香港都市傳說二：不能碰上的熟食攤檔: （五）
「Daisy，頭先間鋪頭啲嘢食都幾好啊？」Tony問。
「都ok啦，不過唔知點解，我今日食嘢果陣，硬係覺得無平時咁好食。」Daisy回答。
「你應該真係太攰啦，搞到食嘢都唔知咩味。呀……係啦，嚟緊星期六，不如等我帶你去食啲好嘢，輕鬆下啦……好無呀？
」Tony鼓起了勇氣邀請Daisy，但最後那三隻字的聲音小得幾乎聽不見，大慨是害怕Daisy拒絕吧。
Daisy呆了一呆，一時間不知如何反應，使Tony嚇得緊張起來。
「係係係係咪唔得呀，唔得就算……」那個「算」字還沒有完成，Daisy已「噗哧」一聲笑了出來。
「做咩呀你，我又無話唔得。我只係諗我地係咪淨係食飯啫？」Daisy笑著說。
「咁……咁即係OK呀？梗係唔止食飯啦，我帶你去行下輕鬆下啦。」Tony笑得合不攏嘴。
「好啦，咁到時我就跟實你行啦。不過講起食嘢，我尋日呢，試咗一間好好食嘅腸粉，喺我屋企附近架，陣間見到嘅話同你試下啦。」Daisy笑著回應。
兩人繼續走了一會，來到昨天那熟食攤販附近時，Daisy突然高興地說。
「就係呢度啦，轉過彎就係啦，我去睇下有無先！」Daisy滿心歡喜的跑向前方。
「等埋呀。」Tony笑著說，似乎對Daisy這種小朋友的態度不太反感。
走在前頭的Daisy，在轉過彎後，她便看到那熱氣騰騰的熟食攤販。
而就在目光接觸到的一瞬間，Daisy像失了神般，滿腦子都想著那白滑的腸粉和那些誘人的醬料。
而她的嘴角亦不自覺流出了一些唾液，雙眼亦流露出異樣的目光，如果在街上看到這樣的一個人，我們也許會不自覺的躲開吧！
而Daisy此刻已放棄了思考，她只想跑到熟食攤檔前好好大快朵頤一頓。
就在她要向前走之際，Tony剛好也轉過彎來，並說：
「咦，Daisy，你做咩呆咗喺度嘅？無嘢呀嘛？」
Daisy被Tony的聲音弄得清醒過來，她才發現嘴旁沾滿了自己的唾液。
她趕緊拿出手帕，把嘴角的唾液抹走，然後才回過頭來，興奮地對Tony說：
「佢有開檔呀！檔腸粉真係好好食架！我買份同你一齊食呀！」
「吓？你講咩呀？邊有小販喺度呀？」Tony疑惑地問。
Daisy聽到後，也露出疑惑的神情，她馬上回頭一看，發現街道上真的沒有甚麼熟食攤檔，在她面前的只是一條黑漆漆的街道。
Tony察覺到Daisy的異樣，只猜測她是太累了，便馬上送了Daisy回家。
Daisy回家後只感到徹夜難眠，心裏只記掛著那些誘人的腸粉，在床上掙扎良久後，才沉沉睡去。
這晚，Daisy睡得非常安穩，並沒有作任何奇怪的夢。
翌日，Daisy正準備跟Sharon做Presentation，Kinki卻突然出現。
「聽同事講Sharon你幫Daisy執緊見客啲嘢，我又有興趣聽下，唔介意我坐低呀嘛？」
Sharon知道Kinki的想法，狠狠地瞪了Daisy一眼後，無可奈何地讓Kinki進行「旁聽」。
Daisy看到Kinki特意進來，她更用心地進行演講，在演講過後，一些模擬的即場應對，Daisy也自信地回答出來，Kinki也滿意地笑了。
「Good Job！做得好呀，比我當年仲要流利！係呢，Sharon，你有咩意見呀？」Kinki拍了拍手以示讚賞，Sharon也不便再多作為難。
Sharon稍稍提點了一些技巧和注意事項後，便完成了今次的演講。
「唔該晒你呀Kinki。」離開了Sharon的房間後，Daisy馬上向Kinki道謝。
「唔駛多謝我，我只係想親眼睇下你嘅表現啫，唔錯呀。同埋，Sharon頭先嘅提點真係好好，你都要同佢好好學下嘢，希望你可以同佢搞好關係。」Kinki對Daisy稍作提點後，便叫了Tony進她的房裏，看來兩人真的被Kinki視為晋升的人選。
「好！我要加油！」Daisy在心裏替自己打氣。
「Daisy，一齊去飲嘢啦？」放工時間，一位同事問她。
Daisy看了看自己的行事曆，再三確定沒有任何緊急事情要處理後，便答允了同事的邀請。
「Tony，我地去飲嘢，你去唔去呀？」Daisy走到Tony身旁。
「我諗我唔得啦，仲有好多嘢要做，你同佢地去啦。仲有，你……記得聽日同我去街……架啊？」Tony小聲地問，Daisy聽到後便微笑點頭以作回應。
「咁我晏啲Send message俾你啦，你同佢地玩得開心啲啦！」Tony高興地歡送Daisy離開後，便繼續努力工作。
「飲杯！終於捱完呢個星期啦！差啲做到連命都無！」同事A誇張地說。
「你咪扮嘢啦！日日準時五點九就開始執抬，六點鐘走人，有幾忙呀你！Daisy就真係忙啦，係喎，Sharon果日捉你入房，無事呀嘛？」同事B好奇地問。
「無呀，都係傾下嚟緊見客啲嘢啫。」Daisy答得非常小心，不敢在其他人面前有太多抱怨。
「哦，咁都好呀，不過Daisy你都算勁，夠膽自己一個留喺公司留到咁夜！之前呀……」同事A說到一半，旁邊的同事輕輕碰了他一下，然後他才察覺到說錯話，急忙停下來，其他同事也略為顯得緊張，歡樂的氣氛一下變得有點空洞。
「做咩呀你地，唔會係……公司有啲咩呀？」Daisy直覺上感到有點不妥。
其他同事你眼望我眼，就是沒有一個人願意直視Daisy。
Daisy拼命追著他們的目光，直到和同事A的視線再次接上，她忍不住問：
「其實係咪發生咗咩事？可唔可以同我講……我諗我以後好多時都會留喺公司OT架。你同我講啦。」
同事A被Daisy看得渾身不自在，無法抵抗下，便說：
「好啦，你當故仔聽完就算啦，同埋唔好話喺我地度聽返嚟，如果唔係，我地會好麻煩。」
Daisy認真地點了點頭後，同事A便開始講述接下來的故事了。
就在數年前，公司聛請了一位後生，外表漂亮而且非常有能力的女同事回來。
而且連最難搞的Sharon也對這位女同事寵愛有加。
她不沒有持寵生嬌，反而工作非常認真，每次接手了新的Project，縱使只有她一人，也願意留在公司裏加班。
但某一晚過後，那女同事開始變得有點奇怪。
經常和同事說，晚上在公司會聽到奇怪的聲音，又說公司裏應該有甚麼奇怪的東西存在著。
她對食物的味道開始變得挑剔起來，常常會說外面的食物淡而無味，使她在公司裏變得愈來愈不受歡迎。
而最重要的是，她的外表開出現轉變，皮膚明顯變得粗糙，到後來不但愈變愈差，連身上也散發出一陣奇怪的味道，雖不至於討厭，但就是有種違和感。
然後，某一天，她突然消失了！
沒有任何交待，也沒有任何消息，即使她的親人也不知道她的去向！
「佢就係咁消失咗，之後公司上下都有啲奇怪傳聞。後嚟公司只好搞返場法事，之後就落咗命令唔準任何人提起呢件事啦！嗱，你聽完好啦，千祈唔好爆出去呀！」同事A深怕Daisy無意間把這故事說了出去，所以再次提醒Daisy。
「好啦好啦！今日都飲得差唔多啦，我地都係走啦！」同事B像怕惹上甚麼麻煩，趕快的要求離開。
就在各自離去的時候，Daisy心中仍不斷浮現出同事A的故事！
不知不覺間，她已來到長沙灣地鐵站。
在離開車站後，她邊和Tony約定明天相見的時間，邊思考著那故事和自己的遭遇。
Daisy沿著熟悉的道路走回家中，本應是非常簡單的路程，她卻神推鬼㧬的來到了某條街道上。
這條街道正是那熟食攤檔擺賣的地方，當Daisy抬起頭來，她驚訝自己為何會出現在這條街道上，明明自己沒有任何食慾，但雙腳卻不知不覺間走到這裏來。
當她想回頭離開時，卻發現眼前不遠處，那熟食攤檔正在冒著熱騰騰的蒸氣。
而那攤檔仿似有甚麼魔力，Daisy竟突然有肚餓的感覺！
她一步一步的走向攤販，到底，她會否再次一嘗那美味白滑的腸粉呢。
而Daisy早前在公司的遭遇，又跟那失踪的同事有何關聯呢？