情人節快樂: 現在(2)、是太想念你？

     過多幾分鐘，終於可以落叮叮，唔知係咪忽然由擠擁既地方去到相對空擴既地方，忽然有d涼意。我不期然摸一摸個斜揹袋入面既備用外套，沒錯係備用既外套。之前同親Cathy出去都怕佢會冷親，所以幾時都會帶多件外套出去，係果日之後沒心情執袋都以件外套都仲係度。我強壓住著2件外套既念頭，同Athena順住人潮向維園方向進發！
     順利入到維園年宵已經差不多係大半個鐘之後既事了。
「你有咩特別既野想去行先？」我問一問身邊既Athena。
「都沒呀，我地順住行就得架喇。」佢一面沒所謂咁應我。
     就係咁，我地就係維園入面順住人流行下停下，都唔知行下幾耐，身邊既鋪頭換左一批又一批。
「其實你覺唔覺得今日幾凍下？我隻手已經好似唔係自己咁，真係怕一掂就碎。」行下行下虧虧地既我就開口問Athena。
「係咩？等我睇過！」講完佢就一野捉住我隻手。
     兩手完完全全咁牽著，唔知係因為佢隻手真係好溫暖定係其他原因，果一刻我完全唔想放手。而Athena亦都沒鬆開手既意圖，所以我地就繼續好自然咁行落去。再多既鋪頭都有行完既一日，我地仍然都手拖住手行返出維園去食晚餐。
     唔知係咩原因，簡單搵一個食野既地方都行左好耐，係差不多行哂成個皇室堡之前我地終於決定去間漢堡店做今日既晚餐。雖然果間漢堡店而家已經執左。
     一齊去選餐，到開始用膳，兩手終於放開，但唔知係咪手心既熱度已經傳遍身體，成個人都已經溫暖起黎。




     空氣中好似凝固左起黎，明明拖住手果陣仲可以有講有笑，但到鬆開手食野果陣就相對無言，盡管我覺得氣氛都唔算尷尬，但就係怪怪的。
     食完，起身離開漢堡店之後我地兩手就好自然重新拖住，如同頭先沒放開過一樣。
「仲想去邊，定係而家就送你返去？」我問Athena。
「行多陣先囉，都唔算好夜姐。」佢帶住一絲笑意應道。
     由百德新街到鵝頸橋再到時代廣場，我地好漫無目的咁係銅鑼灣遊蕩，雖然沒意義但卻快樂。
     時間既流逝並唔會因人既主觀意願左右，都係時間送Athena返去，就好似以往同佢出街一樣，只不過今次大家係手牽手同行而已。係車上面可能因為快要分別，Athena緊緊咁捉緊我隻手，但我卻不期然諗起同Cathy搭巴士既往事。雖然Cathy肯定幾時都唔會拖住我，但佢一上到巴士就會靠住我訓覺，盡管好多時佢都係詐訓，但我都係次次郁都唔敢郁怕真係會整醒佢。
     發覺Athena好似沒左聲氣，我望一望發現佢原來已經靠係椅背上面訓左，頭先佢捉緊我隻手都可能係訓著左既自然反應黎，都係既今日又要返學又要返pt又行左咁耐都好累架喇。我望住車窗外既景色發現就到就拍一拍佢肩膀，見到佢睡眼惺忪好唔願意醒咁，我輕輕拉拉佢隻手叫佢落車。
     落到車慢慢咁行去Athena屋企樓下，佢忽然問我：「你有沒試過同人十指緊扣？」講完佢就轉左個牽手方式。十隻手指0距離緊緊的貼著，我同佢2隻手完美地達到熱平衡。
「同呀媽算唔算有？」我應道。
「我唔係講緊呢樣囉。」Athena佯怒道。




     我見都已經行到佢屋企樓下，就鬆開果隻拖左幾個鐘既手同佢講：「到喇，你返到上去就短訊我喇。」
     Athena行前多幾步去到大閘前轉身靜靜望住我，一語不發。我地對望左幾秒，街上面既雜音忽然全部都消失得一乾二淨，係呢個時候我到而家先發現識左咁多年原來Athena對眼係咁明亮，如此的閃爍著，好行都要講一句好似星宿一樣。我不由得一陣心虛，迴避左佢既目光。
     Athena嗯左一聲轉身慢慢步入大堂，係呢個時候我回一回神，係佢入左大堂果陣同佢講：「再見喇。」
     唔知佢有沒聽到，但係慢慢，慢慢佢就淡出左我既視線了。
 
 
     果日之後一段好長時間我地都沒再見面，好耐之後係朋友間輾轉得知沒幾耐佢就同左個男仔一齊，呢7年之間離離合合左3、4次，糾纏不清。
     我再望一望貼紙相入面既Athena，苦笑：「又何必咁執著呢。」
     相入面另一邊既Cathy依然笑語盈盈的看著我，我呆望半响，搖搖頭便把相放入新銀包的深深處好好放好。