「冒險」「生存」《香城之夢》: 奇怪

 
真係學校後山既公園附近…
 
但係有呢間屋仔架咩？
 
我擰轉身，開始退後行兩步，想話睇清楚呢間我地岩岩行出黎既屋。
 
呢間屋既外牆望落有D污蹟，又有D樹纏住，應該有返咁上下歷史。
 
以前我都上過黎呢度幾次，只但係我真係對呢間屋一D印象都無…




 
Elaine：「現實有呢間屋架咩…？」
 
！？連Elaine都覺得有古怪！？
 
我：「你都記得現實好似係無呢間屋？」
 
Elaine：「嗯…因為我有時會經呢邊走，所以都對呢度有D印象，不過呢間屋我就真係…」
 
我：「你話呢間屋會唔會係現實係無既呢…？」




 
Elaine：「都有呢個可能，話哂呢個都係game既世界，可能會多一D現實唔存在既野都未定，頭先個堆水晶已經係一個好例子。」
 
係喎講起D水晶…
 
我：「個度咁多水晶，其實係有乜用架？」
 
Elaine：「呀！！係喎！！」
 
唔知係咪我講錯d乜，Elaine一聽完就衝返入間屋仔入面。




 
我唔知佢想做乜，但係我並無跟埋入去，只係企係出邊等。
 
等左大概十分鐘，佢終於出返黎，仲拎著好多野下。
 
最吸引我既注意力既，莫過於佢手上個兩舊水晶。
 
係我曾經拎上手既黑色水晶，我記得係叫「隱匿水晶」。
 
Elaine：「嗱，快D用左佢先啦。」
 
用左佢？
 
我一邊接過呢塊「隱匿水晶」，一邊睇佢既功用。
 




唔…使用後可令使用者的玩家狀態暫時隱蔽，為期三十日。
 
玩家狀態指既係…
 
Elaine：「喂你仲未用架？」
 
我：「啊，無啊我係度睇緊佢既功能啫，佢指既玩家狀態暫時隱蔽係咩黎？」
 
Elaine：「你望下我先。」
 
唔？
 
佢咁講令我既視線暫時從說明框移開，轉而望住佢。
 
我：「做乜？」




 
Elaine：「我有乜唔同左？」
 
嘩你問埋呢D問題都有既…
 
Elaine：「嘖，唔係你諗既咁呀，望下我頭頂。」
 
頭頂…？咦！！
 
Elaine頭頂個綠圓無左既！？

我：「喂你頭頂無左個個綠圓既！？」
 
Elaine：「唔好咁大聲啦好無？我地唔知附近會唔會其他人架！」
 




呀，一時激動得滯添。
 
我：「咁…呢舊野既用處唔通係…」
 
我刻意壓低自己既聲線，廢事再比佢話。
 
Elaine：「係呀，佢可以隱藏我地作為玩家最大既特徵，即係頭頂上既綠色圓圈。」
 
「用左之後只要我地行事小心d，好似以前咁生活，其他玩家應該唔會發現到我地既身份。」
 
「所以唔好講咁多啦，快D用啦。」
 
唔會比其他玩家發現我地既身份…即係唔會好似今日咁突然有人襲擊我地…
 
「使用隱匿水晶。」




 
我輕輕咁㩒左落去呢個掣上面，然後垂低手，望上天。
 
我頭頂個綠圓都無左了。
 
Elaine：「好啦咁今日就咁啦好唔好？目標都叫做達成左，你Level up左又搵到Stephen。」
 
我：「嗯，只係…好多野好似都黎得太突然…明明只係去查下Stephen係咩一回事，結果居然死左人…」
 
Elaine：「嗯…」
 
就係大家都沉默既時候，有人電話響。
 
唔係我，呢度又無其他人係度，即係電話響既人係Elaine啦。
 
Elaine：「弊啦，原來已經咁晏。」
 
「唔好意思，我行開聽一聽個電話先。」
 
我無任何理由去阻攔佢，所以我做左個手勢，示意佢隨便。
 
過左我諗大概兩分鐘啦，佢終於慢慢行返黎。
 
我：「係咪有乜事？」
 
Elaine：「哦唔係，只係屋企催我返去啫。」
 
我：「咁…我送你返去啦。」
 
Elaine：「哦咁又唔洗送，我住好遠架，我自己返去得架啦。」
 
住好遠…係喎我到而家都唔知佢其實係住邊架添。
 
問唔問埋好呢？大家話哂都係同伴，但佢既事我好似知道好小咁。
 
我：「喂…」
 
咦？人呢？
 
屌，原來已經行左咁遠喇佢。
 
就係我打算叫住佢個一刻，佢居然突然停低，嚇左我一跳。
 
Elaine：「喂你英文名係乜呀？」
 
佢無望過黎，用佢個背脊對住我。
 
我：「Howard。」
 
Elaine：「嗯，多謝你呀Howard。」
 
我：「多謝我？」
 
Elaine：「多謝你今日救左我，學校見喇我地。」
 
佢一講完就自己一個一支箭咁跑左去，完全無等我。
 
救左佢？幾時有呀？
 
佢真係幾奇怪下。