我突然間多咗個妹: 重新開始，抑或終結

以前，我憧憬住動漫裏面嘅主人公過住嗰種不平凡嘅校園生活，每日都有唔同經歷，但係...啱啱經歷完一個咁迂迴曲折﹐真係動漫先會發生嘅劇情，我先發現，呢種不平凡﹐複雜嘅校園生活一啲都唔美好，呢種一啲都唔知我想要嘅生活...我開始想改變，好想變得更加成熟，我唔想再發生呢種事，我唔想因為唔夠坦白﹐種種誤會而有所遺憾﹐後悔...
我瞓喺張床度...一路聽住歌...一路諗住種種如果...突然，電話播住陳奕迅嘅不來也不去...呢首歌，就好似寫住我同Priscilla嘅經歷咁...
   即使一生多出一根刺 沒有刺痛 別要知
   就當共你　有劇情沒有故事
   如烟　因給你遞過火
   如火　卻也沒熔掉我
   回望最初　當喪失是得着可不可
   可痛若驪歌　樂如兒歌
   像你沒來過　沒去過
有劇情沒有故事。雖然我同佢之間有好多特別嘅經歷，一齊喺同一條時間線上面行走，但係，我哋根本就冇結局可言。




如烟 因給你遞過火。因為遞過火，所以得烟，但係烟好虛無縹緲，亦轉瞬即逝，唔及時捉緊，就會好易錯過咗...
如火 卻也沒熔掉我。雖然Priscilla對我嘅愛如火般熾熱，但係都冇辦法熔掉我，因為我曾經只係當佢係呀妹，冇理解到佢所講嘅鍾意係咩意思。
當喪失是得着可不可。明我就明，但係要我將呢段感情喪失轉化做得着-我嘅成長，又係咪講咁易?
可痛若驪歌　樂如兒歌。既然我可以每日痛哭，亦都可以當係成長嘅經過，我點解唔好好選擇?
像你沒來過　沒去過。不如就當你從來冇愛過我，我亦冇同你進一步發展，好好放低。
我同Priscilla係時候重新開始，做返普通嘅兄妹...唔再抱有超越關係嘅感情...
新年假結束，我嘅生活亦都打回原形，變返普通嘅校園生活，上堂同Beverly傾計，有時Priscilla會搭嗲，Toby關心我同佢兩個嘅關係，晏晝食Beverly煮嘅飯，放學送Beverly返屋企，喺屋企同Priscilla Whatsapp同Snapchat。
即使，我選擇咗放低，但係當我望到Priscilla因為我同Beverly相處而失落個樣，我個心就十級痛...如果我要對Priscilla完全死心，係咪要唔好同佢咁親近會比較好...我而家真係唔知應該要點面對Priscilla先好呀...雖然同佢有保持聯絡，但係根本唔係相處緊，只係普通打招呼同講不痛不癢嘅廢話...每次發現同佢講唔到嘢嗰陣，我個心就隱隱作痛...我同佢而家根本就係一種藕斷絲連嘅關係，情況同之前根本冇變過，分分鐘仲衰...我好想用盡每一分每一秒去補償Priscilla...但係我完全搵唔到平衡點，點解同佢親近又怕會繼續鍾意住佢，同佢變得疏遠又會心痛，好驚最終會失去咗佢呢個妹...
究竟我應該同佢變返好似一開咁咁親近，定係同佢斷絕一切關係先好...