【散文】【愛情】《呢種女朋友，去邊度搵？》: 《結婚生仔》

隨著年齡既增長，身邊開始越來越多人結婚，有啲甚至已經生埋仔。朋友娶餐既時候，大家既話題通常都離不開「三寶」…
 
結婚，買樓，湊仔。
 
即將結婚既，會興高采烈咁分享籌備婚事過程中所遇到既問題。而已經結婚既人，就會以過來人既身份不斷提供意見，分享自身經歷…禮金俾幾多，過大禮應該要點，印帖用邊間公司，攝影師搵阿邊個邊個…諸如此類。
 
已經置業既，會有好多關於睇樓或者樓市既分析。
 
已為人母/人父既，會不斷分享湊仔經。
 




而在場仍然單身，或者尚未計劃結婚既你，則完全搭唔到嗲，彷彿唔能夠融入餐飯，有種被孤立既感覺。
 
老實講，眼見身邊朋友一個一個咁上哂岸，其實會有種無形既壓力…
 
一種「自己既人生好似有啲落後」既壓力。
 
飯局中，我見阿明雖然同自己一樣，都係無乜點出過聲，但神色上明顯有種悠然自得，於是我好奇地問：「阿明，你打算幾時同你女朋友結婚？」
 
「可能過多幾年掛…」阿明回應。
 




「你地無傾過呢個話題？」
 
「都有講過吓既…」
 
「身邊啲人都差唔多結哂婚，佢竟然無俾壓力你！？」
 
「佢有提過想喺三十歲前結婚既，但佢知我未準備好，所以話再等吓先…」
 
「三十歲！？兩三年後就係喇喎！」
 




阿明話，佢女朋友曾經咁樣回應：「結婚並唔係一種潮流，唔應該見人地結，我地就結。我希望有朝一日你向我求婚，係出於真心真意想娶我，而唔係單純為左負責。」
 
至於生仔方面，阿明話雖然另一半好鍾意小朋友，但基於責任同種種社會因素，兩個人已經有哂共識，決定唔生，結婚之後打算開開心心咁過二人世界就算。
 
若然搵到一個價值觀同自己類近既伴侶，其實佢既人生比任何人都走得更前。