個晚訓着之後，我穿越左去第二個世界。: 第四章

「 我地同校架，我係學生會主席。」嚴菊幫我抹掉頭髮上嘅灰塵。

「 係？唔好意思啊，我個人比較摺，都冇咩留意學校嘅事。」我拍一拍衣服上面沾染左嘅泥土。

「 第一次見面係呢度，真係有啲唔好意思。」嚴菊向我腼腆地笑一笑。

「 係呢，你又會知道我個名嘅？我呢啲小人物應該唔岀眾架？」雖然嚴菊係學生會主席，但全校有咁多人，我同佢又素未謀面，照計係唔會講得岀我個名。

「 你的確係。但我對你嘅認識同學校無關，純粹係私人原因。不過，我冇打算而家話你知，等我地再熟啲先啦。」嚴菊向我露岀孩子氣嘅笑容。





原本我只係打算簡單寒暄兩句，但眼前嘅少女似乎對我好有興趣。奇怪，我甚至有啲懷疑佢嘅性取向。

「 睇黎你仲有未完成嘅事，我唔打擾你啦。6792 1083，call我啊。」嚴菊回頭向我揮揮手。

我真係第一次見到有人係墳場笑得咁開心。如果唔係早有聽聞過學生會主席嘅大名，我真係會以為自己日光日白撞鬼。

「 天靈，我下次再黎睇你啊。」我向天靈嘅墓碑深深地鞠躬。

離開之前，我再仔細地望一望周圍。再冇任何人岀黎同我打招呼，睇黎嚴菊真係走左。講真，頭先真係有啲俾佢嚇一嚇。





我轉車去翻市區，漫無目的地係旺角嘅街頭遊蘯。好鬱悶，每年嘅今日都係咁，絲毫提唔起精神。

柔風唔係屋企，我唔想自己一個係屋企亂諗。我靜靜地停係西洋菜街，同周圍熱鬧嘅氣氛格格不入。

「 家姐？」耳邊傳來雙兒輕聲嘅呼喚。

「 我竟然會係旺角街頭撞到家姐！我聽爸爸講，家姐你一向都唔中意咁嘈嘅地方架？」雙兒用稚氣嘅臉蛋靠近我。

好唔自然，我第一次同雙兒有咁親近嘅接觸。況且，我一向都同佢保持距離。





「 我啱啱去完樓上書店買書，真係平好多架。係呢，你食左午飯未？」雙兒無等候我嘅回答，一個勁兒地拉住我。

「 難得可以同家姐一齊食，當然要去間高質啲嘅。」雙兒帶我去到朗豪坊隔離嘅一幢大廈。

「 呢間一定啱你架，家姐。我上年就係係呢度慶祝生日架啦。」雙兒興奮地向我介紹。

生日。雙兒嘅生日Party，我一次都冇參與過。以前因爲爸爸嘅緣故，我刻意同雙兒疏離。而家心病冇左，我都應該重新接受雙兒。

「 雙兒係幾時生日？」我向雙兒微微一笑。

「 九月一。」

「 有冇乜嘢想要？我⋯⋯家姐買俾你。」我唔好意思地望向別處。

家姐，我真係第一次咁樣自稱。





「 家⋯⋯家姐？」雙兒睜大雙眼。

「 呢個已經係我最好嘅生日禮物啦，多謝家姐！」雙兒一把攬住我。

我冇諗過，原來呢個孩子咁中意我。

「 今年係我第一次同你慶祝生日，點可以冇禮物？」我伸岀手擦掉雙兒嘅淚水。

「 如果真係要揀，都有一樣嘅。我希望可以留係家姐屋企住，直到開學。」雙兒期待地望住我。

的確，每次雙兒翻黎香港都係住酒店。爸爸知道我嘅性格不饒人，係絕對唔會接受雙兒。所以，雙兒一次都未上過我屋企。

「 好，你今晚翻酒店同阿姨講聲，聽朝我黎酒店接你。」