我只不過喺自修室溫書，點知比我遇番佢。: <二十二>賭上未來
第二日，我就當然去咗同小涼食早餐。其實種感覺好奇怪，明明我地前一晚溫書溫到11點先番屋企，前後都只係8個鐘，我地又再見面。但係唔知點解，我又冇咩厭嘅感覺。
「其實你成日對住我唔厭架咩？」我問佢。
「厭架，對住你個木獨佬仲多過爸爸媽咪，悶到死！」
「咁你仲約我食早餐-3-」
「嘻嘻，愈厭就愈想對住喎。」費子楓，你要冷靜，冷靜..
「超，唔理你，買野食。」
「哎，家陣啲男人小氣到呢。」
「咁係咪唔食呀？巴渣妹？」
「板燒雞腿扭扭粉餐豬骨湯底加黑椒要可樂少冰！我去搵位！」佢即刻一輪嘴講低想食咩。食物果然係俘虜女人最大嘅武器。
「係呢，咁你地幾時決賽？」我買完野食之後佢就問。
「禮拜五放學呀，做咩？」
「冇呀，我估你果日都唔會去自修室架啦，咁我都唔落啦。」
走果陣我帶起個耳機聽歌，行行下有隻手係我面前揮下揮下。
「喂，嗌極你都唔應架！」
「聽緊歌呀麻。對唔住大小姐。」
「聽咩呀？我又要聽！」
「唔啱你架，係啲老餅歌。」
「我要聽呀！」
於是我就分咗一邊耳機俾佢，我地就係咁一人帶住一邊耳機行去巴士站。
「係今生不再喎！」佢聽到之後講。
「你又識？」
「我細個坐爸爸車成日聽架！佢成日播天濛光啲歌。」
「天濛光？」
「咪即係黎明囉死蠢！」
「係喎，哈哈。識貨喎你，我都好鐘意聽黎明啲歌。」
「你唔記得我叫Neway 十三姐咩？我聽唔少歌啦。佢果啲廣告真係超正 ！」
「嗯嗯！好似..喂，阿MAY?」
「仲有我係咪好任性呀？」
「係！不過我揀嘅。」
我地好似都notice到好似講咗啲唔應該講嘅野，所以突然變得尷尷尬尬咁。之後就咁聽住歌行去巴士站。
「喂，咁早呀楓少。」阿月翻到黎就問。
「噢HI。」佢hea應佢。
「做咩呀？冇厘神氣咁？」
「喂你有冇試過對一個女仔有種講唔出，好虛無縹緲嘅感覺？」
「即係點呀？」
「大概即係你唔肯定自己係咪鐘意佢，又唔知佢係咪鐘意你咁上下啦。」
「屌，我解釋到我都唔洗咁煩啦！」
「你鐘意咗個人？自修室妹？」
我都分唔清呢個問題究竟係佢問我，定係我問我自己。
「我都唔撚知。」
突然「啪」一聲，阿月好大力咁拍張檯。
「你唔可以鐘意佢架！千祈唔可以！」佢一路講，之後係咁搖我。
「喂..喂..喂！停手呀屌。」
「你講咩呀？點解唔可以？」
「下..總之就唔得啦。」搞咩呀，佢打打下鎮定劑轉咗食海洛英呀？
再有「Bling」一聲，我地望到小霖整跌咗佢個飯壺。
之後啲飯餸跌曬落地，我同阿月行過去幫佢清理番。
「啲飯食唔到架啦..今日你同我地食啦。」我同佢講。
「下..好啦，唯有係咁啦，一齊食啦。」
我幫佢拎個兜去垃圾桶倒咗啲飯果陣，好隱約聽到阿月問佢
「你聽到曬呀？」
我果陣背住佢地，所以睇唔到小霖嘅反應。點解阿月會咁樣問佢嘅？
我翻去佢地到果陣，佢地又借啲意轉話題，唔通佢地有咩瞞住我？
果陣入世未深嘅我，一直抱住呢個疑惑。但係而加嘅我奉勸大家一句，有啲野真係唔知好過知。
.
.
放學之後，我地又去咗後山練波。如果上次果個特訓係算辛苦嘅話，今次可以話係來回地獄又折返人間。
阿王完全冇當我地係佢嘅學生，佢完全當咗自己係馴獸師去訓練我地。
我地都明白佢咁緊張嘅原因，所以我地都無怨言咁服從。因為我地都想贏，仲要係開巷果隻。
之後幾日我地每一日都係咁操。雖然辛苦，但係我地都好享受。呢個係我地最後可以享受熱血嘅時候。搞搞下我都覺得我地隊有啲湘北。
我地有個好似良田嘅小巨人阿星，有好似流川楓嘅萬人迷阿月，阿俊就好似三井壽咁射波咁準，阿言就好似赤木咁帶領住我地..
係嘅，我承認我想做櫻木。唔係因為佢係男主角，而係因為我同佢對贏都有入執著。
眨下眼，賭上榮譽同未來嘅比賽就開始了。
一陣就係同C班嘅決賽。
上場之前，小霖走過黎同我講咗聲加油。
「輸咗又幫唔到阿言我就殺咗你。」
「你咁樣鼓勵我架？好失望囉。」
「理得你呀，集合啦。」
「算！」當我轉身準備走果陣，「喂！」佢叫番住我，
「加油啦白痴！」
每次有咩事都係佢為我注入支強心針，我一定唔可以令佢失望。
到列隊果陣，對方果三子又擺起個臭款。
垃圾ROY又喺到講：「睇住黎啦你地，今日嘅勝利一定係我地，仲有阿晴，佢都係我嘅！」
佢講完之後先發覺我地一早已經去準備，得番佢一個喺到自吹自擂。
「嗶！」開始了。
我地今輪首發仍然係阿豪代住阿言，跳躍能力極強嘅阿月一跳球就拍走個波，敏捷嘅阿星以迅雷不及掩耳嘅速度衝上前接應。
「阿星呢邊！」阿俊喺外圈接收阿星嘅傳球。
「太慢啦，龍嘉俊！」
喺阿俊準備起手之際，對面嘅李至圖已經跑到阿俊面對鎖死佢，令佢冇辦法射波。
「嘻！」
阿俊將個波傳番後，有個人接住咗之後沖入內圈。
「等我黎開齋啦！」一個完美嘅走籃令我地班率先打開紀錄。
「阿楓好野！」哈哈，咁有型嘅野梗係由我黎完成！全場支持我地班嘅都作出歡呼。
嘛，咪俾我型一陣囉！成篇文第一次咁型炸！
「阿圖，阿峰，到我地啦！」阿Roy 開波。
第一次面對佢地3個，都令我地不禁嚴陣以待。
「阿月，睇住阿峰！」阿言喺場外咆哮。
可惜都係俾阿圖傳到個波俾阿峰。佢地嘅速度真係好快，唔知以為佢地師承玉面雙飛龍。（唔明就睇下少林足球啦下。）
「6號仔空曬呀！」
當我地以為阿峰會傳番個波俾阿Roy，點知佢傳咗俾佢地班嘅得分後衛，我地趕唔切防守，所以令佢有機會入波。
佢地嘅實力果然不容小覷，成個上半場我地都防守得好辛苦，但係都落後4分。
直至下半場...
「阿言，上場啦。」阿王臨開始果陣叫。
「我冇任何戰術要交待，盡情發揮你地嘅能力啦！」佢補充。
「鍾海晴！我要你翻黎我身邊！」阿言上場前向住2樓嘅阿晴大嗌，全場叫囂。
阿晴個樣好惘然，但係之後都對住阿言微一微笑，有機嘅有機嘅！
阿言一上到場，就好似一隻沉睡嘅獅子甦醒過來，向住對手流露出最原始、最兇狠嘅眼神，誓要向對方作出最殘酷嘅殺戮！
下半場開始由對方開波，佢地貫徹以三人為攻擊中心嘅作戰模式。
「阿俊睇實阿圖，阿月mark住阿峰。等我黎會一會呢個阿Roy。」阿言發號施令。
阿roy見到其餘2個都俾我地隊mark住，個人霎時亂一亂就亂傳咗個波出去，阿言把握機會截住咗個傳球，然後發揮獅子嘅本能跑去三分區，入咗球靚絕嘅3分。
「好！」阿王忍唔住爆咗句，然後全場隨之吶喊助威。
阿Roy竟然喺到責怪佢地隊友，令到佢地士氣一度低落。
到阿roy攞到波，佢向住阿言衝過去。
「黎爵言，我唔怕你架！」佢好似發咗癲咁。
「垃圾即係垃圾！」
阿言一個瞬步，單手截住阿Roy個波，阿Roy剎唔切制，成個人仆咗落地下，引到全場大笑。
阿言傳咗個波俾我，對方根本回唔切防，眼白白又送多2分俾我地，我地終於反超前。
「快啲傳俾我！」對方球員開波果陣，阿Roy大嗌，可惜連對方都唔聽佢支笛，轉而傳俾阿圖。
呢個係徹底瓦解佢地攻勢嘅好時機，我地當然唔放過。透過人盯人嘅方法，暫時阻住佢地嘅攻勢。
點之阿Roy竟然搶咗佢隊友嘅波。
「你玩完啦。」阿言諗住封阻呢球本應該手到拿來，點知阿Roy竟然將成個波掟落阿言個肚，阿言即刻痛到起唔到身。
阿Roy執翻個波再沖上籃底上籃。當然喺之前佢已經俾人吹罰兼趕出場。
「阿言，你冇野呀？」我地即刻圍住佢。
「痴線架你？收買人命呀？」衝動嘅阿豪爭啲去打阿Roy，好睇俾阿言截住咗。
「行開，行開呀！」一把女聲響起而且推開曬我地沖咗上黎。
「你冇事呀麻？！」係阿晴。
「梗係...冇事啦！我話過要贏咗場波...同埋你加麻。」阿言答。
「白痴！傻仔！痴線佬！我翻啦我翻啦！我翻黎你身邊啦！你快啲去抖下啦！」果陣阿晴已經喊到孟姜女咁。
「唔...得！我仲要打！我應承過佢地要帶佢地贏冠軍！」
嘩屌，好彩我唔係女人，唔係阿晴實多個情敵，呢刻阿言真係型到出曬汁。
我知道都冇人阻到佢。於是就講：「上啦兄弟！」
冇咗阿Roy阻頭阻勢，的確容易咗好多。但係打籃球重點唔係雙方實力有幾懸殊，而係過程中得到啲咩。
呢場比賽入面我地最後都得到一個公平嘅較量，令到個比賽更加有意義。
最後，我地以22:21，以一分之差，打贏咗C班，獲得咗冠軍！
「掂呀！A班無敵呀！！」阿王沖埋黎攬實我地。
「終於實現到我後生嘅夢。」原來阿王都想拎次冠軍，可能命運嘅原因，令佢一直做唔到。
當然，最大贏家梗係我地言哥啦，呢場野佢拎曬彩，而且..嘻嘻嘻。
「以後唔好再離開我！」佢攬實阿晴，好情深咁講。
「唔離啦，邊捨得！」阿晴講。
咁輸家呢？你地覺得係C班，實在太狂妄啦你地。
你地邊估到，其實我先係真正嘅大輸家，輸到爭啲連個兄弟都冇埋。
呢part可能你地睇得唔太明 上面幾句係黎明啲和記廣告對白，
我本身就好鬼鐘意黎明，所以想插一啲情節滿足自己
https://www.youtube.com/playlist?list=PLoXDYYock7F0MrG9Bb4IUK2IpLoIYnaV2
篇文節錄咗93同98年嘅 有興趣可以睇下其他