香港都市傳說二：不能碰上的熟食攤檔: （十四）
離開了黃大仙祠後，Daisy馬上坐上的士，來到旺角某一舊式唐樓裏，找尋劉道士的弟子。
來到指定的地方前，老實說，從外觀上你絕對想不像這裏和道教或任何宗教能夠拉上關係。
因為外觀老舊之餘，走廊上都充斥著垃圾和髒亂的感覺！
縱使這幢大廈沒有那些一樓一或一些奇怪的招牌，但給Daisy的感覺就是十分不好。
不過，反正也已經到了，加上她的情況不容她再作多想，她鼓起勇氣按下了門鈴。
「叮噹」一聲，大門隨著門鈴響起的清脆聲音打開了。
開門的，是一位約二十多歲的年輕人，眉宇間給人一種正氣的感覺，但Daisy卻猶豫了，她實在不相信眼前的年輕人有能力幫到她。
「小姐，你喺嚟？」年輕人問。
「請……請問係咪劉道士嘅弟子呀？」Daisy用不肯定的聲音詢問。
「我師傅唔係姓劉喎，小姐我諗你搵錯地方啦。」話音剛落，年輕人便準備關門。
「等陣，係一位叫裘叔嘅人叫我嚟呢個搵劉道士弟子架！我遇到啲麻煩事，搵緊人救我，求下你幫下手啦！」Daisy立即按著大門，緊張地說，眼裏泛起淚光。
「吓......但係我地呢度真係無咩劉道士弟子喎......」年輕人被Daisy緊張的神情嚇了一跳，只好無奈地說。
就在兩人爭辯期間，屋內傳內一把聲音：
「阿明，做咩開個門都搞咁耐？」
「師傅，無，出面有位小姐，佢話有位叫裘叔嘅人，叫佢嚟呢度搵咩劉道士弟子喎。」阿明轉過身去，恭敬地說。
「裘叔？劉道士？你叫佢入嚟啦！」那聲音中氣十足，給人一種可以倚靠的感覺。
進到屋內，Daisy發現地方雖然不算十分大，大慨一千平方呎左右，但內裏的裝修和室外形成強烈的對比。
而且，室內的裝修給人一種很莊嚴的感覺。
一進到門內，就見一些像是佛像的東西，佛像四周就是一些畫像，還有掛著一些寫著不知名文字的黃色幡布。
Daisy猜想，這就是所謂的道壇吧。
而在道壇前，則站著一名瘦削的男人，那男人背對著阿明和Daisy，手上正拿著三支香，像是在參拜似的。
兩人慢慢走到那男人身後，阿明則輕聲提醒Daisy，先不要打擾男人上香。
過了一會，男人把香插好在香爐裏，才慢慢回過身來。
這男人雖然看起來瘦削，臉色也有點蒼白，但眉宇間的氣息，卻比阿明顯得更加正氣！
這男人眼睛十分澄明，令人有一種放心的感覺。
單從這男人的外表，Daisy無法把剛剛那中氣十足的聲音，和眼前的男人連繫起來。
而且，這男人年齡雖然比阿明大，但感覺才不過四、五十歲，實在很難想像他就是劉道士的弟子。
「小姐，就係你搵劉道士弟子？」這男人金口一開，那中氣十足的氣音立即傳進Daisy耳內，錯不了，他就是阿明口中的師傅了。
「係……係呀！裘叔叫我過嚟搵劉道士弟子架，請問你係咪佢弟子呀？我最近遇到啲怪事，希望你可以幫到我！」Daisy緊張地問。
這男人上下打量了Daisy一回，搖了搖頭並嘆了口氣：
「小姐，恕我直言，如果你真係見過裘叔，佢都幫唔到你嘅話，我應該無辨法幫到你。」
Daisy聽完後更感糊塗，弄不懂這男人話中的意思。
「究竟點呀？裘叔又叫我嚟呢度搵人幫手，你又話裘叔幫唔到我就無人幫到我！你地學法嘅唔係要幫人嘅咩？我又無做啲咩大奸大惡嘢，無啦啦俾果隻嘢睇中仲想換走我啲皮膚！你睇下我對手，你睇下我額頭！我先廿幾歲，點解要係我？點解呀？點解……」Daisy展現她手上逐漸老化的皮膚和額頭那明顯的疤痕，想起自己的遭遇，又再痛哭起來。
本來一直嘆氣的這個男人，在看到Daisy額頭的傷額時，明顯有所動搖：
「小姐，你……你俾我睇清楚你額頭。」
Daisy感到奇怪，但想起裘叔也曾作出同樣的提問，便不多作想，把頭髮撥後並露出額頭上明顯的傷痕！
「原來係咁……難怪裘師叔會……小姐你入嚟內堂先啦。阿明你幫我睇住道堂，有人嘅話你去處理，處理唔到嘅叫佢第二日再嚟啦！小姐，呢邊。」這男人引領著Daisy進入屋內的房間內，房內掛滿了不同的符咒。
「小姐，你坐啦。我叫李德龍，你叫我龍叔得架啦。劉道士係我師公，而劉道士徒弟即係我師傅，不過師傅兩年前過咗身，依家係我負責打理呢個道堂。因為我嘅徒弟並唔知道劉道士師祖，所以阿明頭先先會以為你白撞。好啦，裘師伯叫得你過嚟，我會幫你嘅。不過我想聽下你依家嘅情況，你已經遇到美玲幾多次？」龍叔請Daisy坐下，並開始說明。
「裘師伯？美玲？」Daisy露出不解的神情。
「咦？裘師伯無同你講咩？裘師伯同我師傅，當年都係劉道士嘅徒弟嚟。而你遇到果隻嘢，應該就係師祖當年對付嘅妖邪 － 美玲！想當年，師祖喺太子爺過咗身之後，曾經有去過對付美玲，當時我師傅同裘師伯都有跟住去，但因為某啲原因，師祖佢失敗咗，仲俾美玲害死埋。之後裘師伯就離開咗道壇，聽聞佢一直喺出面搵方法想對付美玲，因為佢覺得當年係佢害死師祖！」龍叔簡單地解釋給Daisy聽。
「原來係咁……咁點解裘叔要我嚟搵你？點解佢唔直接出手幫我？」Daisy大概明白了美玲和這道壇之間的關聯，但她不明白為甚麼裘叔不肯幫她。
「呢層……我諗係因為無辨法幫你……」龍叔搖了搖頭，嚇得Daisy半死。
「你你你……你講咩話？啫係你都幫我唔到？」Daisy大驚。
「小姐你冷靜啲，雖然我地係對付唔到果隻嘢，不過，都可以好似師祖咁，幫你避開佢。不過，因為師祖留落嚟嘅典籍都好多，同埋有啲典籍都破損咗，我要啲時間去搵同埋解讀嚟，所以我暫時無辨法幫你施法住。」龍叔解釋。
「吓？唔得呀師傅，你要幫我呀！我已經遇到隻嘢三次，佢上次同我講，仲有四次就結束！我唔想死呀！」Daisy哭道。
「原來已經遇到佢三次……小姐，你唔駛擔心，我呢度有道符，無論遇到任何妖邪，都可以幫你擋到一刧。但只可以用一次，用過一次之後，就會無效！嚟緊呢個星期會係關鍵，我建議你最後一次先好用呢道符，我會盡快幫你搵返師祖嘅方法出嚟！」龍叔把一道符咒交給Daisy。
「但……但係……」Daisy看著自己開始老化的雙臂，擔心地問。
「哦，呢層你唔駛擔心，只要幫你施法之後，你會慢慢變返以前咁。隻嘢只係透過佢嘅儀式，去吸收你嘅精氣，只要儀式唔完全，佢喺你身上拎嘅精氣就會歸還俾你！」龍叔看穿了Daisy在擔心甚麼。
「咁都好啲……但係……我……係咪真係會無事？」Daisy接過符咒，心裏卻仍然感到不安。
「你放心，我一定會盡快幫你處理！」龍叔輕輕拍了拍Daisy肩膊，使她感到安心。
然後龍叔安撫了Daisy一會，Daisy總算安心離開了。
在Daisy離開了道壇後，一個身影出現在道堂裏，是裘叔！
「裘師伯，我將你道符交咗俾個女仔啦，亦都照你所講，教咗佢最後一次遇到嘅時候先用。但……我地唔即刻幫佢施法避開美玲，真係好咩？」龍叔跟裘叔說，原來龍叔早已知道如何施法，那為甚麼卻要拖延時間呢？
「師侄，你知唔知我已經追尋咗呢嘢幾多年？唔通你唔記得你師傅點死咩？今次個女仔嚟搵我，一定係上天嘅安排，當年我師傅收唔到佢，你師傅亦都俾佢害死埋，呢次係我地嘅機會，去收拾呢隻嘢！呢隻嘢喺吸收人類精氣嘅最後階段係最脆弱，到時我地等個女仔用咗道符咒，削弱隻嘢嘅能力，我相信一定可以收拾佢！」裘叔原來一心想著收伏美玲，Daisy的安危反而是其次。
到底，裘叔的計劃會否成功？還是說，這魯莽的計劃會把Daisy給害死呢？