我只不過喺自修室溫書，點知比我遇番佢。: <十九>抹汗

「咁我咪係一支定海神針，哈哈。」

雖然我懶係回得好輕鬆咁，其實係因為唔想覆得咁曖昧。我唔肯定我對佢嘅感覺係點，所以唔想行到去呢步。

我同小涼都係識得兩個幾月，聽落或者唔算長，其實又差唔多日日都見，分分鐘仲見得多過自己老豆。

但係我對佢了解其實仍然唔太多，可能我對佢係有啲好感，不過你問我鐘意佢啲咩，我又答唔到。佢有啲咩喜好，我亦唔太知。

如果貿貿然同佢玩曖昧，我怕會令到我地嘅關係變質，若果我之後發覺其實對佢嘅好感只係錯覺，令佢誤會咁點？若果我真係鐘意佢，然而只係我自己一廂情願，咁我又點？



所以都係睇定啲，以而加我地呢個階段，其實作為朋友佢真係好稱職，我都唔想冇咗呢個朋友。

而接下來，可能會引發一個連劉華都好難拆得掂嘅炸彈。

「今日揀蟀，參加黎緊嘅籃球比賽！」阿言喺PE堂講。

唔好問我點解又係籃球比賽，個個故都要加啲籃球比賽「啞」字數。有得揀我都唔想玩，如果我知道之後會令我咁煩嘅話。

最後結果出到黎，我、阿言、阿星、阿月同我地班嘅三分王龍嘉俊做到正選，阿豪同阿揚係後備。



初賽我地係對B班，咁都好啲，唔洗對住個阿ROY住。等決賽先慢慢打爆條柒頭。

決定咗人選之後，即日放學阿王就召集曬我地去到學校後山個球場練波。佢由小學開始打籃球打到而加30歲，經驗都算十分豐富，所以順里成章做埋我地教練。

「上次我地已經咁威，今次一定要再下一城！」

「好！」大家都好有鬥心。

估唔到，一開始練波，阿王已經魔鬼教練上身，比起平時教書chur得我地仲勁，都咪話唔吃力。到操完之後個個都散曬咁滯。



「辛苦啦，過黎飲啲野啦。」子妮同詠詩捧住啲野飲過黎，小霖都同埋佢地一齊黎。

「你地要努力呀，雖然你地第一場係對B班，佢地多數讀書人多，運動唔太叻，應該好易搞掂，但係決賽多數係對住C班，佢地正選有3個都係籃球隊，但係我地得阿俊同阿
星打過籃球隊，所以一定要操好啲先夠打。」阿王講。

「超，果個阿ROY之麻，阿俊同阿言聯手都搞得掂啦！」阿豪講。睇黎佢仲未下啖氣。

「都唔係架，一個阿ROY我地對付到，但係佢同另外2個籃球隊隊友李至圖同譚偉峰合作就棘手好多。」阿俊講。

呢個阿俊係我地班籃球技術最高嘅，曾經喺學界入面一場拎到個人18分成績，係個超難搞嘅對手。

「冇錯啦，總之唔好輕敵。」阿言再補充，佢永遠都係咁保守。
.
.



「你咁晏仲喺到嘅？」我地散咗之後，我就同小霖番屋企。

「頭先當完值撞到子妮佢地咪同佢地一齊睇你地打波囉。」

行行下佢突然停咗係到搵野。咁我就企係到用電話等佢。

突然間有人喺到搞我額頭，我回過神望一望，原來佢係到幫我抹汗。

「咁大個人有汗都唔識抹架咩？」佢冷冷地說。(呢個形容真係要用書面語先夠貼切XD)

「少少唔梗要啦。」

「一陣撘巴士冷親咁點？咁多年都仲係咁。」

時空突然好似翻咗去5年班，我果陣報咗會所啲籃球暑期班，果陣阿媽會帶埋小霖黎接我，之後就去食下午茶。



阿媽每次見我成身汗都話幫我抹汗，但係我總係周圍跑黎跑去。

但係有一次小霖可能知我又會跑黎跑去，等我出到黎果陣就行過黎幫我抹汗。

「抹咗汗就唔好再走黎走去啦。」

唔知點解我又真係咁聽話，乖乖地同佢地行去食下午茶。

「真係得你先治到佢架炸。」阿媽都冇我咁好氣。

此情此境確實似曾相識，唔知係咪出於懷念，我竟然講咗一句：「有你幫我抹咪得囉。」

佢面紅一紅，之後答：「你就想！」