我只不過喺自修室溫書，點知比我遇番佢。: <四十四>我什麼都沒有

我四周圍望，我望到嘅唔只係間屋同我間屋大細嘅差別，更明顯嘅係我同佢身份之間嘅距離..
 
雖然我地係住同一個屋苑，但係佢屋企係雙連單位，用嘅家俱都價值不菲，佢屋企其實好有錢..
 
「哈..阿楓..啊嘛？飲杯茶啦。」
 
「唔該伯母..」眼前嘅就係小涼阿媽，雖然佢睇落都幾好相與，但係我始終都會有啲緊張。
 
「上次唔該曬你啊，喺醫院陪咗小涼咁耐。」
 


「我應該咁做嘅。」我個腦好空，完全唔知講咩好。
 
「你地..識咗幾耐啊？」
 
「半年多啲架啦..」
 
「阿楓，如果你對我個女係真心嘅話，我係唔反對你地一齊嘅，但係佢爸爸就..一陣可能會講說話難聽啲，希望你可以有心理準備。」
 
「咔」一聲，將我嚇到就黎魂飛魄散，個門開咗，等我仲驚住係佢老豆，好彩係佢細佬番黎。
 


「媽咪，我番黎..啦。」佢翻到黎見到我就好愕然。
 
「康仔你番黎啦！」
 
「呢個係…」
 
「你家姐男朋友啊，叫哥哥啦。」
 
「哦..哥哥你好，我叫林志康。」幾有禮貌咁喎。
 


「你好，叫我阿楓得架啦。」
 
「咁我嗌你楓哥哥架啦。」
 
「哈哈..都係一句姐。」
 
「快啲去沖涼啦，林志康，打完波成身汗！」小涼催佢，好似個母親咁。
 
佢地嘅好客令到我頓時都放鬆一啲..如果佢老豆唔會番黎嘅話。
 
「好啦，食飯啦。」小涼阿媽叫。
 
「唔洗等埋世伯啊..」我問。
 
「唔洗等啦，都唔知等幾耐。」


 
餐檯上嘅餸都唔係啲家常小菜，都係啲西餐咁。
 
「你地平時..都係食呢啲架？」我問小涼。
 
「唔係嘅，都會食中餐架，唔係我點學？」就算係中餐都應該好貴。
 
又在「咔」一聲，今次應該都冇得避..
 
 

 
「爹哋！」小涼同康仔見到佢就嗌。
 
「世..世伯。」


 
「又係你啊？」佢好似好憎我咁，一見到我就黑曬面。
 
「我叫阿楓特登上黎食餐飯，大家認識下嘅，你快啲去換衫啦。」小涼阿媽幫我打圓場。
.
.
食嘢果陣，佢老豆出奇地冇問我任何嘢，自己有自己食，直至食完飯之後..
 
小涼同佢阿媽去咗洗碗，康仔做功課，得番我同佢老豆喺廳。
 
「細佬你叫咩名？」
 
「我叫阿楓啊..世伯。」
 
「你唔洗溫書咩？咁得閒黎人屋企食飯？」


 
「我一陣就會落番會所溫架啦。」
 
「好阿楓，我都唔轉彎抹角，你都知點解我阻止你同我個女拍拖架啦。」
 
「知..知..係因為之前..」
 
「冇錯，所以你唔洗再做啲咩，我唔會俾我個女再傷多次心，特別而加係非常時期！」
 
「我唔會好似以前果個人咁架！我對小涼係真心，唔會傷害佢架！」
 
「講我都識講，你點樣保證？」
 
「如果你地拍拖期間有咩差錯，搞衰咗個DSE，你又點負責？」
 


「你對將來有咩規劃？你點俾幸福我個女你有冇諗過？」
 
「我用條命保證我一定唔會咁對佢！」我情急之下就講咗呢句。
 
「呢句說話就顯出你嘅唔成熟，亂咁開空頭支票，人講每一句說話都要承擔番個後果，賠條命你賠得起咩？你父母咁點？再講，唔通我真係殺咗你？」
 
「咁我點可以交個女俾你？」
 
我突然覺得自己真係好失敗，佢講嘅嘢我一樣都冇諗過，以為懶勇咁亂發啲山盟海誓就可以打動到世伯。
 
「你番去自己好好諗下啦！」
 
原來我真係咁唔成熟..
 
「唔好意思..世伯，好多謝你嘅教導...打擾曬..」我向佢微微鞠躬。
 
「走先啦伯母，走先啦小涼..」我覺得我唔似離開，似係逃避..我又再一次逃避。
 
番到屋企，我望住個天花板，天花板白雪雪，仿佛見到我同佢嘅將來咁，一片空白。
 
究竟我將來想點？入到大學想讀咩科？讀唔到又有咩打算？我可以俾到咩幸福小涼？
 
頭先一個個問題再次諗起，我卻一個都答唔出。
 
「隨時愛相見 便見面 未怕疏遠了十萬年..」小涼打黎..
 
我cut咗佢線..我實在唔知仲可以點樣面對佢。
 
「有咩嘢一齊去面對..你話架嘛。」佢send埋個whatsapp黎，但係我實在冇心情去覆佢。
 
第二朝我番學果陣，佢企咗喺巴士站等我..