當年我曾經追到一位女神,但我竟然飛左佢。: 第三十九節：報名

過左一個星期之後，我地班收到班際足球既報名表，但由於人數上限連埋後備只有八人可報名。

而文老師亦拜託阿結幫忙簡人選進行比賽：

「由於人數限制關係，我地只可以派八位同學出賽，而想出賽既同學有十一位，多出左三位，為左公平起見，我地不如抽籤決定由邊八位同學出賽啦。」阿結好有領導風範咁講

在場十一位同學包括我都點頭示好，我地叫阿婷幫手將我地啲名寫落張紙再撕出黎，放落一個盒裏面進行抽籤。

為左公平起見，我地搵左文老師負責抽籤。





文老師順序讀出抽到同學既名：

「阿結，阿浩，阿蔥，阿河，阿靖，阿鈞，阿源，最後一位係........」

我好希望可以抽中我，話唔定依年係最後一場既班足比賽。

「最後一位幸運兒係夏至東，抽唔中既三位同學唔洗失望，我地可以係場邊幫手打氣，啦啦隊都好重要架。」文老師講

阿結叫抽中嗰八個人過去佢張枱到集合：





「今年如無意外係我地中學生涯最後一次既班際足球比賽，希望大家盡力去踢，攞個第一位番黎。」阿結講

「但係我印象中C,D班既人好多踢波都好勁，我地好難會贏到。」阿靖講出左重點

「未試過又點知呢，更何況我地依隊人都唔差，唔踢得都撞得，唔洗擔心啦，就算攞唔到第一，大家有享受過比賽都好夠。」阿結鼓勵我地咁講

填好報名表之後，阿結係小息就落左教員室將份表交左比負責搞比賽既阿sir。

放學既時候阿彤同我一齊返屋企。





「係喎，你地幾時開始比賽，我要同補習班個邊請假先得。」阿彤問我

「大概下星期三掛，如無意外初中踢完星期一，二就到我地。」我答

「不如咁啦，如果無你地贏到第一我就送份禮物比你啦！」阿彤笑住講

「拿，妳講架，唔准反口架。」

講完再同阿彤say左byebye之後我地就各自返屋企。

希望今次比賽贏到第一啦，有啲期待阿彤份禮物。