我突然間多咗個妹: 春天來臨了嗎?(下)

「Vincent，你可唔可以同我一齊呀...」我點答一個連諗都冇諗過嘅問題呀...我對佢其實都有少少好感，又未去到鍾意，但係機會真係唔係成日有，錯過咗今次可能就冇下一次架喇喎，但我又想用多啲時間陪Priscilla，但係如果我拒絕咗佢...佢一定會好傷心架，花咗咁心機嚟關心我而得唔到回報。
「你...你俾啲時間我諗下先啦...」
「嗯...好呀...」
「係時候返去化妝同換衫準備喇...」
「哦...嗯...」死啦，好尷尬呀而家，會唔會影響到一陣嘅表現架...

「Vincent...」
「係...係!!!」
「你仲唔...化妝嘅...」
「我...我gel埋個頭先。」死喇...我而家連望都唔敢望佢呀。




「Vincent，gel好頭嗱...不如我幫你...幫你化...化妝吖...」
「呃...umm...我啱啱問咗Priscilla，叫佢幫我化妝喇...」
「嗯...咁好啦...」

「Prsicilla，幫我化妝吖。」
「吓，你自己化啦!」
「求下你吖，一定要你幫我化架...」
「你...你講咩呀，咩...咩一定要我幫...幫你化呀...」
「喂...而家唔係怕醜嘅時候呀...」
「你講到咁...正常都會怕醜架啦...」




「快啲啦!」
「得喇，而家咪幫你囉!」
嘩...好耐冇試過咁近距離望住Priscilla喇，平時佢已經好可愛架啦，化咗妝喇之後更加吸引人，我開始心跳加速喇。
「變態，你又喺度諗咩呀...你...你做咩面紅呀...」
「嗯...呃...Priscilla你太可愛喇...」
「你你你你講咩呀!?」
「你唔好手震吖喂，會畫花個妝架!」
「明明就係因為你亂講嘢!衰人!變態!呀信!」嗯?乜呀信都係話人嘅說話嚟架咩?面紅咗嘅Priscilla又咗添上咗一分可愛感。我感覺到，呢一刻，我完完全全咁俾佢攻陷咗。「而家幫你畫眼影，瞇埋眼。」
「哦...」好痕呀...佢隻手貼住咗我塊面呀...原來佢隻手咁滑架...呀!我又喺度諗乜呀!!控制好啲呼吸，呼氣唔好太大力，咪會噴到佢隻手架，好尷尬呀...
「得喇...」咦，點解啱啱有啲嘢掂到我塊面嘅，又唔似係佢隻手喎...我擘大眼之後，淨係見到Priscilla紅都面晒(有睇陳豪就知我唔係講錯)




「唔...唔該」
「準備好未各位，仲有幾team就到我哋喇吓，我上看台睇你哋，好好跟住工作人員指示呀，good show!!」
「GOOD SHOW!!!」
「Priscilla，Beverly，一齊加油，拎個優等獎返嚟俾Missy睇。記住唔洗咁緊張架，因為上到台其實唔會睇到台下嘅人嘅表情架，盡情跳出自己嘅感情就得架喇。」
「嗯!!」

喺台上面短短嘅5分鐘，當中包含住我哋所付出嘅努力，亦記載住我同Priscilla嘅一點一滴。
隨住音樂結束，台下就傳嚟咗熱烈嘅掌聲，我感覺到努力冇白費到，同時得到咗他人嘅認可，實在令我覺得好振奮。
返到後台，Missy叫咗我去一邊。「呀信，你果然好犀利，Priscilla加入咗之後的確冇令團隊變差，你嘅能力真係好高。」
「Missy你過獎喇，其實係Priscilla佢努力先會咁啫，唔關我事。」
「Anyway，今年係我最有信心你哋會攞優嘅一年。」
「多謝Missy，我哋唔會辜負你架。」

「現在頒發乙等獎得獎組別......」「現在頒發甲等獎得獎組別......」好緊張呀，仲未出現我哋嗰組呀，到底係冇獎定係優等獎呢。
「呀信，我好緊張呀!」我捉住咗Priscilla隻手，「我都係呀...」




「現在頒發優等獎得獎組別......XXX中學......」得咗喇!!!三個月嘅努力終於換嚟咗回報喇，太感動喇。「Priscilla，Beverly，我哋得咗喇!」
「係呀!!!」Priscilla同Beverly同時攬住咗我，係幸福(現充)嘅感覺呀!!!
返到大堂嘅時候，我同其他組員仲係非常興奮，佢哋喺度爭取時間自拍嘅時候，我有個問題要解決咗先。
「Vincent，你而家答到我未呀?」
我唔想佢唔開心，所以喺錯嘅地方用錯咗溫柔，我應承咗Beverly。再一次，Beverly攬住咗我，但係，我並冇對佢嘅擁抱作出回應，唔知點解，我好似冇想像中咁開心。簡單啲嚟講，Priscilla做我個妹嗰一刻，我仲開心啲。

「Priscilla，我同咗Beverly一齊呀。」
「真架!?」
「嗯......傻妹，你做咩喊呀，呀哥出pool你洗唔洗感動到咁呀。」我冇意識就攬住咗佢，點知佢好似喊得仲犀利咗。