我只不過喺自修室溫書，點知比我遇番佢。: <三十二>不歡而散
食完飯之後，我地就行咗陣街。女人一有街行就發曬癲咁。
「嘩，對鞋好靚呀！」
「嘩，呢到特價呀！」
話就話行街，其實係我地幾個男仔跟喺後面自己吹水。
「慢慢黎啦，佢對你都唔太反感姐。」阿月同阿豪講。
「咁係因為之前一直係朋友姐。」
「你咁消極點得呢？」阿星講。
「咁你地都知佢係鐘意阿楓加麻。」
「所以咪叫你慢慢黎。」
講講下，我地經過間figure鋪，間鋪有隻三井壽限量版figure，我一直都勁想要！
「算啦，唔夠錢..」
「你爭幾多呀？」阿言問。
「爭300呀..」
佢地每人都夾咗啲錢出黎，「300呀，快啲買啦，遲咗就冇。」
頂，我好乸感動，識咗班咁好嘅朋友。
買完之後，我個袋冇位放，所以放咗喺小涼到。
.
.
「我地搭巴士呀。行果邊。」阿言同阿晴講。
「咁其餘都係搭地鐵架啦？」阿月問。
「err..我想搭巴士啊，阿楓小涼一齊？」
「好呀！」小涼已經立刻反應。
上到巴士之後，兩個女仔坐，我坐喺佢地後面。
佢地自己喺到傾閒計，難得咁寧靜嘅時候，我不經不覺就瞓著咗。
當到咗站後，我同小霖就送咗小涼番屋企先。
「今日我真係玩得好開心，多謝你地啊！」
「早啲瞓啦，你都攰。」
「好啦，拜拜！」
「我..送埋你番去啦。」小涼走咗之後，我同小霖講。
「等陣。」
「做..做咩呀？」
「玩夠啦可？」
「玩？」我心都虛埋。
「你地真係當我kai架？你地做緊啲咩唔通我睇唔出？」
「由一朝早接到你個電話，我就開始俾你地玩緊。」又係呢種哽咽聲。
「唔係架..我地唔係玩你。我地只係想幫阿豪..佢鐘意咗你好耐先..」
「咁我呢？我夠鐘意咗你好耐啦！」佢啲眼淚開始流出黎，我個心都變得好亂。
「你明知我鐘意嘅係你，你就一直扮唔知，仲幫阿豪追我，你當我係咩呀？」
「我知你唔鐘意我架，我仲一直扮冇事，你知唔知呢種感覺好辛苦架！」
「你明知我希望首『唯獨你是不可取替』係我鐘意嘅人唱比我聽，你仲特登點俾我同阿豪唱！」
係...我的確特登咁做..
「咦，係唯獨你是不可取替喎。」有一次小霖去我屋企食飯果陣，我阿媽播呢首歌。
「你好鐘意呢首？」我問佢。
「超鐘意呀！啲歌詞好sweet，仲要係sammi同安仔合唱，冧爆呀！」
「你睇你，講到口水都流埋。」
「如果我鐘意嘅人可以唱比我聽我實開心死。」
「你知唔知你好自私呀？費子楓？你唔鐘意我姐，都唔洗推我比第二個呀？」佢已經喊到眼都腫埋。
而我卻無言以對…
「點解你唔可以順從佢地安排去鐘意我呀！」
「你知道咗..？」
「我咩都知呀！阿晴同我講曬啲嘢啦！」
「對唔住..我唔知小涼出現會對你地..」
「根本就唔關佢事，冇佢出現你就會鐘意我咩..」佢苦笑。
「你覺得佢地格硬撮合我地兩個，逼你離開小涼係好自私嘅行為，冇理你嘅感受。」
「咁你幫手撮合我地又係咩呀？你只係想你個心好過啲炸，咁你就可以同小涼一齊啦，最有私心根本係你！」
「對唔住！對唔住！」當面具被拆下，只有不斷的道歉。
我對佢傷害實在太大，我一直以為扮無知係最好嘅方法，原來係錯曬。
「我..真係..好Q辛苦架..嗚嗚嗚。」
我唔知可以做啲咩，我將佢拉埋黎，佢伏喺我膊頭到不斷喊。
冇幾耐之後....
「我諗我地..都係做番普通朋友算。」之後佢轉身就走，留低我一個呆立當場。
「阿楓….」
我轉過頭一望，小涼流住兩行淚水企咗喺大堂門口..拎住個三井壽figure。
…原本我好似俾小霖踢落懸崖咁，但係都死抆住個懸崖邊，但係我而家選擇放手，跌死就跌死，點都係自己咎由自取。
「你..又聽到曬？」
「點解..你唔..話我知？」
「原來..係我..係我出現先會有咁多事發生。」
「我就係唔想你有咁嘅反應。」我無力咁講。
「等我今日仲同佢地有講有笑咁 ..佢地咪會覺得我係個好假嘅人囉！」
「佢地知我冇同你講架。」
「我成日叫你有嘢就要同我講，唔好瞞住我架！」
「你成日呃住我，我地點繼續相處呀？」
一句句說話化成大鐵鎚，敲碎我嘅心靈，我一時都未組織到我應該點樣安慰佢。
我以為任何事作出沉默，事情會隨住時間而淡化。
點知沉默就係一個計時炸彈，時間愈耐，爆起上黎威力愈大。
明明我唔想傷害任何人，但係到頭來就傷害曬身邊每一個人。
「最衰係你呀費子楓！我憎死你呀！」
一晚整喊兩個女仔，我都算世界級。
我嘅行動已經快過我嘅思維，我行咗過去攬住咗佢。
頭先都係借個膊頭俾小霖，而今次，我確確實實攬住咗小涼。
「再一圈 再飛一圈就好 她寂寞手心 在等誰打擾」
「對唔住..對唔住..對唔住！」因為真係好重要，所以真係要講三次。
「我寧願 交換所有給她 一個緊緊擁抱 哪怕就一秒」
「衰人黎..衰人黎..嗚嗚嗚」佢一路喊，一路係到打我，不過好彩佢冇推開我。
「再一圈 再陪陪她就好 讓我可以記得她 頭髮的味道」
「我以後唔會再咁架啦，有咩都同你講，唔會再隱瞞你任何嘢，就好似果次咁，好冇？」
「我..我叫費子楓。今年十七歲，白羊座，我而加單身！」
「讀馬嘉諾二世中學，中五甲班，最好嘅朋友叫黎爵言、龍應豪同蕭皓月！」
「最鍾意嘅顏色係黑色，最愛睇嘅卡通係聖鬥士星矢！」
「最鍾意聽嘅係黎明嘅今生不再，最鐘意嘅明星都係黎明！」
「最唔鍾意食臭豆腐，最成日做嘅運動係打籃球！」
「最叻嘅科係中文，最差係數學！」
「我最憎人睇我唔起同摸我個頭！」
「屋企有父有母，最錫我嘅親戚係我表姐，佢就黎結婚，我表姐夫仲要係我班主任！」
佢冇回應我，仍然繼續喊，可能坦誠真係佢好重視嘅嘢。
「你講過就係架啦。」佢終於喊完。
「承諾永遠生效！如有違背，天打雷劈。」我舉埋三隻手指發誓。
「喂..你劈死咗..咁我點呀？」佢成隻手隊埋黎我個口封住。
「你..做定帛金囉，嘻嘻。」
「妖，死開啦。」佢推開咗我，轉身就走。
我一個回馬槍，將佢拉翻黎我身邊。
「講笑姐，我邊捨得死呀，女朋友！」
「咩女朋友呀，邊個話做你女朋友呀？」
「咁算啦。」
「喂..至少都表下白啦..」
「林小涼小姐，唔知你願唔願意，做呢舊廢紙嘅女朋友，然後將佢循環再用呢？」
「邊有人咁表白架，咩循環再用呀，都唔知你講咩。」佢係到笑。
「呢位小姐唔肯回收，廢紙就去搵第二個資源回收箱啦。」
「你敢？我願意啦我願意啦，我粗粗地回收咗佢啦，嘻。」一時又喊得咁淒涼，一時又笑曬口咁...
我地又再攬住對方，終於可以以情侶嘅關係攬埋一齊，我唔會唔記得呢一刻。
「嗶。」十二點正。
十二點前，果一日係我人生最失敗嘅一日，而十二點後，我終於開啟我人生新嘅一章，我唔再係一個人睇住呢本書。
「就算我走不到 她的天涯海角 這瞬間已足夠 天荒地老」