「冒險」「生存」《香城之夢》: 來訪

又要買野呀…？
 
系統叫我可以選擇以手勢叫出界面或者用電話睇下呢個鋪有乜野賣，我選擇左用電話，因為咁順手d。
 
打開個app，林林總總既商品出現係我眼前，分成「武器」，「裝備」同「資訊」三項。
 
咁既然佢叫我買裝備，我都係買返「裝備」啦。
 
一㩒入去「裝備」，就見到好多件避彈衣，無錯係避彈衣，我當堂都嚇左一跳。
 




件件都幾千幾千咁，我邊買得起呀師兄。
 
所以我起勢咁碌，終於比我搵到平野。
 
一對護腕，五十蚊。
 
但我心諗，我買對護腕有乜用？
 
不過無辦法啦，鬼叫係任務咩，照買啦唯有。
 




咁就無左50蚊。
 
「物品已成功添加至您的物品庫。」
 
物品庫呀..？唉一陣先再算，睇下Elaine佢點先。
 
我收起電話，望過去Elaine個邊，見到佢好聚精會神咁㩒緊電話，應該係做緊同我頭先一樣既事。
 
既然係咁，我就唔阻佢啦，由得佢慢慢揀。
 




不過點解講落好似怪怪地咁既，係到底邊度怪呢。
 
Elaine：「有人係附近。」
 
唔？佢講咩話？
 
就係我仲諗緊我頭先諗既野到底有乜問題既時候，佢突然彈左句野出黎，令我一時間唔識反應。
 
Elaine：「對方係男性，Level 6。」
 
Level 6，即係佢頭先句說話係指有玩家係我地附近？
 
我：「你點知架？」
 
Elaine：「我買左情報，顯示最近我既三名玩家，不過顯示到既得兩個，一個係你，而另一個就係呢個Level 6既人。」




 
我：「咁你認為我地應該點做好？」
 
Elaine：「你覺得呢？」
 
我：「走。」
 
Elaine：「同感。」
 
我地再對望左一眼，之後立即收起自己既電話，轉身離開呢度。
 
不過我地行左幾步，就俾人叫停左。
 
係俾在場既另一個人，Stephen叫住左。
 




Stephen：「見你地咁可愛，送樣野比你地啦，應該可以幫到你地傍身既。」
 
「獲得物品：手槍」
 
「獲得物品：軍用短刀」
 
Stephen：「你地自己要小心呀，有乜想要記得返黎呢度幫趁我！」
 
佢用佢個個粗獷既樣貌擠出一個笑容，仲舉起手指公，令人哭笑不得。
 
一個負責賣野既Npc居然都設定到咁人性化，呢隻game既團隊到底有幾犀利…
 
Elaine：「行喇我地，唔好再浪費時間啦。」
 
我：「嗯，我明白。」




 
我地加快腳步，想話快d走到去𨋢口拿拿臨走人。
 
好衰唔衰，我地只係岩岩行到去𨋢口，已經聽到𨋢到既「叮」一聲。
 
咁快就到！？
 
Elaine：「呢邊！快！」
 
Elaine好快就作出反應，一手拉左我入後樓梯。

可能因為大家都知道情況唔係講笑，所以大家都好合作，一下就入左後樓梯，仲好快手閂左門，想話令出𨋢既人睇唔到我地入左去。
 
效果好似幾成功，出𨋢既人無望過黎我地呢邊，直接咁向Stephen間鋪行左去。
 




佢個頭頂有個綠圓，同Elaine頭上既係一樣，即係話呢個人同我地一樣，都係玩家。
 
見到佢消失左係視線範圍之內，我成個人都鬆一口氣。
 
不過佢唔係咁。
 
我指既「佢」並唔係岩岩行左去既個個人，我指既佢係呢一刻係我眼前既Elaine。
 
佢成個人係度震，雙眼好呆，口中仲念念有詞咁，完全變左另一個人咁。
 
係白癡都知道，佢係度驚緊，驚頭先條友。
 
不過我無諗到佢會去到呢個程度…我以為佢最多只會心跳加速，不停抖氣之類。
 
佢而家就好似精神崩潰咁，黎得好突然，我都嚇呆左。
 
一向可以好冷靜好理性咁分析所有事既佢，居然因為面對一個來訪既玩家驚成咁？
 
就算係佢當初第一次係操場見我，佢都無咁驚，反而仲好開心好興奮架？
 
唔通佢識呢個玩家？
 
不過而家唔係諗呢d野既時候，而家應該係諗點應對個個玩家好？
 
趁佢未發現即刻走左去？成功率唔大喎而家Elaine既情況咁。
 
先下手為強？但我無手段可以攻擊對方…
 
咦講起手段的話…
 
我學之前Elaine做既咁，用手對住空氣揮左兩下，果然如我所料，我成功叫出左功能界面。
 
我好快就搵到「物品」呢欄，㩒左落去。
 
「手槍」
 
「軍用短刀」
 
我望住呢兩個名，猶豫左一秒，不過最後都㩒左係旁邊既「裝備」掣。
 
呢兩件野，馬上就出現係我眼前，係我手中。
 
咁樣或者就有手段啦。