我突然間多咗個妹: 春天來臨了嗎?(上)

唔長唔短嘅假期終於喺練舞之中度過咗。不過自從嗰次睇到Priscilla個肚之後，佢就好似冇以前咁痴我喇。唉，佢肯定係因為我用嗰種眼神望佢，對我好失望嘞，我到底仲配唔配做佢呀哥...或者我真係未夠成熟，可能結束呢段關係會比較好。
「Priscilla...」
「咩呀?」咦...點解佢笑得咁開心嘅，佢唔係嬲咗我架咩?
「上次...我用咁嘅眼神望你嘅身體，好對唔住...」
「呃...嗯...唔...唔緊要...唔好再講嗰件事喇...」佢dup低咗嗰頭，都唔知係尷尬定唔開心。唉，冇時間理呢樣喇，佢點諗都好，我始終都係做錯咗。
「Priscilla，我覺得我...而家未...」「Priscilla!行得未呀，又話趕時間?」(妖點解次次重要關頭都俾人打斷架)又係Priscilla嗰兩個朋友喎...做咩又睥住我...唔通佢哋知道咗件事?@.@我死得喇...
「我走喇...今晚先傾啦...」
「記得聽日放學有練習呀!」
「嗯...」Priscilla好似真係有心避開我咁喎，但係點解一開始佢又笑得咁開心嘅...呀!!!我完全估唔到佢諗緊乜呀...





我成日就係咁諗住Priscilla而家到底點睇我，返到屋企沖完涼連飯都冇食就攤咗喺張床度。究竟搵唔搵佢好呀?我會唔阻住佢架?佢會唔會嫌我煩架...呀!!!點解我會由同佢攬埋一嚿都覺得冇問題到而家連搵佢嘅勇氣都冇架?結果我諗諗下就咁瞓着咗，最終都係冇搵到佢。

第二日，我上堂連拍佢膊頭同佢打招呼嘅勇氣都冇，今日係自Priscilla成為我呀妹之後第一次成日返學冇同我講過一句說話。
放學之後，我自己匿咗去後面自己練舞，Priscilla就同Beverly練。「喂唔得喇，Priscilla又唔記得點跳喇，Beverly你自己練住先。呀信，過嚟幫幫手教下Priscilla。」「哦。」
如果唔係Missy叫我幫Priscilla練舞，我真係唔知幾時先再會同佢有對話。
我跳咗一次之後叫Priscilla試下跟住跳一次，點知佢跳跳下叉錯腳棘親，差啲跌落地下，我嘅本能反應令我及時扶住咗佢。「Priscilla，你有冇事呀?有冇整親?」
「我冇事...」「你有冇事話?大聲啲吖，聽唔到呀!」「冇事。」「冇事就好喇，如果你扭親比唔到賽點算。嗯?你笑咩呀，有咩咁好笑，你知唔知我好擔心你架?」
「就係因為你關心我我先笑之嘛...」
「吓?乜你唔係嬲咗我咩?你...之前好似成日想避開我咁...」
「吓?我以為係你嗰次俾我打完之後嬲咗我喎...點解嗰次之後你少咗搵我...」




「我...我覺得我用嗰種眼神望你係唔尊重你，所以覺得自己唔配做你呀哥...」
「冇啲咁嘅事呀...呀!我要同你坦白呀。其實係因為嗰次我覺得你係用望女仔而唔係望住個妹嘅眼神望我，我先會一時開心得濟而怕醜咋...」
「咁即係話，你由始之終都冇嬲過我?」
「冇呀...我...我真係好鍾意你架...」
「嗯...我都好鍾意你，你係我呀妹嚟架嘛，我點會唔鍾意你呀，傻妹。」我忍唔住攬住咗佢，佢塊面紅到好似發緊熱咁，真係好可愛。

就喺我以為同Priscilla重修舊好嘅時候，我哋之間嘅裂縫先慢慢開始出現，只係我完全唔知.......