我只不過喺自修室溫書，點知比我遇番佢。: <十七>垃圾先會撻朵

「點呀，考成點？」小涼whatsapp我。

「上堂偷用whatsapp？」我地第一次喺翻緊學whatsapp。

「老師唔理架，淨係喺到教教教。」

「噢..過得去啦，不過信心唔太大，好多都唔肯定。唔想禮拜六翻去補課！」

「俾啲信心自己啦，你一定得架！考得好記得報答我！」



「你想我點報答呀？我唔賣身架！」

「唔稀罕囉！到時話你知啦。」

「車，神神秘秘咁。」

之後佢就冇覆到，可能要聽書。

放學之後，小霖行過黎問我：「今日我唔洗當值。一齊走？」



「但係我同阿月佢地落樓下打陣波，你一係等埋我？」

「嗯..都得嘅，咁我留喺到溫陣書先，你走得同我講啦。」

落到籃球場，佢地已經喺到射緊波。

「嘩屌，咁快開唔等我！」我即刻衝過去。

放學後嘅籃球場，係唔少男仔嘅天堂，我地喺果到揮灑熱血，揮灑青春，揮灑汗水，可以同班波友打一陣波已經好開心。完咗學習生涯，打飛機都未必得閒，更加唔好講同班兄弟一齊打波，所以我好珍惜同佢地打波嘅日子。



「頂，又炒咗粉。」阿豪射失咗球三分，係到仰天長屌。

「咁屎波，去玩籃球機啦，阻住曬！」係阿ROY..

呢排佢同阿晴一齊嘅傳聞吹得好勁。佢應該特登黎挑釁我地，特別係阿言，藉此施下馬威。

「你講咩呀！挑機呃。」阿豪最受唔起挑釁，即場爆seed。典型MK仔對白。

「你有資格咩？」

「黎爵言，你同我打！」阿ROY指名同阿言打。

「你又有資格咩？」阿言好淡定咁講。

「我話曬都係A grade隊..」



「收皮啦，走啦我地。」佢未講完就俾阿言截停。

「垃圾先會撻朵。」佢走之前就留低咗呢句。瀟灑！

走之前我先突然記得要搵番小霖，於是就叫佢地走先。

我上到課室，唔見咗小霖，連書包都冇埋，咁應該走咗啦。

到我行到去學校門口先見佢企咗喺到等我。

「你去咗邊呀？」我問佢。

「我見都差唔多夠鐘，咪拎埋書包落黎等你，順便買咗支水俾你，驚你口乾嘛。」



「點知買完你地已經唔見曬，我見到阿月佢地先知你上去搵我咪係到等你囉。」

「咁細心？！咁走啦我地！我好肚餓啦。」

行去巴士站途中，突然諗起頭先嘅事，於是我就問小霖，

「你同阿晴咁熟，你知唔知阿晴同阿Roy單野係真定假？」

「唔知呀，我地都冇講過呢件事。」

「唉，阿晴同阿言本身就好襯，一個太大男人，另一個就不屈係佢權威之下，佢根本就係最治到阿言嘅人，可惜又搞成咁。」

「如果阿言果陣唔係咁衝動，肯聽阿晴解釋，根本就唔會分手。」小霖講。

「阿晴又優柔寡斷，肯一早拒絕個男仔，阿言又點會誤會？仲要應承同個男仔食飯，先有機會俾個男仔大做文章。」



「不過自從上次星矢吧單野，我肯定阿言仲未放低阿晴，只係佢唔講。」

「人地啲野我地邊理得咁多呀，而加阿晴肯放低阿言同第二個發展都係好事呀。」

「邊到好呀，個阿Roy咁花FIT，恃住自己識打波就周圍食女。頭先先俾阿言挫一挫佢銳氣。」

「你叫阿晴小心啲條友添呀！」我補充。

「係啦係啦，知你重視朋友啦。」佢苦笑。

「 呃，串我咁話啦喎。」
 
我地就係咁樣吵吵鬧鬧咁行到去巴士站，上到車之後，我就收到小涼嘅來電。



「喂，小涼？」

「嗚嗚，阿楓，我喺醫院呀！」