你而家入便利店都幫唔到你.......呀!唔通你係想....?」老闆娘已經估到我想點。

「嗯，我想睇下有無啲咩可以燒到爆炸啦。本來想搵下有無火機，等我放個火，好運嘅話，搵到啲會爆炸嘅野，我就襯啲怪物分心嘅時候，衝去紅圈入面。」我解釋，呢條橋我都只係想試下，就算引唔到怪物嚟，亦都無壞。

老闆娘唉一口氣「唉......你早講呀嘛，如果係突然之間亂咁放火，整親嘅話......」

老闆娘語氣懇切，我不禁打一個冷震，佢算係關心緊我?

不過我係佢嘅實驗品，有意外的話，對佢嚟講會好麻煩吧。

我遲咗幾秒先回應「咁你可以幫我分散班怪物注意力?有無咩辦法?做唔做到?」

耳機另一邊沈寂一輪，過了半晌，老闆娘先淡淡咁講「如果係咁，你可以去地圖上mark 咗黃色個一點。個度對面有間舖頭，個度專係賣香油、壓縮氣體呢類易燃物。如果到時我地會用飛機射下個啲地方.......」

我淡淡一笑「早講呀嘛，而家就去。」

由便利店去老闆娘所指示嘅地方並唔難，路程亦唔長。我花咗大約十五分鐘已經到了。
---------------------------

目的地係一間住宅大廈嘅大門外，但見唔到老師娘所講嘅店舖。
「其實為咩我都要跟嚟? 明明架飛機可以自己飛過嚟。」我問。

「你真係好多問題問......」老闆娘恥笑「我都唔想架，只係我地設計咗部機同你嘅距離唔可以超過二百米，臨時要改設定太花時間。你而家企緊呢個位，我已經攞到最盡，你同我講個間舖頭啱啱好有二百米遠，要你行過嚟，唔住喇!」

「好喇，一陣爆炸估計會有幾大?」我問。

「我地都預計唔到，總之一陣一開槍，你就諗定方法去你個目的地喇。你預備好就話我知。」

我搵一架泊係附近嘅汽車做掩護，隨即就叫老闆娘行動。

飛機由我頭頂朝北面飛去，飛到離我大約二百米嘅距離，就停止向前飛。

「準備好未?」老闆娘低吟。

「嗯！Ok!」我答。

「好，咁我數三聲就會開始，3……2……」

我深呼吸一口氣……

「1!」

飛行器下方伸出槍管，一枝飛彈射入商店。 不消一秒，砰一聲巨響，商店爆出火花。

我心頭一震，呢一下巨響唔講得笑，係咁遠嘅距離，雙腳都感受到地面微微震動。

地圖上面有一大堆綠點高速朝向爆炸地點移動，我地個計劃似乎成功!

我襯呢一個空檔， 離開掩護物，朝西方狂奔。跑出一段，再向北跑。遠處不時傳出零星嘅爆炸聲，舖頭入面燃料燒得正旺，不斷引爆。

我離目的地愈來愈近，最終用咗大約十五分鐘就跑到目的地，Mindy 一行人最後同老闆娘聯絡嘅位置就係呢度。

-----------------------------

我距離「超巨型雲狀Donut」中心尚有一公里左右，粉紅色嘅閃雲形成一個巨型旋渦，巨雲中心被一座玻璃大廈開洞穿過。

呢番景象，雖然係遠處見過，但近睇感覺更加震撼。

天上嘅雲層飄落一粒粒粉紅色嘅光芒，就好似落雨一樣。一粒粒粉紅色閃光，隨風向下飄，眼前就好似有一群營火蟲一樣，一點點奇幻到似鬼火磷光一樣嘅光芒，佈滿我眼前嘅空間。

粉紅色閃光一著地就隨即消失，我不由得眼定定咁欣賞呢個咁奇幻嘅空間。

「Geoff...?」老闆娘嘅聲音夾雜住沙沙聲，明顯訊號開始唔穩定。

「係，你仲聽唔聽到?」我問。

「你……(沙) 係附近……(沙)搵下……(沙)再返嚟呢度……」

睇嚟開始要靠自己，眼鏡顯示嘅地圖只有一少部分仲有畫面,其餘大部份都係一片空白，對我作用唔大。我索性除咗眼鏡，慢慢向北行。

行左一陣，我發現飛行器無再係我頭頂上面飛。回頭一望，見到飛行器仲停留係原地。 係呢個區域，訊號被嚴重干擾嘅關係，老闆娘控制唔到部飛機，所以被迫留係原地吧。

「唉，睇嚟要靠自己喇。」我對自己講。

但係可以去邊? 地圖空白嘅地方都有可能會撞到Mindy。問題係，呢個範圍都唔細，仲要周圍都係大廈，如果佢地幾個係室內嘅話，每一幢大廈都去探索的話，可能花我三、四日時間，都未搵到佢地。

一時之間，諗唔出一個好嘅方法點樣去搵。 我只好漫無目的咁向「超巨型雲狀Donut」中心方向行，希望會係路上搵到一啲線索，等我唔洗大海撈針咁搵。
呢一
帶地區異常平靜，係靜得可怕。

係呢個寧靜嘅空間，我每行一步，腳步聲變得異常咁響。

我不停留意地下，滿心希望會有些微線索，等我唔洗咁花時間去搵。無論人行過嘅痕跡又好，甚至係血跡都好。我暗暗覺得，有線索的話，會好快就搵到大家。

點知個天就係唔鍾意我，呢一帶嘅石屎爛到七彩。我搵咗成半個鐘，結果咩發現都無。

覺得有啲氣餒，就一個人頹然而坐，深深嘆一口氣。

我望返轉頭，老闆娘隻無人機已經唔係視線範圍。 我就靜靜咁樣坐係地下，周圍咩聲音都無，只係聽到自己沈重嘅呼吸聲。
---------------------------------------------------

我休息咗一陣，見到天色一片粉紅，突然諗起當日同Mindy 係地鐵站附近影咗一幅相。

當時我地兩個咩都唔知，Mindy 只係覺得個天粉紅好靚，就捉住我自拍。

個時我地點會估到，呢一啲粉紅粒子竟然係種咁危險嘅野。

身邊嘅朋友、家人都已經唔係我身邊。就連老闆娘都聯繫唔到，呢一刻應該係我咁耐以嚟，最孤獨嘅時間。

係呢個世界，好可能得返我自己一個人。

又或者，去到最後，我只係一場實驗中嘅棄子。就算俾我見返Mindy，咁又可以點? 我地會有將來? 我地仲可以點解生活落去?

愈諗就覺得愈煩躁，我想唔去諗，只好企起身，又再次漫無目的咁向前行。

-----------------------------------------------------

我花咗半個鐘頭左右，終於俾我行到 Donut 嘅中心。大廈玻璃外牆係近睇，就好似一條直通天上嘅巨型電梯。

「唔知仲可唔可以搭電梯上頂樓?」我自言自語。

我正準備想行去大門嘅時候，突然有人係我頭頂大叫 「Stop!」

呢一嚇非同小可，畢竟我差不多有一個鐘頭無聽過人聲。

我覺得自己心臟恍惚嚇到停頓咗一下。

「Hey! 你舉高雙手!」一把雄偉嘅聲音傳嚟。

我抬起頭，望見一架無人機係我前方飄浮。

無人機同老闆娘所用嘅外型差唔多，只係顏色唔同，呢一部野外面係深藍色塗層。

「我再講多次，舉高雙手! 定係你聽唔明廣東話? 識唔識日文? 英文?」聲音由無人機播出嚟。

「如果我唔識聽廣東話，都唔會明你講咩喇......」我細細聲吐槽，並將雙手舉起，以表示無敵意。

問題嚟喇，佢地究竟係咩人? 我只可以肯定佢地唔係老闆娘個一伙人，因為老闆娘根本就無入過嚟呢一個地方。但係佢地架無人機嘅設計又差唔多咁款， 佢地究竟係咩人?

「你唔好以為我聽唔到你講野呀! 你乖乖地企係原地，你講: 點解你會出現係呢度?你係邊度嚟?你有咩目的?」男人嘅聲音打斷我思緒。

佢咁樣問我，令我更加確定佢地唔係老闆娘班人。

而佢地呢班人好可能同Mindy 接觸過，要唔要問下佢地?

「我數三聲，你再唔答我問題，我就開槍。」佢向我大叫，無人機底部亦多咗一枝槍。

我決定試下佢地，先亂講啲野先，睇下佢地咩反應，再執生。

「我路過......再講，點解你唔同我講，你地係咩人先? 你媽媽無教過你......」

「你唔係以為我會信你路過吓嘛?」

「我真係路過......亦都無惡意，我知道我朋友曾經係附近經過，所以想過嚟搵返我啲朋友。」我照實講，不過將老闆娘嘅事隻字不提。

「朋友?」佢問?

「係....」

「你係唔係搵緊一男兩女?」

我驚訝，一男兩女唔通就係阿明、Mindy 同Doris?

「喂，你帶佢地幾個過嚟。」無人機傳嚟男人微弱嘅聲音，應該佢係同緊其他人講野嘅背景聲音。

我聽到呢一句之後，男人就無再講野。 而我只好呆呆咁等，祈求佢地講個三個人就係Mindy 佢地。不過諗諗下，我又唔係太想就咁搵到佢地。

如果無人機後面講野個男人， 係屬於一班壞人，咁佢地三個就有麻煩。

「Geoff......?」無人機突然傳嚟一把女聲。

我心頭一震，呢一把聲，就係一把熟悉嘅聲音。

「Mindy!?」我大叫。

下一話: 棄子