我只不過喺自修室溫書，點知比我遇番佢。: <四十二>最後的旅行
「Woww，睇黎冇事啦喎..」第二朝我地就見到佢地一齊番學，今次竟然係阿月喺阿靜後面。
「邊個話啊，我未原諒佢架！睇下佢表現點啦。」阿靜講。果個講嘢高八度嘅阿靜番番黎，個班房都即刻有番曬生氣。
「神童言，一切都喺你掌握中啦..」我暗地同阿言講。
「人嘅感情幾複雜都有個譜嘅。」阿言輕輕一句已經盡顯佢嘅智慧。
班主任堂果陣，阿言就宣佈：「又係旅行嘅大日子啦，今年你地想去邊呢？」
「今年旅行係星期六，肯定好多地方都好多人啦...」阿星呻。
「去下白泥！」子妮冇啦啦嗌，呢個建議唔錯。
「有冇人反對？」阿言問。
班呢樣嘢好奇妙，問佢地意見就冇意見，唔問佢地又話唔尊重佢地。難得有人俾意見，佢地都冇咩所謂。
阿言係呢級吸引力咁大，經過佢同其他班「磋商」，佢地都同意去下白泥。
「表姐夫~唔知帶多個人去得唔得呢？」有啲時候都係要低下頭嘅。
「衰仔有嘢就識嗌表姐夫，啦，原則上就唔俾嘅。」灰咗灰添。
「但係果到有其他遊客我控制唔到架喎。」YES！
.
.
「小涼，我地學校就黎旅行，果日係星期六，你一唔一齊啊？」小霖喺自修室問佢。佢仲緊張過我咁。
「下..放假緊係要溫書啦。」
「吓..唔去啊？」我有啲失望。
「不過如果有人求下我可以考慮下嘅...」點解啲人講嘢都咁鐘意轉彎抹角。
「去啦..小涼大人..你唔去我好柒架啦~我當住全班問可唔可以俾你去架~」
「下？真係架？」佢問小霖。
「嗯嗯，佢仲比全班笑添。」
「好啦，咁既然有個傻佬咁戇居我就去啦，哈哈。」
自從佢應承咗去，我就每日都喺到期待緊，等咗咁耐，終於都到啦！
費子楓最後的旅行日，正式開始！
「嘩，今日天氣勁正啊！」阿豪一去到就講。
經過長途跋涉，終於都到咗下白泥。靚就幾靚架..不過我諗我冇咩事都唔會黎，真係遠到呢…
「終於可以黎見識下啦，聽講個日落好靚架！」小涼好似好興奮。
「一陣同你去泥灘睇下啦。」
「我地而家去拎番啲燒烤爐先啦。」主席阿言講。
全級百幾人一齊去拎爐都幾浩蕩，個個都你有你傾，佢有佢傾。雖然係嘈咗啲，交集埋一齊就好似一首青春嘅交響曲。
我地8個人一個爐，又全能嘅阿言喺到，透爐自然唔成問題。
「月月我要食雞翼！」阿靜講。
「咁快食雞翼..？我燒緊腸喎..」
「我幫你燒腸，你燒雞翼！」
呢2個人真係..
「啦，死人頭，食魚蛋啊。」都係我嘅小涼好啲！
「嗯~好食到震，你又試下塊札肉呃。」
「阿晴你熱唔熱，幫你潑涼啊。」阿言竟然都會做呢啲嘢。
「舒服舒服，我又幫你潑下啦。」
「喂大佬啊，玩恩愛番屋企啦。」阿豪講。
「唔抵得啊？」我窒佢。
「小霖你燒俾佢啦，人地葡萄啊。」
「理得佢啊，肚餓自己燒，哈哈。」搞到阿豪相當冇癮。
「你地睇下阿星，佢喺果邊硬曬呔咁。」佢去咗隔離組，因為呢到夠曬人。
「會唔會因為佢女神喺果到？」係喎，我地淨係聽過佢有鐘意人，但係從來冇聽過係邊個。
「似啦似啦，我地留意下係邊個先..」
嘻嘻哈哈咁，就燒咗陣嘢食，我地一路燒就一路用個喇叭聽歌，聽到興起仲唱埋出黎，十分之過癮啊！
然後我地就去周圍同人影下相，最後一次學校旅行，喺咁靚嘅環境底下，梗係要影番夠本。
「巴渣妹，我地自拍啊！」
「好啊。」我地頭貼住頭，咧住嘴笑，喺溫暖嘅太陽底下，我地嘅笑容都變得和煦。
「好靚啊張相..」佢望住張相眼都唔眨。
「等我po下 ig先！」佢講，佢第一次po我地嘅合照..
「喂，廢紙！我地一齊影相啊！」阿星叫。
「一、二、三、笑 ！」揸機嘅子妮嗌。
相入面嘅我地笑容都係最真摯、最誠懇。
幾時都係呢幾兄弟最好，有咩事都一齊面對，一齊承擔。好彩有佢地先令我中學生涯冇咁枯燥。
我唔知畢業之後可以再眾埋一齊嘅機會有幾多，但至少活在當下，如果第時我地唔可以成日聚埋，都有呢啲回憶陪住。
玩到咁上下，突然唔見咗小涼，於是我就打俾佢，睇下佢係邊。
「做咩落咗黎個灘都唔同我講聲。」搵到佢之後我就問。
「我見你地玩得咁開心費事阻住你地啊嘛。」
「呢到風景真係好靚啊！」佢之後講。
「係啊..望到都唔想走。」
「因為陪你睇果個係我啊嘛。」講完佢就挨咗落我膊頭，好浪漫。
「咦，係阿豪同小霖喎 ！」小涼周圍望下之後見到佢地。
「唔好阻住佢地啦。」我講，其實係我想繼續同小涼獨處。
「如果有一日喺你隔離果個唔再係我咁點？」佢問我，點解佢咁問嘅？
「點解咁問？」
「冇啊，問下之麻，唔洗理我。」
「你放心啦，瞓喺我費子楓隔離嘅只會係你林小涼一個。」
「你個死人頭，講呢啲。」佢索一索個鼻，好似好感動咁。
「你睇下！開始日落啦！」等咗咁耐終於見到個夕陽，啲人真係冇講錯，個夕陽真係好鬼靚。
「嘩...我第一次睇日落架炸..」小涼係咁影相，唔想錯過每一個時刻。
我都乘機喺佢唔為意影咗佢張側面，佢入曬神個樣真係好charm，好迷人，令到我都唔想錯過同佢一齊嘅每一分每一秒。
「噢...日落完lu..」佢有啲可惜咁講。
「唔緊要啦，下次再睇過囉，番去啦，就黎集合。」
「嗯...」
番到去之後，佢地已經執好曬嘢準備走。
「嘩你地兩個捨得番啦？」阿王講。
「係啊..睇日落啊麻，真係好靚，你下次同表姐黎睇下啦。」我講。
「都好啊...」佢好沉醉咁FF中。
「唏，唔講呢啲嘢住，我地走啦。」
走果陣，我拖住小涼，好唔捨得咁回頭望多眼。
「到你唔捨得啊？」佢問我。
「我地下次再黎多次啦。」我點一點頭，就繼續行。
回過頭之後，就代表今次嘅旅行終於完結。
回程途中，小涼都已經攰到瞓著咗，佢一樣挨住我黎瞓，唔知點解我仿佛感受到佢起伏不定嘅心跳聲，亦都感受到佢手心嘅溫度..好凍、好孤獨。
係因為我俾佢安全感唔夠？
我一路望住風景，聽住首「夏雪」
【你給的愛帶著溫度 尤其擁抱時最清楚
心跳傳來的起伏 像一顆跳動的暖爐
手放進口袋的溫度 融化了走過的路途
冰天雪地的國度 能抱著你就很滿足
誰都知道氣候會變 更別說諾言
你的冬衣還留在我窗前】
聽聽下，突然有啲唔係幾好嘅預感。