當年我曾經追到一位女神,但我竟然飛左佢。: 第四十九節:體驗

升左上中六已經過左三個月,除左操卷操密左之外.都無咩其他特別既事。

今日係難得一年一度既升中體驗日,我見無人幫中文科明sir手,我就拉埋阿彤兩個一齊係果日返左學校幫手。

朝早我地一齊食完早餐就返學校幫手。

「難得有假都唔抖下,傻的嗎?」阿彤問我

「最後一年啦都有時間咪幫下手囉,唔係遲啲畢左業想返黎都無時間。」我答





「咁又係,可以留啲回憶係依間學校都係一件唔錯既事。」阿彤講

好快我地就到左學校,見到有唔少同學已經準備緊接待升中生同家長,我地兩個都好快去左二樓負責既課室準備。

入到課室見到明sir同另一位老師係到講解緊陣間要做啲咩比其他低from幫手既同學知道,明sir見到我地到左就過黎同我地講。

「阿東,阿彤好準時喎。你地兩個陣間呢就負責依邊依個小遊戲,看圖估成語,陣間班小學生黎到你地就叫佢估,我諗你地兩個咁大個識做架啦,唔識就比下貼士,就係咁簡單。」明sir講完就番左去幫教班細既做野

「十個成語只要估中五個並寫低係張紙仔上面就可以有一個印仔,集齊三個就可以換領小禮物一份。」我照住規則讀出黎





「一,二, 三,我地依到岩岩好三個攤位,佢地要玩齊哂先換到禮物,啲成語都幾簡單,岩哂小學生既程度。」阿彤講

「橫掂都未正式開始,不如我地出去行下囉。」我問阿彤

「好呀,睇下有咩特別野都好。」阿彤講

我地同明sir講左聲之後就出左去周圍行。

禮堂有足毽隊表演,生物室有水母既介紹,地下有家長教師會既食物攤檔,其他樓層都有唔同科目攤位,我地行過睇完見有唔少小學生就返左自己既崗位。





返到課室已經有十到十五個小學生到左係到玩緊其他遊戲。

我地亦都好快咁埋位,好快就有幾個小學生衝左埋黎,我地簡單講解完就派張紙仔比左右兩個小學生。

睇黎依家啲小學生既中文水平都相對高,大部份都除左小小錯字之外都快而準估中哂五個。

我同阿彤教佢地寫返正字之後,吸左個印仔佢地就去左玩另一個遊戲。

當負責帶領小學生參觀既同學見佢地玩得差唔多既時候就會集合佢地,帶佢地去其他課室到玩。

如是者我地就做一輪,休息一陣就做第二輪,做到放lunch既時候。

明sir話今個午飯錢由學校所提供,所以只要出去食完再帶番張收據番黎就會比番錢我地。

我同阿彤無特登去食啲貴價野,一黎學校附近無,二黎唔係好肚餓。





所以我地兩個就去左以前成日去食既果間餐廳到食lunch。

去到坐低以前負責落單既個位阿姐唔知無返定無做啦,周圍都見唔到佢。

落完單之後我就同阿彤傾下閒計。

「好耐無黎過啦,升左上中五之後基本上lunch都係學校食,好少出黎食。」我講

「係囉,學校啲食雖然唔太好食,但最重要係平,加上食完飯又可以上課室休息下同溫下書,所以大家都好少出黎外面食午飯。」阿彤講

「真係好懷念以前中二既時候一齊出黎食飯既日子,可惜變既唔係間餐廳,而係我地.......」我講

「無計啦,我地被迫長大,有時啲野注定要變既你都阻止唔到。」阿彤唔係好開心咁講





我地食完lunch,阿彤話去買下小食同飲品等陣間空閒既時候可以食下飲下。

返到學校將啲單比左明sir,阿sir仲話我地可以買多啲野,反正全部錢都入學校數,我同阿彤都話無謂哂錢,明sir就笑笑口話下個星期比返啲錢我地。

距離下一班小學生參觀既時間仲有十五分鐘,阿彤就做住功課等,而我就扖左係張枱到訓陣覺。

第二輪我地由下晝一點半做到下晝五點半就收工放學。

我問阿彤去唔去行下街,佢話要返屋企溫下習同做埋剩低既功課。

我地兩個就咁各自番左屋企。

經過今日我諗番起自己升上中學既時候係幾咁怕羞同內向,依家已經變到一個識為未來打算既人。