開放日之後，我同我男神同佢朋友一齊組隊殺人

開放日終於完滿結束，我成日無得唞咁嚌⋯⋯我哋學校其實幾出名嘅男校黎嘅，但係都唔使勞師動眾咁搞個開放日出嚟㗎。冇飲水成日嘅我就去噤支水飲下，係中途竟然見到我男神同佢嘅公認教員室buddy。男神呢家嘢，唔係女校先可以有嘅，男校呢老師都可以做到男神。我當然係對個啲後生仔無興趣。（同埋佢哋真係好慘係咁比人話係肉，班女人成日話我哋成日提條事業線，好心佢哋收嗲啦話我哋小鮮肉都未同佢哋計）。揾男神緊係要有學識、有能力、得得意意、傻傻地個啲啦。咁我男神閻宥恆當然中噻所有嘢，加上佢有錢就是任性，簡直係我哋學校老師男神值排行榜第一位。（其實係我咁覺得姐）

唉唔應該講都講埋啦，其實呢，我呢，就比較鍾意男性個邊嘅，所以某啲嘢係控制唔到㗎。

但係我嘅Gaydar唔太準，只係覺得佢哋兩個有啲……

而我男神嘅朋友呢，就叫做江昊凌。佢睇樣其實幾可愛下，但係佢有個好大嘅問題，就係一開口講嘢呢，全世界都想打柒佢，乜撚粗口都唔可以形容到佢嘅毒舌⋯真係有時會頂唔順。

好，講返正題先。作爲佢地兩個嘅忠實粉絲，梗係唔會放過呢個可以R水吹嘅機會啦。





「閻老師，江老師。」講出黎細聲到我都唔肯定佢地聽唔聽到⋯⋯係嘅我呢啲人真係抵鬧嘅，心入面就算幾咁澎拜都好都唔會表現出黎甚至仲有啲怯添。

「依乜你仲未走嘅？」我親愛嘅閻老師問，而江昊凌就係隔離企係到，只係望住我。頂真心驚，雖然佢可能發緊吽哣但係佢雙目無神更加似係到啤緊我咁，真係好撚恐怖。

「係啊，啱啱當完最後個更落嚟買支嘢飲。」我答。「你哋呢？」

「一陣做埋啲嘢就去食飯啦。」閻宥恆暖男式嘅笑容簡直令人心花怒放，而佢隔離個嗰只係好唔耐煩咁棟係到。明明江昊凌可以唔等佢自己返教員室先，佢竟然繼續等。「咁你呢﹖」

「無啊我無嘢做。」我好快咁答。我呢啲毒撚可以去得邊啊，最多都係喺屋企睇下漫畫同GV啫。





「咁不如一齊食埋飯啦好冇。」江昊凌聽落去好似串緊我既一句話，點知閻男神真係覺得佢真心講呢句。

「哦好啊⋯⋯我哋翻教員室執埋啲嘢，一陣去附近食啊。」

男神啊，你咁天然呆真的好嗎﹖

「咁我係到等你地兩個!」我簡直係得到左全世界嘅好運先可以同佢地一齊走。我講部電話攞出黎打算同班朋友報喜我今日除咗同男神同佢朋友講到嘢⋯
我發現我就算係訊號爆格都send唔到嘢出去。

而我企個道係我地學校嘅大操場（其實係草地），係最空曠嘅地方，雖然都唔係好似出面個停車場咁，應該係收得最好嘅地方。





兩位唔知點解教教下科學都會變成IT部嘅老師尚未走遠，我決定行快啲去問下佢地，而佢地唔知係唔係聽到我跑過去嘅聲所以都停低落黎。

「又點呢？」江昊凌問，頂佢真係一講嘢就想殺撚死佢嘅type⋯。明明係佢自己講然後條仔get錯關我撚事啊。

「江老師啊，我唔知點解send唔到嘢出去⋯。」對唔住大家，我對住佢堅怯。頂我wallpaper仲要係佢哋兩個我點比部機佢睇啊，瀨屎啦。「你地send唔send到嘢出去？」
好，兩個同時間拎部同型號同色嘅蘋果出黎試，用LG嘅人收咗皮。

「做乜野啊⋯」江昊凌講，佢望（啤）咗我一眼，跟住繼續將目光放係自己嘅電話到。咁即係唔係我嘅問題，而係我地咁多個都係咁，仲以為1010變到好似CMHK，得閒唔埋兩日就斷。好彩唔係，如果係嘅話就仆得街啦。

「Arik？」佢望住閻宥恆，得到嘅都係擰頭。

「無可能㗎喎⋯」男神望咗望江昊凌，跟住我又望咗望男神。

突然間，係中央廣播嘅咪度，出現咗六下鐘聲。唔係我哋學校常用嘅校鐘，反而有啲似教堂報時嘅鐘聲。





跟住，好老套咁，我就咩都唔知，失去意識啦。