聽k-pop: 正文

貼近自己生活狀況既歌？

三個月前，我回復單身。所以我將一堆‘合用'既歌放到呢一個file入面，奉行置之死地而後生既說法--唔傷到最徹底，就唔可能完全放低。而我好中意係搭巴士既時候思考，思考自己待人處事，人際關係，考試等等。而近三個月，每日番學放學搭巴士都係聽住一啲悲傷既歌，滿腦子都係同佢過往刻骨銘心既經歷。我清楚自己再沉溺係呢種愁緒中，真係會癲。
我想解決啊！ 但係可以點，唔通拎舊雪凍左既豆腐跟住走去問佢點解唔要我我有咩唔好再一野掟過去？我真係慶幸自己仲有心情講笑。但係事實上我咁諗完之後更加唔開心，因為我根本唔會忍心掟佢，而佢，亦只會不屑於我既癲婆行為，更可能冷笑住對我講：你捨得殺我咩？

如果可以恨你 全力痛恨你 連遇上亦要躲避 無非想放下你 還是掛念你 。

我情願我狠心 憎你 。

聽住字字敲打心靈既歌詞，我既眼淚不自覺流下。當我發覺既時候，我連忙用衫袖抹去那僅有既眼淚，我好想大喊，好想藉此發洩，但係我唔知點解就係唔得，好辛苦。





三個月後，我暗地裏同自己發誓係放低你之前唔再聽果啲失戀既歌。原因係若果唔刻意去諗起你，就唔會緣情寫景，令到自己一聽到啲情歌就陷入思念既泥濘中。然而我卻唔記得觸景傷情呢回事，我以為自己可以放低你喇，誰不知某日經過影碟店，聽到‘勾手指尾'呢首hit過一拜既熱戀歌，未來得切逃避既腦袋就已經狠狠地將一幕幕同佢既回憶勾起。果種最開心既往事變成不堪回首既回憶既滋味就好似一粒剛入口十分甜既糖瞬間變辣，辣到喊。但係我要忍住，如果唔係我對佢就會死灰復燃，我唔想再係咁啊，頂你個肺！！！

那天我共你勾手指尾 答應過會更愛你
抱緊你就有好天氣。

不知不覺間，‘勾手指尾'切換成一首不知名既韓文歌，k-pop係香港真係無處不在啊…

翌日，我如常地搭巴士番學，如常地坐係上層樓梯第三個位，如常地開手機既音樂播放器，如常地… 唔得！我琴日先發誓唔再聽果啲歌，我唔中意食生菜啊！但係我唔聽呢啲，仲可以聽邊啲？中意既歌手係李聖傑，入呢個file實聽到‘痴心絕對'呢啲足以攻陷我既歌…聽咩好？





無聊咁禁下禁下，禁到首韓文歌，反正都唔知聽咩好，於是我就駐‘耳'聽下。
結果一直聽，聽到落車，發現到唔少k-pop啲歌名都係啲英文詞語，起碼都唔洗聽完首歌都唔曉讀個歌名丫。除左咁之外，啲旋律都幾洗腦，我唔識點講，就係聽完之後會不自覺哼起首歌。仲有，由於我聽唔明啲歌唱咩，我唔會再咁輕易就諗起佢。

너는 어디쯤에 있을까 어떻게 지낼까
나의 그리움이 닿는 곳엔 있을까

我更加開左個file專放k-pop，日日番學放學都以k-pop泥麻醉自己，製造一剎那既快樂。我清楚自己有幾咁懦弱，所以正係識逃避。然而就算聽得幾開心，聽到手舞足蹈都好，靜落泥之後，無盡既失落感隨之湧上心頭，揮之不去。幾曲聽罷，對住咁樣既自己，就會諗：其實我岩岩做緊啲咩？
原來一切只係假裝與逃避，然後？就會好hi hi咁諗番起果啲銳意要逃避，放低既傷心事，感覺比以前更強烈，而且根本冇人幫到我，而我，竟然要靠呢啲我聽唔明既語言去麻醉自己，乞求一瞬即逝既快樂。
我唔識再去搵方法開心喇，我已經好攰…呢家可以做既，就係聽完一首之後再聽，再聽… 我諗呢種係循環既逃避法掛，哈。





或者咁講，逃避可能係放低既過程中重要既一環吧！

從前陪伴你看著戲 今天圍播也避開
忘掉了共你過去便有將來。