我突然間多咗個妹: 認真你就...
Priscilla，我真係唔應該對你咁好，你send啲咁嘅相俾Beverly做乜呀，你係咪想拆散我同Beverly呀...我今次瀨嘢喇...
『Vincent，你琴晚同Priscilla究竟做過咩嚟呀!??
點解你哋會瞓喺同一張床架?同埋Priscilla做咩冇着衫架!?點解佢塊面紅晒架?
你自己睇下佢寫咗啲咩?』
(琴晚呀信趁我屋企冇人嗰陣偷偷哋走上我度，抱我上床仲夾硬除咗我件衫，又搵嘢喺我後面磨下磨下，整到我叫得好大聲呀，佢仲叫我瞓好啲添呀，好衰呀佢😏)
乜...乜叉嘢環境呀而家...危急情況，唔好嘥時間打字喇，直接打俾佢。
「Beverly，你冷靜啲聽我解釋先，好唔好，成件事好大誤會!!!你千奇唔好聽Priscilla片面之詞，雖然佢講嘅嘢全部都有發生過，但係，但係!!!唔係你諗到嘅咁樣，OK?」
「Vincent，趁我未扭你耳仔之前你好快啲解釋你哋琴晚做過啲咩嚟!?」死喇...唔聽Beverly把聲都唔知原來佢比我想像中嬲咁多，唉，都唔知佢仲要嬲我幾耐。
「琴晚，係Priscilla打電話嚟同我講，佢覺得好辛苦，我聽佢把聲覺得佢好唔妥，先走咗去佢屋企去照顧佢，至於我抱佢上床係佢冇力行，我先孭佢架...仲有佢嗰陣成身汗，我梗係要幫佢抹啦，如果唔係佢會病得越嚟越犀利...之後嗰兩句係我唔記得開熱水，整到條毛巾太凍先會一掂到佢令到佢叫出聲，同埋佢病咗當然要瞓好啲啦，咪佢點休息呀...」
當然過程中Beverly打斷咗我無數次啦，大概我每講一句佢就話我講大話呀，掩釋呀諸如此類啦...結果我淨係將琴晚發生嘅事一五一十咁話俾Beverly聽，都搞咗成半個鐘...
「點解你唔琴晚同我講呀，我琴晚完全搵唔到你喎...」
「咁我諗住叉電嗰陣Priscilla打嚟吖嘛，我咪一路喺去佢屋企嗰段路上面同佢講嘢囉，我驚佢會隨時暈低呀...咁去到佢嗰度，已經得返幾%電，你梗係搵我唔到啦...」
「點解Priscilla病咗係你照顧佢架，佢屋企人呢?」
「我...我咪係佢屋企人囉!!哈...」
「咁...咁我都係...」吓...哦...因為佢之前講過佢遲啲都會係我屋企人，我頂...「Priscilla都係我嘅好朋友，我都會擔心佢架...」
「哦...咁...咁下次佢有咩頭暈身慶我第一時間通知返你...唉你唔好扭計啦，我聽日陪你出街囉...好冇?」
唉，你以為出街拍拖又有得寫好多嘢?冇...因為我要當面同佢重新解釋過成件事...「你原諒我啦Beverly，我哋好安份架...唔會搞出啲咩...」
「其實我唔介意你哋一齊做啲咩...但係Vincent你可唔可以話返俾我聽你哋一齊做過啲咩啫...」喂，我琴日夠有講返俾你聽啦，你咪又係發晒脾氣咁...但係講到底都係我問題嘅，邊有女仔鍾意自己男朋友對住另一個女仔多過對住自己架...
「對唔住呀Beverly，明明你先係我女朋友但係我就同佢咁親密，你一定成日呷醋勒，我應承你，以後唔會令你咁不安，OK?錫返。」
終於，終於擺平咗件事...你以為啦!!!一返返學，我一入門口就成班友圍住我，仲有啲係我完全冇傾過計嘅同學...
「嘩，唔聲唔聲，原來呀信你同Priscilla已經發展到咁嗱?你爽啦，咁正嘅女仔你都食到...妒忌死我哋班男仔喇...」所以呢位同學你叫咩名?我同你同班架?
後面亦都傳嚟一堆八婆嘅討論聲音，當然佢哋從來都唔會理人感受，我就聽到晒佢哋講嘅嘢...「佢憑咩呀...肯定呀，係趁人哋分手嗰陣乘人之危啦...」總之就係一堆難聽嘅說話，我聽到真係好嬲，你哋同Priscilla係朋友嚟架喎...你話我都好吖...但係你咁樣講嘢其實咪仲唔尊重Priscilla，講到佢好似係一個唔識諗嘢嘅人咁...我差啲就忍唔住鬧佢哋架喇，但係我知到呢個係圈套，如果我反駁佢哋，佢哋就會多咗一堆正當理由鬧我...所以我忍住冇出到聲。
Toby喺呢個時候拉咗我埋去佢個位度...「信，搞乜春呀你...你有女朋友架喎，你做咩會同Priscilla搞埋啲咁嘅嘢架!?」
「師兄，你唔係唔知Priscilla最鍾意玩嘢架咩?你咁都信?我一陣先同你解釋...」
我返返自己個位，Priscilla同Beverly望落就同平時一樣，佢哋好似冇俾呢件事影響到咁喎...但係係Priscilla po上Whatsapp佪班group架...你搞到Beverly呀!!!
「Priscilla，好好玩呀?好彩我同Beverly平時夠低調...冇人知道我哋一齊緊啫，如果唔係我仲唔俾人小到上天花板?」「Beverly，我去同返佢哋講你先係我女朋友，你唔洗擔心。」
「唔好啦Vincent，你越解釋佢哋咪越多話題...我諗...我諗過一陣就會冇嘢架喇...」
班主任呢個時候入嚟﹐「喂喂喂，咩事咁嘈，坐返好喇吓大家，打咗鐘架喇!」
到咗小息，Toby即刻過咗嚟問我到底搞邊科，但係唔知點解身邊多咗四個男仔同女仔過嚟湊熱鬧，搞到我冇機會同Toby解釋...最重要嘅係...佢哋搞到我嘅校園生活亂晒呀!
自從嗰件事之後，班友就成日痴埋嚟，八婆堆裏面其中兩個，係Angela同Pinky，仲有兩個MK仔，Chris同埋Paul。你估我唔知佢哋想點呀?女嘅就肯定係嚟同Priscilla洗腦叫佢唔好同我一齊啦，事實係我根本冇同過佢一齊囉OK?你兩個死MK唔好過嚟溝Beverly呀，你夠膽掂佢我就打柒你哋，但係我、Priscilla、Beverly有啲難應付呢四條友，我叫埋Toby一齊埋堆先可以抗衡到佢哋。呢個情況持續咗好一段時間...最終，我嘅朋友圈由四個人變成為八個人...睇嚟嚟緊呢四個月有排我捱...Priscilla真係多謝你攪屎棍，俾全班知道我去咗你度，仲要影咗張咁令人誤會嘅相，你究竟諗乜架...