《三角•誌》: 1.0 將軍

(1)
凌晨一點鐘， 兩個麻甩佬坐係中環大排檔，枱上擺咗碟生炒骨同豆腐火腩煲，仲有兩碗白飯，將軍隊住支藍妹，塊面紅到關公咁，唱住Chef Lemon首陳年《我甚麼都不是》，唱來唱去都係個兩句。

「我甚麼都不是，我是二等兵士⋯⋯」將軍人如其名，現役准將，當兵六年，娘娘身邊卻比男朋友更親更重要個位。

「Ash⋯⋯Ashley⋯⋯點解？點解我只可以做更親更重要嘅⋯⋯嘅兵！」顯然，將軍好清楚自己身份，由大學到畢業，畢業到出嚟做嘢，大家嘅身份冇變，娘娘始終係娘娘，兵仔始終係兵仔。

講起Ashley呢個人，一句講晒，係雞係公廁。將軍係我大學roomate，一開始佢就已經對呢條女呵護備至，真係湊囡咁湊，驚死條女有咩三長兩短。

最經典一劑莫過於Year 3個年，條女晨早流流五點幾話失戀想食泰安樓雞蛋仔，將軍二話不說一大早由九龍塘去西灣河等人開門，再送入娘娘係屯門置樂嘅香閨。





最甘嘅係，入到屯門，娘娘話啲雞蛋仔又淋又剩，叫將軍自己食晒佢，我諗個日係將軍來回地獄又折返嘅一朝。唔知大家對香港地圖有幾熟，將軍個日嘅路線係由九龍去港島東再入新界大西北，我諗將軍張八達通嘟得多過公廁個西。

作為佢嘅死黨，我勸完又勸，三勸四勸，將軍都係盡忠職守，緊守崗位。

「將軍你醉啦，送你返去啦！」我伸手入將軍衫袋拎佢銀包拎張五舊水出嚟截的士。將軍已經醉到訓咗係地下，嘴邊仲有啱啱嘔完嘅殘渣。我截咗部紅的，將將軍塞入架車度，個司機皺晒眉頭咁望住我。

「唔該送去沙田第一城，到咗打去呢個電話話送咗戴生返嚟。」我遞咗張寫咗將軍條女電話嘅紙同張五舊水俾個司機，閂埋車門，將的士車牌號碼whatsapp俾將軍條女。

將軍雖然服緊役，但與此同時，有另一隻女兵服緊佢役，條女叫cherry。