當年我曾經追到一位女神,但我竟然飛左佢。: 二十五節:熟悉

星期六下晝阿靜約我係火車站等,我準時到左,而阿靜都係五分鐘之後出現。

「等左好耐呀?」阿靜問我

「唔係呀,我都係到左五分鐘左右。」我答番阿靜

「唔好意思呀,簡衫簡耐左所以遲左少少出門口。」阿靜答我

我留意阿靜既衣著,白色上衣,黑色短裙，同阿彤之前聖誕節既衣著色調岩岩相反。





「行囉我地,出到旺角先食野啦。」阿靜講完就拖住我行去入閘

到左旺角之後我帶阿靜去左之前我食過覺得唔錯既茶餐廳食野。

入到去坐低之後阿靜睇完餐牌就叫左伙計過黎落單,一豌餐蛋麵,一碟揚洲炒飯,兩杯凍檸茶。

「你又知我鐘意食餐蛋麵既?」我問阿靜

「上年見你係小食部食親都係餐蛋麵所以咪知囉。」阿靜答我





阿靜講完依句我又諗番起阿彤,佢兩個講既野都非常之似,同埋都係咁留意我。

食完午餐之後,阿靜就拖住我行左去朗豪坊,仲同我講今日你要跟實住我,我帶妳行街。

其實阿彤同阿靜某程度上都幾相似,之不過阿靜主動過阿彤,不過我記得中三既阿靜唔係咁,究竟佢發生左啲咩事呢?

穿過幾條街,我地就到左朗豪坊,阿靜話搭到最上層最慢慢行返落黎會好浪漫,我就跟住佢。

搭電梯上去既時候阿靜問我佢整啲朱古力好唔好食,我話好食同甜到漏,佢答番我好似依家既我同佢。





我搵唔到一個位可以到阿靜講清楚,嚴格啲黎講我係無勇氣，但諗落其實阿靜變左依家咁都唔錯，或者我應該放低阿彤。

上到最頂層,我地兩個拖住手傾住計慢慢行返落下,經過啲有興趣既店舖就入去睇下，其實講真真係好浪漫。

行到去一間賣帽既鋪頭阿靜就拉左我入去，阿靜每戴完一頂帽都問我好唔好睇,其中一頂我覺得非常岩阿靜。

正面望阿靜真係覺得佢好靚好清純,帶埋帽更加顯得有啲可愛。

出左間鋪頭之後我叫阿靜係下一層等我,我話想去廁所,實則係買頂我覺得唔錯既帽比阿靜。

見阿靜落左去之後我就快快手入去買左頂帽再落去搵阿靜。

落到去我見到阿靜企係一二邊玩緊手機，我就行埋去戴左頂帽落佢個頭到。

「送比妳架,我覺得好襯妳,當係尋日情人節既禮物。」我講





阿靜面都紅哂咁同我講多謝,之後拖實我繼續行。

我地行到去一間夾公仔既專門店阿靜話想試下夾我地就入左去。

每次個夾一落去阿靜就會捉到我好實,夾唔到就會好失望。

拿夾埋依次就走啦,講完我就入左錢落去,我知阿靜好鐘意蛋黃哥依隻公仔，我就認真咁夾。

個夾落去之後,竟然夾起左隻公仔,再好順利咁跌到落個窿到。

我踎低拎完隻公仔起身個時,阿靜突然攬住我話好勁呀你,搞到我有啲唔好意思。

行多幾層我地就再搭電梯離開朗豪坊,搭電梯個時阿靜企我後面我睇唔到佢做緊咩。





佢篤一篤我背脊,我另過去後面。

阿靜竟然踎低左少少主動同我kiss左，kiss左五秒左右佢係我耳邊講。

【夏至東我真係好鐘意你】,面對咁既情況我呆左係到,依種感受同我kiss阿彤既感覺好似，只不過角色調轉左,係阿靜主動嘴我。

行到去旺角地鐵站我都仲未抽離到岩岩個一刻,真係好sweet好浪漫。

「做咩行左咁耐都唔出聲?」阿靜問我

「阿靜我都好鐘意妳,但係......」發生左頭先既情況我真係唔敢講個真相出黎

「但係咩呀?」阿靜問我

「無野啦。」我笑住同阿靜講





依個時候地鐵到站,我就拖住阿靜入左車廂。


對住阿靜我真係講唔到出口,依家情況可以話愈黎愈壞,或者換個角度黎講係愈黎愈好。



【當一個男仔遇到比佢主動既女仔時候,男仔就會慢慢比個女仔吸引。】


注意!!!!!!!!!注意!!!!!!!!!!!!!!!!!

《小型投票,比咁多位讀者選擇男主最後追番阿彤定繼續同阿靜拍拖,可以係紙言/連登留低你地既意願,多個二十個人就簡多人個邊繼續故事！！！》