🏀🏀🏀[七宗罪][籃球][玄幻][打鬥冒險]《命運籃球》🏀🏀🏀［實體書於各大書局有售］: 047 獸皇的過去
047 獸皇的過去
面對獸皇的執意，姎皇終歸未能阻止他，只好依照獸皇所說，留守在D-Zone。
獸皇帶領的反攻隊伍，在進入地球另一邊後就音訊全無，直至半年後，其中一位隊員Fisherman出現在D-Zone內。
心急如焚的姎皇自然是馬上去了找Fisherman，追問他有關於獸皇的事。
「姎皇，乜你咁好閒情逸致嚟搵我呀？」Fisherman臥在籃球場中央，懶閒閒的閉目休息。
「獸皇呢？」
「你想搵獸皇？我都唔知佢係邊喎。」
「點解成隊反攻隊伍得你一個人返到嚟？」姎皇的語氣中，隱藏著冷冰冰的殺意。
Fisherman坐直身子，「因為人心險惡呀，乜你以為所有人都會好似獸皇咁願意為人類獻出自己生命？哈哈哈哈……」
Fisherman笑得淚水流個不停。
「唔準笑！快啲直接講，唔好再轉彎抹角。」姎皇脫下面具，怒瞪Fisherman。
Fisherman搖著頭，好不容易才止住笑意，「成隊人入面，除咗我之外，所有人見識到外星人嘅實力之後就即刻離隊，係即刻呀！！佢哋唔單止掉低獸皇同埋我，離隊嘅人仲通通成為外星人嘅走狗，拎埋地球另一邊嘅居住權，而且仲即刻加入埋對面嗰隊，為外星人做跳樑小丑，嚟一場人類打人類嘅娛樂賽。」
「你意思係獸皇自己一個對付晒所有人？」
「乜你冇聽清楚我講嘢㗎？都話掉低我同獸皇囉！」Fisherman皺起眉說。
「對唔住，即係你同獸皇兩個打其他人？不過以獸皇同你嘅實力，要對付其他七帝同幹部應該唔難。」
「本來係，可惜獸皇唔忍心攻擊佢嘅舊同伴，哈哈，仲叫自己獸皇，一啲都唔夠獸性。」Fisherman挖苦的說。
「咁最後點？」
「嬴咗場比賽，外星人被迫要親自出手，不過得我同獸皇，就算再勁都唔夠外星人嘅精英打。」Fisherman拉起上衣，露出腹部，在他的腹上有一個很大的十字形疤痕，「依個疤痕就係外星人送畀我嘅禮物。」
「獸皇呢咁？」
「佢自己一個留係嗰度，製造機會畀我逃走。」Fisherman目無表情的說。
「獸皇佢……佢……」說著說著，程琛哭了起來。
「佢應該未死。」
「點解咁講？」
「因為係出發之前佢去過一個地方，去完之後佢就好有信心咁講，如果有咩事就留低佢一個，因為佢一定唔會死。」
「咩地方？」
「好似叫萬事樓。」
「萬事樓……」
……
回到現在。
「阿森，你就係獸皇！」程琛抓著阿森肩膀，用力的搖動他。
「我係獸皇？」阿森按著太陽穴，「我係……」
Fisherman兩肩微聳，沒趣的問道：「喂，點㗎你哋，仲打唔打㗎？」
其他人無暇理會Fisherman。
文煌問：「程琛，你係話阿森係塔尖創辦人？」
「係……」程琛望著阿森，眼底所閃過的是絲絲眷戀。
文煌腦袋炸開了，就算發夢都沒可能會想到身邊兩位朋友竟是塔尖的統治者。
若是程琛有半神階的威力，為何文浩身陷險境時她沒有出手相助？想著想著，怒火就在文煌的心底燃起。滿腔怒火突兀消失，文煌想通了，程琛這樣做只是為了斷除跟獸皇之間所有事，藉此來減輕她的痛苦。要是程琛被人發現了她的真正實力，塔尖的人很快就會查出她就是姎皇，姎皇跟塔尖密不可分，她就需要再次面對獸皇已死的事實，重掌塔尖。
換轉是他，他或許也會這樣做，而且當初賽事還未完結，為何一口咬定程琛到最後都會見死不救？是救，是不救已不再重要，最重要的是程琛一直以來都沒有背叛他們，甚至在他未取得人靈記憶前，也是靠程琛幫助才免於被肥權擊敗。
如此計來，程琛只會是他們的恩人。
文煌指著Fisherman，「你話阿森就係獸皇，有咩證據？」
Fisherman嘴角上揚，輕挑的說：「無㗎，信咪信，唔信咪算。」
面對不合作的Fisherman，文煌也奈何不了。
Fisherman抱胸道：「唔打就由佢，快啲決定打定唔打！」
樹靈傳心問道：「如何？」
文煌看了看阿森二人，傳心回話，「如果佢無講大話，咁塔尖二皇已經喺度，再挑戰七帝意義不大。」
文煌說：「依場波打唔到落去，就咁算。」
「Never mind，反正我對全力以赴嘅獸皇有更大興趣。」
雙方取得共識，比賽強制中止，包圍球場的籃光消失。
Fisherman離開場區，「如果你哋想再挑戰我，隨時候教。」
大家看著Fisherman坐在場邊的椅子上，然後都一起離開籃球場，靜靜的回到馬車上。
氣氛變得古怪，程琛一直在看著阿森，阿森腦袋一片空白，文煌還在疏理各人的關係，只有樹靈完全不受影響，靠在馬車邊緣看看街景。
文煌坐到駕駛座，「我哋係城入面搵個地方留宿，再決定之後點做。」
若然阿森和程琛真的是二皇，那麼他們都是反攻外星人的重要戰力，加上樹靈，反攻隊伍中就有四個可以達到半神階的戰力（文煌和樹靈的實力正在穩步提升，並可使用特別術式進入半神階水平），那麼就有跟外星人一戰的本錢。
雖然從Fisherman的說話中，得知外星人的底蘊比起想像中要深，但是文煌跟樹靈可不是普通的戰力，而是有過神階感悟的半神階戰力，必要時要可以在短時間之內達到神階威力，只不過是必須付出一定代價。
他們回到城內，發現出租的地方不多，最重要的原因是D-Zone內根本沒有貨幣，難以促進貨物交易，經濟難以發展。
「嗯……」迷之黑衣少女醒來了。
文煌扶著少女，「你係邊個？點解會自己一個喺平原度？」
少女用手拍拍額頭，「我……我叫莉莉斯，我唔記得點解會係平原度……」
「莉莉斯！？」文煌的心臟猛烈跳動，他到底在哪裡聽過這個名字，這個少女到底跟他有甚麼關係？
不單止文煌，連樹靈都猛然張開眼，瞪著莉莉斯發呆。
程琛說：「天就嚟黑，要搵個地方瞓。」
樹靈說：「出去領地外圍，我用術式弄間樹屋。」
眾人聽從樹靈的建議，他們坐著馬車去到領地外圍。
樹靈所言非虛，見他從馬車走下去後，雙手按在地面，口中念念有詞，一陣綠光閃過，一間兩層高的木屋就破地而出，豎立在眾人前方，是很方便的術式。
「莉莉斯，你今晚不如同我哋一齊住。」文煌說。
莉莉斯抓著自己的手肘，腳站成內八字，「好。」
馬車靠在門外，解開了鎖扣，任由馬兒在路旁吃草。
天色已黑，文煌等人各自各有回到房間，睡覺休息。
今天，大家都累了。