🍸所有嘢，都係由一杯Long Island開始。

11：30 p.m.

呼，返咗9個鐘頭工，終於收工。

11：35 p.m.

幾經辛苦搵到部存鈔機，

入埋錢就撘得巴士返屋企啦。





11：36 p.m.

「原來你是 我最想留住的幸運」

屏幕顯示：關翊樂

當我一聽到「小幸運」嘅鈴聲，已經驚到心都離一離。

見埋「關翊樂」個名喺個顯示屏出現嗰下，直頭係嚇到眼都突埋。





我呆咗3秒，諗緊究竟聽唔聽好？

個腦即刻快速運轉緊一個問題，
1
究竟佢搵我做咩？

唔通係因為嗰件事？！

如果係因為嗰件事，我唔想聽佢電話喎……





雖然我把口係咁講，

但係身體好誠實地手都震埋咁聽佢電話……

「喂？」

「收咗工啦喎，妳依家有無嘢做啊？」

「無啊，我準備行去巴士站撘車返屋企囉……」

「咁啱晒啦，嚟酒吧喥搵我啦，我有嘢同妳傾。」

「吓？我無嘢同你傾喎，我趕住返屋企，下次先再同你飲啦。」

「我唔理妳，總之我有嘢同妳傾，妳依家即刻上嚟酒吧搵我，如果唔係妳知後果會係點。」





「喂啊……」

「係咁啦，等陣見，拜拜！」

11：40 p.m.

我懷住極度忐忑不安同驚慌嘅心情，

萬分不情願咁，

以媲美蝸牛行路嘅速度，

慢慢行去我哋嘅老地方。