[深夜重口味] ABC 女教師的性事: 愛-誘-罪

話說我 (Celestine Leung) 同事 Sylvia Cheung 十分迷戀校長嘅公子 Derek Ma，點知 Derek 澄清自己係 gay 嘅，呢個秘密令我相當困擾。另一方面，同 David 上過床之後佢一直冇搵我，直至佢突然嚮快餐店出現...

唔知點解，見到 David 我突然心跳，明明呢幾日成日想佢搵我，但當依家見到佢，又唔想佢見到我，都係走...
「咦，Celestine?」
太遲了...
「咁... 咁啱嘅，David，你食飯呀?」
Holy cow! 我講咗句自己最不屑嘅廢話!
「吖... 係囉...」
突然見面，太家都有啲尷尬。
「我睇咗好耐，唔知食乜好。」


Katy 講過佢有選擇障礙。
「不如呢個? 清淡啲。」
「好喔，一於咁話。」
既然唔撞都撞到，或者我試下佢係咪好似 Sylvia 咁講先...
「係呢，Celestine，你可唔可以畀多次你個電話號碼我? 我剷晒電話入面啲野，之後先發覺原來冇你電話...」
Oh I see，原來佢唔搵我係因為冇電話!
「無問題，但點解你突然剷晒電話啲野?」
「呀... 係因為...」
佢即刻面紅唔識答。
Sorry，我明我明，唔想 Katy 見到入面啲野，係咪? 都係改個話題...


「By the way，點解你嚮呢頭食飯嘅?」
「啊，我公司嚮附近，放工唔定時，所以叫外母唔使煮我飯，Celestine 你呢? 你學校嚮附近?」
「唔係，學校好遠，不過我屋企嚮冇幾遠...」
「呢頭好貴租喎。」
「我住果度好舊好多年樓喇，而且我同另一個女仔分租，OK 啦。」
嗯，我係咪講得太多私人野畀佢知?
「你個同屋主都係老師?」
「唔係，佢係記者，不過成日唔嚮香港。」
「記者好辛苦喎...」
「幾啦，不過可以見識好多野，例如有一次佢去 Sarajevo...」


有人陪食飯總比一個人好，原來我同 David 幾投契，呢餐飯食得好開心...
開心到我唔記得買沙律同生果。
於是第二晚我又去快餐店撞佢。
「Hi David.」
「Hi Celestine，又咁啱嘅?」
Katy 無講錯，David 今日件恤衫同領呔同佢講嘅一樣，又會咁搞笑嘅?
「Celestine，你笑咩?」
「嘻嘻! 冇咩野...」
不過最後我講番畀佢聽 Katy 點形容佢。
「哈! 個衰妹咁話我嘅?」
「不過佢好錫你架。」
「與其話我有選擇困難，不如話我習慣咗 Edith，即係我太太，幫我安排晒所有野。」
「啊，原來係咁，你同 Mrs Ng 一齊好耐嗱?」
「我地中學識嘅，我讀男校，超級怕羞...」
睇得出!


「當時中六，學校同另外兩間學校搞 Christmas ball，我地個個坐嚮度，突然有個女仔走過嚟，逼我地過去請佢啲同學跳舞，我本來唔想去，不過被人捉住咪硬住頭皮囉...」
「同你跳舞果個就係 Mrs Ng?」
「唔係，係過嚟逼我果個，跳咗一隻舞之後大膽咗，咪問番佢做乜咁勇，於是就識咗咯。」
原來 Mrs Ng 同我有啲似，都係由女方主動，不過分別係 Mrs Ng 離開之後佢丈夫仲掛住佢，而我...
「Edith 係一個好識照顧人嘅人嚟，好多事我未諗到佢已經安排好晒，或者可以話縱壞我啦，所以佢唔嚮度好多野都唔習慣。」
「不過佢交低畀 Katy 照顧你。」
「係囉，Katy 成個管家咁... Celestine 你呢? 你... umm... 你呀... 你... 你平時有冇進修?」
「吓? 做乜無端端問我有冇進修? 你其實係咪想問我男朋友?」
佢尷尬地傻笑...
「我依家冇男朋友，你上次嚮電話度見到果啲 message 係白撞嘅。」
Patrick 委屈下你喇!
「佢騷擾你? 使唔使報警?」
「我會 block 佢，不過你問起進修，我有個 part time course 讀緊，下個 sem 就快開始喇。」
「哈哈! 老師變番學生...」
如是者，我同 David 晚晚一齊食飯，引用 Sylvia 嘅說話，我地每日加深互相了解。


不過幾個星期都出街食嘅副作用係: 我肥咗!
唔可以再係咁，雖然嚮屋企食沙律會見唔到 David，不過... 或者一個禮拜食少幾餐啦!
「David，食完飯可唔可以陪我去 super market 買生果?」
「可以，不過你有冇帶遮? 出面落緊雨。」
早唔去遲唔去，今日去 super market 超級不智，因為...
「嘩! 使唔使咁大雨? 有遮都冇用啦，我地要等下喇。」
於是我地嚮商場行多半個鐘，但雨水只係細咗小小，而且紅雨了。
「紅雨都唔係大問題，Celestine 你睇果邊，係咪水浸?」
「Oh my god! 咁點算?」
「唯有再等下。」
同頭先開心行商場唔同，依家我地擔心緊...
「死啦，David，啲水愈浸愈高嘅?」
「唔... 如果啲雨唔細番，好難水退，只會愈嚟愈浸。」
開始有啲人唔等，照行過去，不過已經浸到上小腿。
「Celestine，去你屋企係咪只有呢條路?」


「係呀，早知唔嚟啦，一係你走先，我等到水退先走。」
「唔得! 點可以漏低你? 又唔知幾時先水退。」
其實我都好無助。
「一係咁，Celestine，我孭你行過去。」
「吓! 咁點得? 你咪濕晒?」
「一個濕好過兩個濕啦，而且你著高踭鞋，點行?」
「唔好啦，好怪嘅!」
咁大個人被人孭住行...
「依家咁大雨又水浸，邊有人理你? 好彩你著裙褲，唔會走光嘅。」
「唔... 唔好啦...」
「如果依家仲唔走，我怕一陣浸到腰我地走唔到。」
David 遞把遮畀我，企嚮我前面，準備孭我。
「真係要?」
「快啲啦!」
我唯有爬上佢背脊，佢捉住我兩邊大髀。


「捉實，行喇。」
於是我負責擔遮，佢孭住我行。
「我係咪好重?」
「比起 Katy，你重小小啦。」
「唓!」
「其實重啲仲好，我地冇咁易被水沖走。」
David 一步步向前行，啲水已經浸過佢膝頭，差啲掂到我對鞋，於是佢將我再孭高啲。
「得啦，David，對鞋濕咗唔怕啦。」
「唔得，如果孭住你都濕，我咪嘥功夫? 放心，我會安全送你返屋企嘅。」
好窩心! 我就係想要呢種安全感，我緊緊攬實佢，感受佢堅強嘅背肌，同佢堅毅嘅承諾。
David，你真係好! 
「差唔多喇，Celestine，前面果度冇水喇。」
終於我地脫險喇!
「David，你成條褲濕晒，凍唔凍?」
「OK，上面果啲彈濕啫，放心，我過果邊坐的士返去。」
其實我應該請 David 上屋企，畀佢整乾個身先，不過我應承過同屋主 Josephine 唔可以帶男人返去，加上我怕佢上咗去，我會唔畀佢走...
「好多謝你，David，我唔知點報答你。」
「好小事啫。 It's my pleasure。 你都早啲瞓，bye。」
返到屋企，我成晚囉囉攣，揸住個電話好想打畀佢，但又唔知講咩，搞到好夜先瞓... 
所以第二朝瞓晏咗，返到學校已經趕唔切早會，直接上第一堂。
奇怪地今日班學生個個陰陰嘴笑...
「Hey guys, what are you smiling for?」
不過冇人答我。
小息返到教員室，Sylvia 第一時間衝埋嚟...
「Celestine，果個係咪就係你講果個單親爹地?」
「你講咩? 邊個果個?」
雖然我知佢講緊 David，不過一頭霧水。
「仲收埋? 通晒天喇!」
佢遞份報紙畀我，港聞係尋晚場紅雨，好多相影到四維水浸，而其中一張...
係我同 David! 
相片中我揸住遮，伏嚮 David 背脊，佢孭住我行。
標題仲話: 水深過膝，暖男揹著女友涉水而行。
「好浪漫啊!」
「唔係呀，報紙作新聞咋，我地唔係男女朋友呀。」
「我知吖，我知格，我知喎，你地唔只男女朋友咁簡單嘛...」
「喂咪亂講野!」
Sylvia 一邊奸笑一邊走咗去。
望住張相，我好擔心，唔知會唔會影響到 David?
不過同一時間，尋晚嘅窩心感覺又返晒嚟。
都係 whatsapp 佢: 『David，我地尋晚被報紙影到，有冇影響到你?』
不過佢冇睇，係咪煩惱緊?
直到晏晝，個 message 仲未睇，點解嘅? 係咪想避我?
「Miss Leung，有新目標嗱?」
「許 sir?」
「唔怪得呢排約襯你都話唔得閒啦，原來心有所屬。」
「唔係呀 Patrick，我同佢冇野架。」
唔知點解，講呢句說話時個心有啲痛。
「唔緊要喎，我地各取所需啫，我都有女友啦，你有男友都可以格。」
突然間，我唔想同 Patrick 繼續呢種關係，雖然 David 同我未有名份，不過覺得為咗佢我唔應該...
「不如今晚嚟我度? 我女友下晝先飛，聽日先返。」
「唔好喇 Patrick，我唔想...」
「咁快做番淑女? 你每次都好滿足格，呢次就當 farewell 囉。」
雖然個心唔係好想，不過的確 Patrick has brought me much sexual joy.
「嗯... 咁好啦... 最後一次喇。」
「Yeah! 我今晚煎定心形牛排等你，你著定戰衣嚟啦。」
「吓? 使唔使?」
「梗係要，到時我要慢慢拆禮物，諗起都扯呀!」
「You are lechery!」
放學補完習，我返屋企換衫，入面著住 sexy underwear，無論內褲定 bustier，除咗大量 lace 仲有好多繩，既然 Patrick 咁想拆禮物，一陣等佢拆到夠。
噴小小催情香水就出門。
我留意到 David 個 message 始終冇讀，what happens to him?
去到 Patrick 屋企樓下，正當我嚮電話搵 door entry code，個管理員行埋嚟...
「小姐，請問你搵邊個單位?」
「我去 18C。」
佢幫我駁去 Patrick 個單位。
等咗一陣，見到 Patrick，不過佢神情好怪，唔出聲，剩係對住我猛眨右眼...
係咪中咗風? 塊面抽筋?
跟住離遠有把女仔聲...
「邊個呀?」
「冇，白撞啫!」
跟住收線了。
我呆晒...
「小姐，究竟你搵邊個單位架?」

<未完待續，不定期連載>

如果你係 Celestine，你會:
a. 照殺上去搵 Patrick
b. 問管理員佢地休息室有冇床
c. 返屋企，食自己
d. Others，please specify: _________