情人節快樂: 從前(1)、捨不得有幾多？

     某年2月14日凌晨2時，明月當空，柔和的光線為街道上披上了一層輕紗，係呢個咁浪漫既時間我就係度做緊D好唔浪漫既事。
「肯返屋企未呀。」我坐係滑梯度睇住一個係公園度玩得不亦樂乎既少女。
「等多陣先喇，費事一陣WING下WING下咁返屋企。」唔知係因為玩得太開心定係酒精影響下所以兩腮緋紅既少女應我。
     呢個女仔叫Cathy，係我由中一開始已經識落既朋友，都估唔到咁快大家就識左7年。點解大家連成人身分證都拎埋都仲要夜媽媽係公園玩？梗係有原因架喇。話說頭先就有個中學同學聚會，咁我地呢D半大不小既年紀出得黎就當然要飲下酒。第一個問題就出現鳥原來Cathy係好唔飲得，好快就滿面嫣紅，雖然睇落都唔係醉既但一個女仔係夜晚都費事喇，所以就引申出第二個問題，要搵人送佢返屋企。咁我唔係同佢住好近，但相對黎講都已經係最近，所以呢個任務就好順利成章咁由我黎接左。
     黎到Cathy屋企附近，佢忽然又話唔想有酒味比屋企人嗅到，所以要我陪佢四圍HEA下，所以先有頭先果一幕。
「其實你邊有酒味，飲得咁鬼少。」我打住喊路同佢講，想佢快D返屋企，因為我知道其實佢飲得好少。
「散得清D，費事比老豆話喇，好啦好啦返去囉，仲長氣過我老豆。」Cathy好唔願意咁行返出石春路著返對鞋準備同我行返去。
     一齊慢慢咁送佢行去佢屋企，除左月光，路旁昏黃既街燈將我地影子拉到好長好長，係呢一刻，成條街除左我地兩個並排既影子之外好似再容納唔到其他野。慢慢咁行下停下，但始終都會到分別既時候，送到Cathy佢屋企樓下，我地互相道別。
     之後佢忽然同我講左句「係喎情人節快樂。」之後就行去大廈果邊好似準備返屋企，但行得兩步，佢又忽然彈下彈下咁返轉頭去到我面前，望實我再同我講「情人節快樂。」係我LOAD到發生咩事之前，Cathy已經輕輕吻左我一下再後退兩步靜靜地凝望著我，那一吻輕輕的彷彿沒有任何重量，但時間係呢幾秒好似可以申延到無限長，我同Cathy彷彿對望了一輩子，當時真係比唔到任何反應。Cathy見到我個樣就傻笑住同我講多次情人節快樂就跑跑跳跳咁入大廈，好快佢就消失左我視線入面，只遺下我係路邊在月光下呆望著。