我突然間多咗個妹: 為平凡的校園生活添上新鮮感

「嘩，校長講嘢真係可以再悶啲!」
「唔係呀Toby，佢講啲嘢都幾有道理吖。」
「超，你啲淨係識讀書嘅人梗係唔知咩叫悶革。」
「痴線，我會睇動漫架。係喎，你知唔知就嚟出流浪神差第二季喇。」
「得得得，你繼續講，我返課室先，睇下同邊個一班仲有我同邊個坐。」
「喂等埋!」

我同Toby返到課室之後，幾乎所有人都圍住咗老師張枱，睇下自己同邊個坐。我花咗一段時間先搵到位攝埋去睇張座位表。
好彩坐前面又近窗口位啫，不過隔離嗰個乜水，好似讀五年中學都未聽過咁嘅。再睇下先，坐我前面嘅係......Priscilla Chan?咁熟嘅，好似喺邊度識佢。
「Toby，你同邊個坐呀?」




「玩完喇今次，我同『女神』坐呀!」
「你...你講真架?」我差啲就忍唔住笑出聲。「你到底有幾幸運。兄弟，好好珍惜今次機會，你嘅春天嚟喇。」
「頂你收嗲啦!你正啦，同Priscilla坐，佢咁可愛。」
「坐我前面之嘛。係喎，我識佢架?好似喺邊度聽過佢個名咁?」
「你想曬命有靚女坐前面都唔洗咁呀?」
「認真，真係冇乜印象。」
「呀哥，你跳hip hop自己一個跳架?佢同你都跳咗四年喇喎，咁你都唔記得?不過你知嚟都冇用，唔洗諗住溝人喇，人哋有男朋友，仲拍咗幾年拖。我哋?返屋企打丁算啦。」
「唓，我跳舞又唔係為咗追女仔。」

班會開始，同學陸陸續續坐返去班主任編排嘅座位。就喺呢個時候，眼前一個身影吸引住我。米五左右，天然微微啡色又攣攣地嘅馬尾，希望佢唔好係「貝多芬」，得個背脊睇得順眼啦。佢準備坐低喇!我太想睇下佢個樣喇，唔小心哄得太前，推郁咗張枱撞到佢。不過錯有錯着，佢擰轉咗身。佢對我笑咗下，同我講:「唔好意思呀，可唔可以褪後少少呀，有啲迫。」嗰下真係尷尬死我。不過佢真係好可愛，對眼已經好殺食，笑起上嚟仲有個酒凹，簡直就係我心目中妹妹嘅理想形象呀!!!!原來佢就係Priscilla Chan。