我只不過喺自修室溫書，點知比我遇番佢。: <九>往事

「好多人可能成個中學生涯都拍唔到一次拖，又有啲可能拍先覺得係一段黑歷史。但係我比較好彩，我中二果陣識到一個女仔，佢係中二先轉到我果班。因為鄰座關係，我地好快就好熟絡，仲經常唔經唔覺就會有啲曖昧。但係直至中三聖誕節我先同佢表白。」我將呢段唔想再提嘅往事一一話俾小涼聽。

「同佢一齊果半年，我有好多前所未有嘅感覺。佢好靚，引黎好多狂風浪蝶。佢同其他男仔傾計，我試到咩叫呷醋，好彩嘅係佢好堅決拒絕其他男仔。我地行街果陣試到咩叫甜蜜，佢病果陣我試到咩叫肉赤。」

「可惜嘅係，因為佢家庭關係，我地唔可以將戀情公開，唔可以好光明正大咁拍一次拖。身邊都係得阿言佢地..即係我幾個死黨知道。但係我地雙方都唔介意。直至..」

「有一次我同阿言阿月報咗出面嘅歌唱比賽，我地唱咗首《及時擁抱》。我希望透過呢首歌表達對佢嘅愛意。佢應承咗我佢會黎，但係唔知點解佢最後冇出現到。」

「比完賽之後先接到佢屋企人電話，原來佢喺黎嘅途中遇到車禍，昏迷前係咁嗌住我個名，佢父母係佢電話搵到我聯絡方法先通知到我。我去到醫院之後同佢父母講出我地嘅關係，佢老豆好嬲，仲唔比我見佢，係我地拉扯期間醫生話佢受到細菌感染，之後就….」



「好老套呀可？係咪覺得自己睇緊大台啲劇？原來人生如戲，戲如人生係真嘅。」

「所以你就一直咁自責？」小涼問。

「根本就係我嘅錯，係我累咗佢，本應佢會有個好好嘅前途，佢地一家三口會好開心咁生活！」我愈講就愈激動。

「佢嘅死令到你唔敢再唱歌，直至呢次比賽..」

「冇錯呀 ！我一唱歌就會諗番起佢呀！」唔知點解講到有啲心抽搐咁。



雖然我同巴渣妹識咁唔係好耐，但係對佢又有一種無名嘅信任，令我好想講曬啲野比佢知，當發泄又好，傾訴又好。

「你一個人自責就大曬呀？！你可唔可以顧下其他人呀！」

嗯?!講野嘅唔係小涼。我地四周圍望，就見到小霖企咗係到。

「點解你..知我喺到？」

「你知唔知阿言佢地為咗你呢件事做咗幾多野？」



「每次一到學校sing-con佢地就會好戒備，好驚你見到台上表演會觸景傷情，」

「係件事發生之後佢地好盡力咁係學校唔俾其他同學提起天蕊，佢地又好怕你聽到佢個名會做傻事，」天蕊就係我女朋友。

「直至今次個比賽，佢地知道咁落去唔係辦法先一定要你一齊參加比賽，佢地冒住你會嬲佢地，怪佢地嘅風險都要逼你！你估佢地好過癮呀？」

「仲有我呀，你知唔知我幾擔心你呀？你愈冷靜我就愈驚，驚你諗埋一邊呀，你知唔知你好自私呀？」小霖一邊講，眼淚就不斷係到流。我都從未見過佢咁激動。

「但係我真係好對唔住佢啊嘛！」我都忍唔住，伏咗喺小霖膊頭喊。

唔知幾耐之後，小霖佢遞咗張紙巾俾我再開口講：「你當係為咗我，為咗阿言佢地，試下忘記天蕊啦好冇？」

「我嘗試下啦..係喎，你點知我係到？」

「我知打你電話你都唔會聽架啦，所以我打去你屋企問auntie咪搵到你。好啦，翻屋企啦。」



佢真係無時無刻頭腦都咁清醒架喎。

「咦！巴渣妹呢？」

「佢走咗啦！包紙巾都係佢比我嘅。你幾時同人咁熟架？」

「鬼同佢熟呀，唔好講佢啦，走啦。」講完之後唔知點解個心有啲唔舒服。