愛情到底係合久必分定合久必婚: 第二章

第二章

「入黎啦，你坐個邊近窗個個位啦。」我既班主任同我講。

我好快咁行埋位，（順便好快咁睇左下呢班有無靚女）左邊第二行第二個個唔錯，嗯嗯，坐佢隔離個個都唔錯。唔係喎，點解呢班好似咁少人既？

「喂，快啲出黎睇啊，阿寂又飛左女喇，今次係隔離班個個欣欣啊！」走廊個到有人大叫。我望一望出去發現已經有一大班人企左去外面食花生。唔怪知得課室咁少人啦，身為岩岩黎到對咩野都唔知頭唔知路既我就咁行左出去睇下發生咩事。

走廊盡頭企住一個男仔同一個女仔，女個個幾靚女幾可愛，唔錯唔錯。男個個背對住我，望唔到佢咩樣，不過唔緊要我對男人無興趣。





「點解，點解你要同我分手啊？你知我無左你唔得嫁！」
「無點解，無意思既野你唔好問，我唔想答。」
「點解你會覺得呢句野無意思啊！你係咪一直覺得同我一齊無意思？咁點解當初你要追我啊？」
「...」
「答我啦，你唔敢答我啊？」
「因為我當初中意你....宜家....已經無左個感覺。」
「上官寂，你好自私啊！我憎死你啊！」

啲人望住呢對散左既情侶，好似好可惜咁，又好似見慣見熟咁，但係呢一刻既我淨係覺得個女仔好幼稚，咩憎死你又係到問點解。明知道個男仔如果仲中意佢根本就唔會講到咁白同佢分手，仲要引起咁多人睇呢場鬧劇。





我搖一搖頭，返埋自己個位諗住恰一陣既時候，我隔離個張檯郁左幾下，有人坐低左，睇下邊個係我既同桌先，如果係女就好喇。我打開眼，迎面而黎既就係一個擁有o’neal身型既女仔對住我微微一笑。我好冷靜咁望左佢一眼，慢慢另轉頭流左一滴男兒淚。（命苦啊，點解坐我身邊個個唔係一個靚女，仲要係一個好似男人既女人！）

外面既鬧劇終於完左，同學開始慢慢咁入返黎坐低準備中4第一次class time。