個晚訓着之後，我穿越左去第二個世界。: 第一章

「 樂生表姐，舅父下星期會翻黎香港。你會唔會去接佢機？」柔風放低手上嘅叉，抬起頭望住我。

「 係程生，唔係樂生。蔣樂生已經唔係呢個世界上。」我夾起碟上面嘅煙肉，並沒有望向柔風。

「 程生又好，蔣樂生都好，都係我嘅好表姐！表姐，你就唔可以放過人地，放過自己，放低以前嘅事咩？件事都過左咁耐，個陣我地仲細唔識諗，但而家唔同架啦。」 柔風捉緊我攞住既筷子，倔強嘅眼神尤如利刃般刺入我嘅心。

「 唔可以。你明知我點解要改名，點解全家移民左去台灣，我都堅持要留係香港架。」 我撥開柔風既手。

「 係因為舅母。因為你唔能夠放低佢，所以要舅父受罪。」





我低下頭，唔願意再同柔風有眼神接觸。佢講得啱，我憎爸爸只係想用第二個方法黎懲罰自己。我無辦法接受再婚嘅爸爸，無辦法擁有第二個家庭。

我嘅媽媽，係我小四個年過左生。交通意外，送院後不治。個陣時嘅我只係默默咁望住病床上蓋住白布嘅媽媽，冇仼何反應，冇講半句說話。四年後，爸爸認識左王小姐，並有結婚嘅打算。二人嘅婚禮，我並沒有去。王小姐係失婚婦人，育有一女。爸爸希望我能夠同妹妹好好相處。但事實係，我一眼都冇望過個個所謂嘅妹妹，亦唔想同佢扯上關係。我係爸爸同媽媽嘅獨生女，以前係，將來都會係。

但爸爸並冇咁嘅諗法，共同守護呢個家嘅承諾，佢做唔到。所以，我去左改名。唔再跟爸爸姓蔣，而係改為媽媽嘅姓。記憶會隨住時間嘅洗禮而凋淡，但名字唔會。我希望可以永遠記住媽媽嘅溫柔，媽媽嘅愛，媽媽存在過嘅痕跡。

「 表姐，唔好再被過去綁住自己。你需要一個爸爸，而你爸爸都需要你。」柔風執拾枱上面嘅餐具，頭也不回地行入廚房。

而你爸爸都需要你。





真係需要我咩？佢而家已經有更好嘅生活，有一個新嘅家庭。對佢黎講，我根本就可有可無。但係，可能佢一直都好掛住我。只係⋯⋯佢唔敢同我講？

頭好痛，好似要裂開咁。

而你爸爸都需要你。

唔好，唔好再講。我唔想聽落去。頭好痛，唔得，要休息一下。

我爬上床，嘗試平靜落黎。吸氣、呼氣、吸氣⋯⋯程生，你做得好好。





可能真係太攰，個頭又太痛，我迷迷糊糊咁合上雙目。

咦，點解好似有d野撩住我塊臉咁嘅？ 好痕，我掃一掃塊臉。唔通係柔風爬左上黎，想睇下我有冇事？

我緩緩睜開雙眼，映入眼簾嘅係一頭濃密嘅黑髮。

「 柔風，我冇事阿。」我拍一拍「 柔風 」嘅頭髮。

等等先，好似有啲奇怪。但我一時之間又講唔岀邊度奇怪。

「 嗯⋯⋯」黑髮抬起頭望住我。

我地四目交投。

「 啊！！！！！！！！！！」




「 啊！！！！！！！！！！」

點解會有一個男仔訓係我隔離架？ 發生咩事啊？

我即刻跳起身，係床上面扯張被岀黎遮住自己。

對方好似對我嘅反應始料不及，呆左咁望住我。

「 你係邊個啊？做乜擅闖民居啊？柔風呢？」我睥住眼前呢個長得五官清秀嘅男仔。

「 邊個柔風？呢度係我屋企，張床係我嘅，張被係我嘅，你係邊位？」少年不解咁望住我。

我望一望呢間房嘅佈置。的確，雖然佈局同我間房差唔多，但擺放嘅並唔係屬於我嘅擺設。

咁點解我會係度？明明我頭先只係係自己張床度休息，冇理由會去左其他地方架。





唔通⋯⋯呢個係夢？ 呢度嘅所有野，甚至眼前嘅少年，都係我虛構岀黎嘅？