當年我曾經追到一位女神,但我竟然飛左佢。: 第十六節:轉接

放學之後我返到屋企

「做咩鬼咁早番黎又咁開心呀」母親問

「無呀,識左好多新朋友囉」隨便答完我就衝左入房

入左房放低書包,我就係張櫃桶拎番我地阿彤既相出黎。

依家望住既唔係傷心同悲哀,而係有種喜悅感。





我仲有無機會同番阿彤一齊呢?

【男仔就係咁犯賤,明明自己要分手先,到頭來又後悔】


第二日朝早班主任節,我好無奈咁比人推舉左做班長，所以要幫手收二十蚊既班會費

當我收到去阿彤個位,佢拎銀包出黎個時。

我無意中見到銀包裏面仲有我同佢張合照係到。





佢拎完錢就好快手咁收番埋個銀包。

《舊照片　遺留曾一起的笑臉　誰自信日後就算怎樣也不變》

阿彤妳究竟想我點做??


係依一個星期上中史堂既時候,阿彤仍然無同我講過任何一句野。





而地理堂就係hea住咁過,有時比安迪點名答問題,唔識就係成班面前鬧我。

係落堂既時候,阿蜆走過黎同我講阿權想約我食lunch,問我方唔方便。

唔會見我依排同阿彤坐又想打我呀?我心諗

「ok呀,咁你幫我約佢聽日係xx茶餐廳等啦」斷估阿權唔會當住咁多人面前打我掛

阿結聽到阿權話想約我食lunch就問我，

「你係唔係唔小心得罪左阿權呀,竟然約你單對單食飯。」

「除左阿彤既事之外,我諗都無啦,我都未問你,其實你點知我同阿彤之間既事架?」我反問番阿結

「你總會有機會知既,哈哈」阿結答完我就去到廁所





我地之前都好低調咁拍拖無咩人知,究竟邊個同阿結講既啦。


到左聽日既lunch,我照約定去左我食開既茶餐廳到等阿權。

點知我去到之後原來佢仲早過我到。

我坐低左之後,佢話已經落左單幫我叫埋野食。

「 如果無記得你應該食開餐蛋麵,係唔係?」阿權問我

「點解你會知,阿彤同你講既?」我問番佢

「佢同我講既野,唔止咁小」阿權嘆左口氣







【還要多久 我才能夠回到妳身邊?】