我發現左我呀媽食精神科藥物

我從來冇諗過我屋企人會有精神病，我亦從來冇諗過咁後生既我會係面對精神病呢樣野會咁唔開放，咁抗拒，因而傷害左我既屋企人，仲有我自己。
由唔知幾時開始，我呀媽身體狀況變到好差，經常失眠，因此朝早就變到有氣冇力咁返工。佢終於頂唔順辭左職，之後就日日係屋企瞓，瞓完就食。由於我地三兄弟姊妹都出左身，老豆都有繼續做野，所以佢辭職都唔會影響我地既生活，我地依然夠錢使。
但最令我覺得不便既係，我呀媽個人成日有氣冇力咁，情緒低落。每當佢有氣冇力咁同我講野，又細聲，我又聽唔清，我又忙既時候，我就會有啲躁底同面色唔好。佢既舉動令我覺得佢唔係病，好似故意咁。夜晚時候，就連我瞓交既時間都要因為佢既狀況而調整。佢唔想瞓既時候，我就可以夜啲先瞓，佢想瞓既時候，我就會係咁比佢叫我瞓，即使我係到忙緊工作既野。原因竟然就係我房間門縫透出黎既光會影響到佢。有時，佢係咁叫我唔好噪，唔好整啲聲出黎，但其實係風吹動露台啲膠袋所發出既聲音。佢逐漸變得極敏感，好似小小事就可輕易觸動佢既情緒。有時比佢無故怪罪就令我更加反感。

有一日，我見到佢間房台面有幾包藥，其中一包上面寫住「情緒」。
「你去睇醫生黎？」我問。
「嗯！」
「醫生點講？」
「佢話再係咁，建議我去睇精神科。因為搵唔到病因。」（媽咪既症狀：胃口唔好，長期失眠，身體極疲勞）
「哦！」我聽完應左一聲，就返左入自己房。返左房唔夠10秒，我又行返去媽咪間房，問：「其實你係咪有咩唔開心？有咩事？」




「冇！」
「真係冇？有你就講啦！」
「真係冇！我都唔知點解會咁！」
「冇就算啦！」我返返去自己房。其實我有啲唔耐煩，我好主觀咁認為媽咪有野隱瞞我，先會引致而家呢個局面。如果佢肯講出黎就會冇事啦。而且我冇直接同媽咪講，但我真係好唔想佢去睇精神科，好唔想，咁咪姐係承認佢有精神病，邊有可能會有。冇可能！我知道我應該覺得擔心至岩，但我當下產生最大既感覺竟然係驚佢去睇精神科。之後，隨住佢既行為越黎越怪異，我不得不提高警覺，佢半夜起身自言自語，坐係到望住冇著到既電視機成日。我問佢睇咩？佢話睇緊電視。但我都唔願意去承認任何野。
直到有一日，我係公司收到呀哥既電話話媽咪出左事。佢差啲係屋企窗口跳左落街，佢話佢見到好多識飛既bb向佢揮手，叫佢一齊飛。由個刻我地先知道，媽咪既情況已經好嚴重，有幻覺同幻聽，比醫生確診為抑鬱症，需要立即強制留醫。而係佢留醫呢段時間，呀哥，細佬，老豆都有去睇佢，唯獨我冇，我真係唔想去，我真係唔想去個種地方。
有時出入見到啲鄰居，佢地問我：「咦！好耐冇見你呀媽喎！佢去左邊呀？」
我呆左，最後都只會話佢返左大陸。我呀媽入左精神病院，我真係講唔出口，我真係唔敢講出口。

可能因為每日醫院屋企來來回回咁忙，老豆佢開始有啲病，係咁咳。我同老豆講：「老豆！抖下啦！唔使日日去既！」
佢就話：「咁你就去睇下你呀媽啦！佢成日提起你，問你點解唔黎？」




我冷漠咁講：「我得閒自然會去，我好忙！」然後斟左杯暖水比老豆。
其實唔只呢次，我唔知點解我對媽咪有病特別反感，就算之前佢普通病都好，我都視而不見，冇物點理佢。但如果係老豆病我就會好擔心，好留意佢既情況，希望可以做啲嘢令佢舒服啲。

媽咪入左精神病院3個月後，情況穩定返，可以出院啦！老豆叫我去開媽咪鎖埋既櫃桶，拎佢本存摺出黎，要拎啲錢出黎交醫藥費用。我搵到鎖鑰打開櫃桶，搵左搵，見到有個小鐵盒，我打開左黎睇，入面放住我地細個寫比媽咪既卡，我而家睇返黎覺得只係垃圾，但佢就珍而重之咁收藏起黎。我望住我柔嫩既字體寫住「我大個會好好報答你」。我眼淚忍唔住流左出黎，因為我知道我自己根本冇做到。因為愧疚，媽咪出左院之後，我對佢既態度好左好多，悉心照顧同包容佢。佢亦都逐漸康復。

我上網睇到催眠可能有助治療精神病，我幫媽咪book左兩個鐘。我係出面等，一面睇外面既單張，上面寫催眠甚至可以搵返一件係潛意識入面影響你既事，即使你根本唔記得，但呢件事依然會係潛意識入面影響住你。
一個鐘之後，媽咪叫左我入去，治療師話已經完成首次治療。但我預約左兩個鐘，如果唔用盡，錢都係照收既。
「女呀！佢話催眠可以醫埋失眠架！你都成日失眠，不如試下啦！反正有時間。」媽咪咁同我講。
於是我就留左係房，媽咪出左去等。
治療師叫我合埋眼，同我講左一大堆野令我放鬆。




「我而家倒數十秒，唔需要刻意去諗，你既潛意識會自動引導你去最影響你而家生活既畫面。十、九、八⋯⋯⋯一。⋯⋯你見到啲咩？」
「我見到細個既我一個人係屋企廁所。」
「你係廁所做緊咩？」
「係到咳！」
「你病左？你細個成日病？」
「係！」
「咁你點解要係廁所到咳？係咪因為怕屋企人擔心？」
「因爲我媽咪話聽到我咳就覺得我好煩！」
「因為你媽咪嫌你煩，所以你匿埋喺廁所咳？」
「唔係⋯因爲我怕佢擔心，因為我知道佢係擔心我。」
⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯
「岩岩我講既野⋯你可唔可以唔好同我媽咪講？」

完～





黑柴：
當事情唔係發生係自己身上既時候，你可能覺得自己會對精神病呢樣嘢好開明，唔會歧視精神病人。但當發生係自己或者屋企人身上既時候，你可能先會發覺自己冇想像中咁開明，唔願意去相信，以致延誤治療。但其實，呢個時候患者最需要屋企人既包容同關心，呢啲全部源於你對佢嘅愛。
希望多啲人可以更了解精神病，對此持開放態度。以下條link有有關抑鬱症既資料，有興趣睇下。
http://www21.ha.org.hk/smartpatient/tc/chronicdiseases_zone/details.html?id=175

#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/