是咁的，我嘅職業係ptbf: 374.阿螢與阿潤

「對唔住⋯⋯對唔住呀金仔⋯⋯」阿螢㩒住我嘅手臂喊

令我發痛嘅力度展示出佢嘅愧疚

「係我嘅錯⋯⋯係我嘅錯⋯⋯」佢不停自責，但我仍然搞唔清楚狀況

「到底⋯⋯發生⋯⋯咩事？」

阿螢喊住咁話，阿潤保釋咗出嚟之後，就搵翻佢



「我知你仲愛我架螢螢⋯⋯見一面⋯⋯同我見一面好無？我真係捱唔住喇⋯⋯真係好大壓力。」

「我唔會再同你見面。」

本來，結果就係咁簡單，命運唔會糾纏交織出悲劇

但係，阿螢搵我，知道我今日同老豆出街嘅行程之後⋯⋯

咁我聽日都約人



於是阿螢搵翻阿潤：「我地見面啦。」

然後喺我會去嘅地方出現，等講出叫佢搵其他男人嘅我見到，見到佢同阿潤喺翻埋一齊，咁我就會呷醋，就會緊張

「你做咩又同佢喺翻埋一齊呀？你唔記得佢傷得你幾深咩？」正正因為對象係阿潤，所以阿螢覺得我會因為咁而著緊佢

但佢無諗過阿潤會帶刀出街

阿螢無同阿潤講過會見到我，所以佢把刀應該唔係特登帶喺身，而係時常帶備



帶刀嘅理由好簡單，就係如果有機會喺街撞到我，就出手殺咗我

殺咗我依隻多管閒事，令佢身敗名裂嘅臭鴨