「冒險」「生存」《香城之夢》: 原因

柔柔：「一係生存到個一日，而二呢就係殺死除左自己以外既所有玩家。」
 
要殺死除左自己以外既所有玩家…
 
我聽到之後忍唔住呑左啖口水。
 
要殺人…
 
Elaine：「個一日指既係咩？呢隻game本身有限期？」
 




係喎，仲有另一個條件。
 
柔柔：「對唔住呀系統唔容許我繼續透露更多啦~我只可以講咁多~」
 
我：「咁除左我地兩個之外，呢隻game仲有幾多個玩家？呢個問題答得啦掛？」
 
柔柔：「嗯，呢個當然可以答啦，反正你地遲D都可以查到，唔計你地的話而家《香城之夢》仲有50位玩家。」
 
「啊，而家得返49個lu~」
 




佢好似頭先既Elaine咁，一邊對住空氣篤篤篤，一邊同我地講野。
 
而家得返49個…即係話係頭先就已經有一位玩家死左？
 
係喎，如果我地係度死左的話會點？
 
Elaine：「點解會揀中我地做測試玩家？」
 
正當我想提出我既問題既時候，Elaine已經搶先我一步問左另一個問題。
 




柔柔：「哈哈，Sorry呀呢個都唔可以講，不過我諗你地的話應該可以好快搵到原因既~」
 
「你地快D升LV啦~升LV之後可以解鎖更多功能，可以做到更多野架~」
 
「順帶一提，已經有人升到上Level 10啦。」
 
Level 10…
 
柔柔：「好啦今日去到呢度啦~我要走喇~Bye Bye~~」
 
「最後講多句，拋開個份無謂既束縛啦，咁難得遇上一隻咁有趣既Game，梗係好好咁去享受啦！」
 
佢無等我地答佢，就消失左係我地既眼前。
 
空氣一時間安靜下來，我都唔知點做好。




 
我當下既反應係望過去Elaine度，見到佢又係度篤篤篤，仲鄒哂眉咁。
 
Elaine：「你仲係Level 1？」
 
佢無啦啦開聲，嚇左我一跳。
 
我：「我諗係掛…我無見過任何Level Up既提示字眼。」
 
Elaine：「你無去做佢俾你既任務咩？」
 
我：「任務？有任務架咩？係邊度接？」
 
Elaine：「咩呀，有任務做的話，D npc頭頂會有個感嘆號架嘛。」
 




佢咁講又好似有D印象…
 
Elaine：「我岩岩升左上Level 3，系統叫我去搵呢個叫做「Stephen」既人。」
 
「佢既位置係呢度。」
 
佢轉左個地圖比我睇，我一睇就知道個度係旺角。
 
我：「咁你打算去？」
 
Elaine：「當然要去啦，為左可以儘快離開呢隻game，呢個係其中一個方法呀。」
 
「你都要去。」
 
我：「吓，點解呀？個任務係俾你而唔係俾我架喎。」




 
Elaine：「反正你去都無壞處，仲有機會知道更多有關呢度既野喎。」
 
「你唔係諗住咩都靠我話你知呀？」
 
我一時之間無言以對。
 
係喎，我到底係度做乜？居然開始有諗住係度生活既諗法？
 
只係三日我就開始忘記自己屋企？ 我有無搞錯呀？
 
我一定要返去，我仲要搵…係囉。
 
我：「嗯，我明白啦，一齊去啦咁。」
 




Elaine：「咁先係架嘛，不過我諗你要升升lv先好d。」
 
係啵，Level都係一個問題。點算好呢。
 
Elaine：「算啦，我聽日係去之前同你一齊搵下睇下有無任務做啦。」
 
我：「呃，好，麻煩哂。」
 
Elaine：「幫同伴唔算麻煩，而且我想儘快搞清楚我地被帶到黎呢度既原因，多一個人諗好d。」
 
同伴啊…？都係既…佢應該係而家我係呢度唯一既同伴。
 
大家都係呢個世界既異類。
 
Elaine：「好啦咁我都要返去先啦，聽日見啦。」
 
我：「呀好，話時話，點解你會著成咁既？」
 
Elaine：「eh…因為…有d事囉，好啦唔講啦，走啦。」
 
我：「我送你啦。」
 
就係咁，我送左佢上的士，直至架的士完全消失係我視線範圍，我先返上屋企。
 
係呢個世界仲多野要做啊…