當年我曾經追到一位女神,但我竟然飛左佢。: 第二十節:回憶

到左聖誕節正日,我唔想留係屋企打機。

仲好記得兩年前既今日,我簡左套衫,梳個令頭得出左去。

而今年我淨係帶左送既阿靜頸巾同阿彤對手套,求其簡左套衫,頭都未梳就出左去。

母親問我係唔係又約左女朋友,我話唔係就行左。

而家時間尚早,我決定出旺角自己一個睇戲。





去左戲院我睇下有無電影岩心水，簡左套愛情片就買飛入場睇。

坐我前後左右既都係一對對情侶,搞到我有啲尷尬,難得聖誕節竟然要自己一個睇戲。

完左場之後,我諗番起個時就係覺得自己襯唔起阿彤而提出分手，到依一刻我都歷歷在目。

睇完已經夜晚七點半,我繼續自己一個去搵餐廳食野。

食完之後,我想去番曾經初吻既地方海旁散下心。





搭地鐵到左尖沙咀之後,我就慢慢咁行過去，沿路都有好多情侶拖住手拍住拖係我身邊經過，突然覺得自己好孤獨。

去到海旁我地初吻既位置,我望住個海諗番起我地之間既一幕幕。我好想解開個迷題,我好想同妳一齊望住依個海。

突然,有人係我後面拍一拍我背隻，我另過我以為係阿彤,點知原來係同我選修地理既阿幽。

「真係你呀阿東,我係同你選修地理既阿幽」阿幽身邊有個細細粒粒既女仔,睇黎佢係阿幽既女朋友。

「我記得你,你高高瘦瘦咁突出,同緊女朋友拍拖呀?」我問返佢





「係呀,都拍左好耐啦,之前自己跑步個陣時識,見佢細細粒幾得意就開始追佢，追左一個星期就追到佢。」阿幽自豪咁講

我見佢女朋友唔係好耐煩但講左幾句打發佢走,佢走左之後我又沉左番回憶裏面。

對住個海差唔多半個鐘,我開始覺得凍就起程返屋企,臨走前行過鐘樓,兩年前曾經有四個好朋友係到影過相留念,依家已經各行各路。

唔止阿彤,其實我都想我地四個可以返到以前咁,一齊開開心心咁過。

可惜時間唔等人,有啲野過左去就過左去,無得返轉頭。

有陣時回想返,都係一個唔錯又令人懷念既記憶