當年我曾經追到一位女神,但我竟然飛左佢。: 第四十五節:反省

我臨訓前一直係到諗,其實中學係一個拆散好朋友既地方,培養左六年既感情,要係中六既時候分別。

一諗到依到我就覺得唔捨得,初中既時候恨不得快啲畢業,而到左高中就唔捨得畢業,我地大家就係咁犯賤。

擁有既時候我地唔識去珍惜,到就黎失去先後悔,可惜一切都太遲,時間唔等人,我地都要被迫長大。

到左第二日既時候,由於尋日已經派哂大部份主科既卷,今日我心情都比較放鬆。

第一,二堂係英文堂主要講返尋日未講完既野同派埋剩低既聆聽同寫作卷。





兩份卷既成績都係我預計之內,四成分數再多少少,我已經幾滿意。

放完第一個小息之後就係我比較期待既地理堂,唯一依科我既成績最為漂忽。

一入到課室見到大家都幾沉重下,無人講野只係好靜咁等安迪既來臨。

「死啦,如果我連地理都炒埋,今鋪都全炒啦。」阿結細細聲同我講

「鬼叫你成日顧住玩唔溫書咩,日日放學見你唔係打波就同朋友去網吧。」我講





「咁溫書之餘都要休息架,長期溫書會痴線架。」阿結懶有道理咁講

「但係我好似唔見你有溫過書喎。」我嘲諷番阿結

「懶得同你玩,我溫左你見唔到遮。」阿結講

安迪老師唔聲唔聲咁開左門入到黎,見佢面色都唔係幾好。

「今次全部地理既人都考得非常之差,我平時教既重點無人用到,答長問題既時候話左要答最少2頁紙,有人夠膽死答得1版紙。」





「老實講中四果班講態度同程度都高過你地,收到卷就反省下自己既錯,如果你地連考內試都考成咁,咁真正既DSE就全部人都2以下。」安迪好嬲咁講左兩句

「成日都攞我地同中四比,佢地岩岩教既野緊係易過我地依家中五啦。」阿結同我講

我示意阿結收聲就出左去攞卷,60分滿分我得20分。

阿結攞完卷返黎我睇一睇,佢得15分仲差過我。

當全部人攞哂卷之後,安迪就繼續講:

「今次份卷過30分既人得四個,仲要全部都係女同學,男同學你地究竟有無認真聽過書架?」

安迪講完無人敢出聲......

「一陣一邊對卷我會叫一邊叫人答番自己個條錯咩,講唔到重點錯咩既就罰企成堂反醒,我已經記低左最多人錯既題目。」





安迪講完就全部人都即刻打醒番精神,好用心咁睇番自己份卷錯咩。

結果臨落堂之前差唔多有八成男仔都比佢罰企,當然亦都包括我同阿結。

「本來今日幾好既心情都比安迪掃走哂。」返到自己課室我同阿彤講

「我地又唔可以怪哂安迪老師既,我頭先聽番佢講大家錯既地方都係一啲好容易既題目,好多時都係我地唔小心同溫得唔夠熟先錯。」

「其實我地成班都應該反省下究竟係唔係自己溫得唔夠入腦或者理解錯左條題目,安迪老師講既野其實好有道理,只不過佢用比較嚴肅既方式講出黎,令我地大家印象更加深刻,先至會去改善」阿彤好認真咁講

「咁又係既,我睇番自己份卷真係有好多小錯誤同根本唔應該錯既題目,睇黎我都要反省下。」我歎住氣講

「記住有咩唔明或者唔識就問我,唔好收收埋埋搞到自己成世都唔明呀。」阿彤講





「得啦,有妳依個全班第二我個心都安樂哂。」我講

通識堂派卷既時候,由於我地需要分開兩班上,而我果半班因為考得唔錯,所以lunch既時候教通識既黃sir請我地一人一罐汽水。

放學既時候因為阿彤要去補習社補習我就自己一個人返屋企。

基本上要派既卷都派哂,要改進同埋需要更加努力既科目都知道,所以剩低既日子我要更加努力先得,唔可以成日煩住阿彤。