《打賭輸後要溝女神》: 【第十六章】星空下的告白
「邊個想同你單獨食飯～如果大家一齊食就得～！」阿Wing笑道。
「好主意呀～！一齊食咯？」刑百勝。
「勝勝話事～」范愛笑附和道。
江聰明、林泳兒也同意了。
「對唔住呀咁多位...今晚屋企有個親戚聚會，所以七點前要翻到屋企啦......所以我宜家大概要走喇...」陶海敏滿臉歉意地說。
「噢...咁藍辰呢？」范愛笑微笑問道。
「呃......我...我今晚有活動要做，所以我都唔去啦，唔好意思...」我說。
「可惜呀...」阿Wing說。
「唔緊要啦～今個禮拜五放假，可以再食一次飯㗎啫。」我笑道。
「咁好啦～」江聰明揮手向我們道別。
我們一同走出校門，天色已漸暗。
「你唔係行對面㗎咩？」陶海敏問。
「噢...我今日個活動係你屋企附近舉辦，所以我哋咪...咁啱同路咯...哈哈...」我摸摸後腦笑道。
「其實我想問你一個問題。」她突然一臉認真的說。
「呃...問咩？」我不禁有點兒緊張。
「就係...點解你個大話精咁鍾意呃我㗎！？」她捏了一把我的臉頰道。
「哈哈...仲以為你問咩。」我噗疵一笑道：「因為你太蠢，容易比人呃，冇辦法。」
「倒不如話你呢個人就係鍾意玩人！」她別過臉去，卻又停了下來。
她指著遠處的禮品店，滿臉愉悅地說：「哇！好多手繩！」
「乜你又鍾意手繩㗎咩～」我笑問。
她的臉容在夜色下更迷人。
「係啊！我以前都有戴...但係暑假嘅時候唔見咗...」她有點失落地說。
她在商品櫃前看著各式各樣的手繩，然後指著一條七色手繩，問道：「你覺得呢條手繩靚唔靚？」
女生這樣問的話，大概就是很喜歡這一條手繩了吧？
但我也不肯定，所以不敢自作主張說要買下去。
「靚呀，但配你就唔靚。」我笑道。
「哼！咁就算咯！翻屋企啦我。」她說畢就走。
「喂～唔好嬲啦～最多我唱歌仔比你聽？」我笑問。
「唔理你～我聽唔到你講咩～」她故意不看著我說。
「咁...」
「敏！」驀地，有把雄厚的聲音從遠方傳來。
「阿震！原來你仲係到呀？」陶海敏驚喜地說。
「等你嘛。」他單肩揹著背包，帥氣十足地說。
這是什麼神發展！？
「Hi，阿逸。」他向我招手。
「Hello…」我說。
「衰人，我同阿震翻屋企先啦～」陶海敏淺笑道。
「哎呀，你唔好誤會呀，我住阿敏對面嘅單位，屋企人都好熟，所以今晚一齊食飯咋。」阿震澄清道。
「呃...哈哈，唔會誤會呀...哈哈...你哋行先，我去睇少少嘢先。」我尷尬地笑道。
「Bye～」陶海敏向我道別。
不是跟親戚聚會嗎...難道他已經是你的家人了...
不…我到底在胡想什麼...藍辰逸幹嘛胡思亂想......
我拍拍自己臉頰好讓自己清醒一點，然後到了剛才的禮品店......
【第十六章】 星空下的告白
甫推開玻璃門，裡面是有著五花八門的精品：公仔、手工、袋子......應有則有。
「老闆娘～我想問......呢條手帶點賣？」我問。
她尷尬地笑著：「哥哥仔，呢條手繩係非賣品，冇辦法賣比你啦～」
「係呀......」我突然靈機一觸：「咁我可唔可以影張相？」
「可以～但就真係冇得比你啦～」她重申己見。
「冇問題，麻煩曬。」我拍完照片後邊離開禮品店。
回家過後已經是八時許，我背包也沒放下就走去問老媽：「媽...你平時手工咁犀利，不如......你教我點織呢條手繩呀？」
「睇下先...」她戴上老花眼鏡，靜視了三秒這張手繩圖。
「得係得，但你做咩無端端想去學整手繩？送比人？」她笑問。
「係呀。」我把手機收回褲帶道。
「送比咩人呀？女仔呀～？」她靠近一步開懷笑問。
「哎呀，媽...唔係女仔就係男仔㗎啦～唔好理咁多啦...」我摸摸後腦尷尬笑道。
「好～咁但係阿媽呢兩晚都唔得閒呀，等我禮拜三先教你啦！」她說。
「冇問題！」我舉出「OK」的手勢。
翌日放學，我跟陶海敏到了圖書館當值。
「阿逸～」她微笑道：「禮拜五有冇咩節目？」
「節目...？係喎，禮拜五學校有假啵。」我猛然想起。
「咁難得禮拜五放假...一係出去玩多次？」我提議道。
「我正想問你～」她淺笑：「咁我夜啲去問下女仔，男仔方面就靠你啦！」
「唔洗啦蠢人～我哋開個group就得啦！」我笑道。
「係喎…我竟然冇諗到添。」她抓抓頭髮後說。
那晚，我們順利的湊齊了八人軍團，只差一個目的地。
「難得禮拜五係假期，不如我哋搞個兩日一夜露營？夠刺激啦！」21：02 陳大威
最後我們八人也同意了這個兩日一夜露營的建議。
「但問題係去邊？」21:08 刑百勝
「去西貢灣仔營地？我上網search過，去嗰邊幾方便，而且有大草原同埋燒烤爐！」21：10 陳大威
「而且禮拜五月缺又天晴，如無意外會睇到星空！」21:12 陳大威
「如果真係想去睇星空，不如去蘿箕灣？」21:13 江聰明
「去蘿箕灣交通唔太方便，我建議...不如去浪茄灣，都可以睇星星～」21:15 阿Wing
接著阿Wing發了一張在浪茄灣拍到的星空照給我們之後，女生們立刻陷入瘋狂狀態說一定要去。
所以最後我們便決定了禮拜五會到浪茄灣進行兩日一夜的觀星露營團。
第二天的晚上，老媽終於有空教我弄那條七色手帶。
「唔容易整㗎，你認真啲睇呀。」老媽戴起老花眼鏡的時候整個模樣總是特別認真。
「好。」我點頭示好。
花了三十分鐘，幾經辛苦終於弄成了七色手帶，只是我看一下原圖的時候，才發現跟原本的相差是天淵之別。
「洗唔洗喔幫手呀？」老媽問。
「唔洗啦，我要靠自己。」我說。
「咁好啦，你慢慢搞。」她脫下老花眼鏡後轉身離開。
然後我又鑽研了這玩意好一段時間，終於弄了一個像樣的三色帶。
我瞥了一眼時鐘，時針已指向十一。
「好啦......聽晚再整過...」我看著手機裡的手帶圖滿足笑道。
倒頭大睡後醒來已是六時許——鬧鐘雀躍之時。
清晨的小鳥蠻有活力的歌唱著，我伸了個懶腰便準備梳洗一番。
放學後我們分成兩組去買明天露營的所需品。
范愛笑、刑百勝、陳大威和阿Wing負責去買篷帳、睡墊、營釘等的露營基本裝備。
江聰明、林泳兒、陶海敏赫我則負責去買一些食物、飲料和垃圾袋等等......
之所以又是男男女女的關係是因為阿Wing認為派男生去買食物會導致全部也是垃圾食物，吃肥女生，而派女生去買帳篷和睡墊等則是挖苦女生。
所以說，女生真的是最大的。
「我哋去邊到買？」陶海敏問道。
「一於去惠康啦，唔洗諗喇。」我笑道。
「講明先呀～笑笑吩咐落話唔比買太肥膩同熱氣嘅嘢食！」陶海敏說。
「車～我哋買自己食咪得咯～」江聰明擺出一副飢餓的模樣。
「我都食㗎～所以真係買嘅話都冇所謂，預埋我啦。」林泳兒拍拍江聰明的肩膊道。
「好！！」江聰明露出色瞇瞇的眼神說。
來到了惠康，我們先去買一些零食，看到薯片和蝦條我的肚子不禁咕嚕咕嚕的叫著。
「買幾多包？」江聰明眼光閃爍地說。
「至少五包先夠皮。」我笑道。
這時，陶海敏拍了一下我的手臂。
「阿逸～幫我拎拎上面個布甸啦！」她微微一笑道。
「哇！你去到露營都要食布甸！？」我愣然問道。
「點解唔得喎～快啲快啲！」她滿臉愉悅地說。
「好啦...」我無奈地踮起腳去拿上方的布甸。
怎料一個不小心，掃到了第二排的餅乾盒。
而那正加速墜向陶海敏！！！
我立馬抱緊陶海敏，手擺她頭上以擋住餅乾盒的衝擊。
「砰！」餅乾盒跌在地上發出巨響。
我跟陶海敏貼得極近，她那淡淡的髮香又在瀰漫著充滿曖昧的空氣中。
「你個布甸...」我把布甸放到她的手上。
「多謝...」她掃掃亂髮，臉兒浮起紅暈道。
「時間啱啱好～兩位演完愛情電影後我哋就已經買完啦～」江聰明笑容滿面的指著購物車裡的食物和飲料說。
「冇咩買嘅就去比錢啦～」林泳兒說。
「好。」我點頭。
查看手機的未接訊息，原來陳大威那邊也已經買好了所需東西。
付錢過後我負責拿一半的零食和飲料回家。
我跟陶海敏她們不同路，所以自己回家的時候我打開了手機軟件來聽音樂。
近來迷上東城衛的《天使的距離》，因為這首歌...就好像訴說著我跟她的故事。
// 那一天那一個瞬間 遇見了妳 世界忽然有了意義 //
只是開學日的那個轉角，讓我遇上了你；只是一場打賭，讓我靠近了你。
// 每一分每一秒被妳牽引 好想保護妳 卻又不敢靠近 //
你是萬人愛慕的天使，使我不敢輕舉妄動，怕失敗後就再也不能靠近你。
// 如果凡人愛上了天使的笑容 該怎麼擁有 //
迷茫了好一段時間，該怎麼突破這段距離......
// 是否妳願意 為我墜入凡塵 //
若你願意，那我會義無反顧的去抱擁你。
明天，就讓我來向你表達我的心意吧。
陶海敏。
回到家後，我放下背包便立刻進入工作狀態，務求儘速把那條還沒完成的七色手繩給弄好。
弄完又跟原圖對比，然後找出瑕疵後又再調整，我開始懷疑自己變成完美主義者了，竟然會對手繩的每一部分都觀察得那麼仔細入微。
終於，連同昨天我總共花了六個小時來弄這條七色手繩。
「呼，大功告成！」當我弄好後，不禁振臂高呼。
只是一瞥時鐘已是九時許，也忘記了爸媽今天不在家，唯有隨便的煮了個杯麵來吃。
但弄好七色手繩後，最大的問題來了——「點告白？」
以往我總以爲愛上一個人就那麼容易表達自己對她的心意，現在卻打臉了，原來這條問題我花了數百個小時也無法找出答案。
苦思兩個小時後卻苦無方法，我決定聯絡「基佬羣」來商議作戰策略......
「喂...兄弟們...其實呢...小弟我聽日...」我怎麼開始口吃了......
「聽日乜春呀？講嘢1999咁嘅？」陳大威皺眉問。
「我想同......敏...陶海敏...」
「哦！我知道啦！你想趁聽日去camp，等佢訓着嗰時去......唔！」江聰明奸笑一聲：「估唔到你啲咁變態嘅人...」
「唔係呀！」我無奈地說：「我係想同陶海敏表白......」
把這句話轟出來後，我終於放鬆多了。
「阿車~你諗唔到點講好，所以就嚟搵我哋，係咪呀？」陳大威大笑問：「係咁咋嘛，大把方法啦我。」
雖然從他口中說出來的可信性已經不是普通的低，但我還是傻傻的選擇傾聽這位好兄弟的建議。
「首先！第一個方法叫做——『猛男壁咚之錫埋落去戰術』。」他很認真的說着一句令人愣然的話。
「乜...乜嘢話？」我竟然蠢得再問一次。
「佢叫做『猛男壁咚之錫埋落去戰術』！！！」他重申：「呢個戰術就係要你做強勢方，趁住對方唔爲意嘅時候將佢推埋牆邊，然後就可以形成壁咚嘅畫面！！係呢個時候......係呢個時候......」
「冇錯！！」江聰明也開始說些無厘頭話：「係呢個時候，你就可以同佢Kissssssss啦！！」
「乜鬼戰術嚟......咁都work就死得啦。」我按住額頭，不禁搖頭嘆氣。
「唔啱用？如果唔啱用嘅話可以用『化身暖男之擁抱愛情戰術』！！」陳大威再一次的轟出一個莫名其妙的想法。
「係喇！你就要係呢兩日一夜入面不時陪伴佢、關心佢，有需要嘅時候就保護佢，擁抱佢！感受彼此嘅溫度、心跳、狂熱、激情、速度......」江聰明笑道。
「得喇得喇......我唔應該搵你哋兩個，唔好意思...」我伏在書桌上心力交瘁地說。
「好啦，如果你真係想表白嘅話，就趁夜深人靜嘅時候，搵個同佢獨處嘅機會，只要你夠真誠，人哋又對你有意思，咁你就冇失敗嘅機會啦！」陳大威說。
「你記得帶條七色帶添呀，佢係求婚戒指嚟！」江聰明淺笑道。
「如果冇事就早抖啦，聽日見啦仆街！」陳大威說後便掛掉，江聰明也隨即離開。
我深呼吸了一下，腦海裏難以抹去她的倩影。
就這樣，我經歷了因爲一個女孩而失眠的夜晚。
大清早，鳥兒在窗邊高聲歌唱，我望着窗外的曙光，立馬精神抖擻，迎接這全新的一日。
我們八人相約在旺角地鐵站，九點準時到，時針才指向八，我伸了個懶腰後便徐
徐地作個人梳洗。
把早已準備好的乾淨衣物和充電器等必需品後，我把那條弄了兩日兩夜的七色手帶放進一個小盒子裏，免得有什麼意外使我的告別之夢頓成南柯一夢。
穿上跑鞋、跟爸媽道別後便昂首闊步地離開家門。
我家離旺角地鐵站很近，加上我早出門的關係，我在約定時間九點前十分鐘就到了。
我放入耳機，閉目聽着Avril Lavigne《I will be》。
只是突然，有人從後掩住我的雙眼。
我的本能反應使我捉緊了這雙嫩滑的手。
我心中有了答案，但她怎麼會......如此靠近我？
「陶......」我回頭一看，我操！竟然是江聰明！！
「咩呀？你以爲我係陶海敏！？哈哈哈！！」他捧腹大笑，快要笑得斷氣而亡。
「點解你隻手咁鬼滑......」我無奈地問。
「哎呀，今日去camp，緊係要最佳狀態去啦！我做咗成晚保養啵，當然會比平時滑啦~！」他輕笑一聲。
「唉......冇眼睇。」
驀地，天籟之音從天而降：「阿逸，聰明！早晨呀！」
也不用回首一看，因爲這把甜美的聲音只歸她所有。
「你嚟啦。」我笑道。
「係呀，你要唔要朱古力？我啱啱買~」陶海敏笑着拿出一包麥提莎道。
「我就係鐘意你咁好人~」我嬉皮笑臉的說出心底話。
「口甜舌滑。」她搖頭甜笑道。
大概五分鐘後，大家也陸陸續續到齊了。
「咁行啦，去浪茄灣要好耐。」刑百勝笑道。
經歷了漫長的車程後，即使號稱「不倒鐵人」的陳大威也心裏悶悶的，更何況我這個普通人、甚至是陶海敏。
但當我來到了目的地的時候，什麼負面感覺都拋諸腦後了，因爲心中那股興奮和期待都無法壓抑了。
沿着路牌我們走了好幾條小徑後便到達了一望無際的沙灘，這個不愧被譽爲香港最漂亮的沙灘，也再次證明了在網上看多幾遍也不及親歷其境，美如畫的景象使我們八人也停了下來驚歎一翻，不拍照毋寧死。
更重要的是，這個沙灘乾淨得很，甚至連一件垃圾都沒有，海水清澈得很，波浪一個接一個，讓人目不暇給，加上秋風的輕拂，舒爽怡人，這一刻的感受直接烙在我心裏。
「阿Wing果然係與衆不同嘅女仔，竟然知道要嚟呢個咁靚嘅地方！」陳大威豎起拇指稱讚阿Wing。
「嘻，夜晚係到睇星仲靚。」她莞爾的說。
「如果可以同你睇就好啦~」陳大威笑道。
「點解唔得？嘻~」阿Wing咧嘴而笑，也有一種特別的魅力。
我瞥了一眼陶海敏，只見她正閉着眼，她不會是站着睡覺了吧？還是乘車後太不舒服？
我輕輕的碰了一下她的前額，只見她食指放嘴脣：「噓......靜心聽下呢一刻大自然嘅聲音。」
我皺了皺眉頭，後又跟着她一同閉上眼。
原來...當你用心去聆聽大自然的聲音，你會聽見動聽的旋律，你的心彷彿能在晴空萬里的天空上遠飛，思想無拘無束的飛揚......
我們習慣了都市的聲音、習慣了看見車水馬龍......卻不願意停下來...靜靜的欣賞一些最美好的事物，卻爲了有的沒的而汲汲營營，可笑更可悲。
我們到了營地後開始搭帳篷，原來我們不是第一羣來到這裏的露營者。
四個男生只有刑百勝一個會搭帳篷，倒不如說是八個人之中只得刑百勝和阿Wing是擅長的，因爲阿Wing好像是女童軍的關係。
不會搭帳篷能幹嘛？我選擇當一個永不放棄的男人，去跟刑百勝學習一下，習慣了模式後才發現原來過程也不是想象中的繁複。
「藍辰，我去幫下大威同阿Wing先，你可以去嗰邊幫手~」刑百勝說。
「好......」我去協助陶海敏和林泳兒去弄一些待會用來燒烤的食物。
「陶海敏......」我走到她的身旁輕聲說。
「唔？」她微笑問。
「你之前係禮物店話想買嗰條手帶...你買到未？」我問。
她撅了撅嘴：「冇啦...我之後去翻問老闆娘，原來已經唔賣...」
「喔...」我腦海裏立馬浮現千萬個如何告白的方法......
「啊~~」她突然拿着一粒巨型棉花糖可愛的笑着說。
我也張開口，像個正在等媽媽來餵食物的小孩。
「唔比你食~哈哈！」她把那粒棉花糖放進口裏。
「你...！」我決定彈一下她的額頭來懲罰這個淘氣女孩。
「你個衰...！」就在她準備連環發炮的時候......
「大家！整好啦！宜家可以四男四女咁擺翻啲嘢入去啦！」刑百勝呼道。
「好！」
「今晚你就知死...！」她小聲說道。
聽到之後，我不禁暗爽...
今晚你會做什麼特別的嗎？嘻。
我們把背包和一些帶過來的零食飲料什麼有的沒的放進帳篷內後便開始圍坐在圓圓的燒烤爐外，因爲空間有限的關係，我們分成四人一爐，我跟陶海敏、江聰明和林泳兒佔其中一個爐。
透爐過後，我們紛紛到了長桌上拿些食物串好。
「燒雞翼~！Yeah！」陶海敏露出天真爛漫的笑容說。
「你要唔要啲牛油金菇？」我問。
「嘿呀，我嚟啦！男仔去燒，我嚟整就得！」她笑容可掬地拍拍我的手臂。
「哦...」我傻笑道。
這個畫面......怎麼感覺有點像對夫妻。
我就坐在江聰明旁邊的石椅。
「喂......今晚我諗住用『螢火蟲戰術』嚟搏泳兒歡心！」江聰明喃喃地說。
「唔係掛......你以爲喱到可以捉到螢火蟲......？」我驚呆了一下後說。
「我買咗啲熒光棒......然後諗住擺入個袋到，放係泳兒手上，係咪好浪漫...？」他笑問。
「我建議你去check check個腦好啲...」我搖頭嘆氣道。
「你就check！你最好今晚唔好衰添呀。」他忍俊不禁地說：「衰咗我實笑足你成年！」
「仆街啦你。」我笑道。
唉......到底要說些什麼才夠動容？
我在腦海中出現過各式各樣的對白，但幾乎全部都在腦海內就被淘汰了，連跟這美好世界說過早的時間也沒有。
想得入神之時，卻嗅到一股微微的焦味。
媽的！原來是我的雞翅膀給燒焦了。
「你個傻仔做咗啲咩嚟呀！」陶海敏撇嘴說道。
「好啦，我再幫你燒過。」我摸摸後腦笑道。
「擺好鐵網，之後燒下墨魚扇貝都OK！」她眼前一亮的說。
「估唔到一講到食，即刻變得咁多諗法啵。」我笑着說。
「哼~你等等去搵啲嘢飲過嚟啦~」她宛然的笑道。
「好呀......」我笑了笑後說。
其實我已經醃好了一天的蜂蜜檸檬，幸好那很適合懶惰的我，只是簡單的幾個工序便能完成。
「有冇帶冰？」我拍了拍江聰明肩膊。
「兄弟叫到，梗係有啦！」他笑道，然後跟我一同回到帳篷裏。
「其實用嚟做咩？」他問。
「沖蜂蜜檸檬茶。」
「哇！又估唔到你咁好兄弟喎！」他喜出望外地說：「咁啱喉嚨唔好！」
「你成日講廢話梗係唔好啦！」我笑道：「我沖比陶海敏飲㗎。」
「唉，重色輕友。」他搖頭準備離開。
「咁沖完比佢飲仲有得沖比你飲既。」我說：「應該話係你個女神飲。」
「咁我咪搶你功勞去追佢？」他皺眉說道。
我噗呲一笑後說：「反正都係咁姐，你咪話係我哋兩個一齊整咯，係gay咗少少姐。」
「好巴打！」他熱淚盈眶地說。
我把蜂蜜檸檬倒盡杯子內然後加水和冰塊，陣陣的香味已經撲鼻而來。
「請你飲。」我把這杯誠意之作遞到她的面前。
「哇！好香呀！」她的臉上盪漾着溫暖的笑容問道：「蜂蜜檸檬水？你自己醃同沖㗎？」
「係....」
她怔了一下，然後開懷笑道：「你原來都會咁貼心嘅~！」
她喝了一口後豎起拇指說了好幾次好喝，還說要我日後每天都請她喝。
如果真的可以的話，那又何妨呢？
燒烤過後清理完垃圾已是三點多。
「有咩節目？」陳大威問。
「如果大家怕冇嘢做都唔洗怕！我帶咗好多卡game比大家！」江聰明從他的背包中拿出Deal、啤牌等等的卡牌遊戲來。
「哇...你都幾怕悶喎哈哈。」刑百勝笑道。
「好呀！我好鐘意玩鋤大弟！」陶海敏滿足地笑着。
「咁你一定成日輸，你咁鬼蠢。」我揶揄着她說。
「哼！咁咪鬥一場睇下！」她撇嘴道。
如是者，我、陶海敏、江聰明和林泳兒留下來玩鋤大弟了，其餘四人則到了小徑附近享受大自然的美好時光。
「講明先，我係人稱『銘基賭神』，鋤大弟百戰百勝。」我秀了兩手洗牌技術後說。
「睇下你個大話仔點輸比我！」陶海敏笑着說。
「嗱，就咁玩好似冇咩癮，不如我哋輸咗要懲罰？」江聰明提議道。
「咁都Ok喎，但係罰咩...？」林泳兒問道。
「其實呢一層我都有準備好！呢個就係懲罰卡！」江聰明從背包中取出一個鐵盒，裏面是數十張寫着懲罰的卡牌。
我欲去看看懲罰內容，卻被他請吃閉門羹。
「懲罰等等就會揭曉啦！我哋開波啦！」江聰明露出興奮不已的面容。
派好牌後，運氣女神向我微笑，是三隻「2」和三隻「A」，還附帶一首同花順——勝算在握。
「哇...聰明你派嘅牌特別爛！」林泳兒抱怨道：「從實招來！你係咪特登想我輸~？」
只見江聰明一臉愕然的說：「一係...我比啲靚牌你？雖然我最大係得紅心J......」
「哎呀，講笑咋，玩啦~」林泳兒輕拂江聰明的亂髮：「你成日咁容易比人玩點得~」
我睜大眼睛，還再三搓了搓，卻是難以相信剛才的畫面。
這就是傳說中的深發展嗎...？
江聰明臉紅耳赤、低着頭說：「嗯...唔...咁開始啦......」
不出所料，不消三輪，我只剩下一張「葵扇2」和「紅心8」在手。
正當我想出將兩張牌一同放下的時候，陶海敏突然捉住了我的手。
「冇得出咁快！」她露出淘氣的笑容。
「唔可以咁喎，蠢敏。」我還是第一次這樣叫她，好像有點親切。
「蠢你個頭！總之就唔比你咁快贏啦！」她把我手上的「紅心8」給放下，然後就繼續到自己出牌。
「好啦，比你哋出下先啦。」我得意地說道。
經過三四輪的消耗下，江聰明和林泳兒同樣剩下三張牌，而陶海敏則還有五張在手。
輪到我時，我高舉「葵扇2」，準備輕鬆的放下去，只是這時候，她又捉住我的手了。
「喂！比我出多兩張吖...兩張咋嘛！」陶海敏向我撒嬌道。
「咁都得？」我卻又心軟的說：「好啦好啦......」
下一輪，江聰明出了一雙Q後無人對應故此率先勝出，之後又到了我的「葵扇2」了...這一次一定要...！
「唔得呀~！比我出多一隻，你睇下呢隻咁孤單可憐嘅七仔......比我送佢走啦...」陶海敏捉緊我的手道。
「唉...」我還是敵不過她那苦苦的哀求：「好啦...」
「好耶！」她抿嘴而笑道。
原來她的手牌是三隻「7」！故此狡猾的她就這樣一次過把三張手牌放下，意料之外的是，林泳兒竟然有3隻「Jack」去接！！
媽呀！我竟淪為最後輸家！
「都話你係蠢材㗎啦～！比我呃咗咁多牌！」陶海敏樂不可支地說。
「你...！」還不是因為我喜歡你......
「輸咗啦～快啲接受懲罰啦你～！」她做了個鬼臉、吐吐舌頭後說道。
「願賭服輸。」我拿了一張鐵盒中的懲罰牌。
翻開背後，懲罰是：「如果係男嘅話，就要公主抱女仔，然後做三下深蹲；如果係女嘅話，就要去搵男仔講一句甜言蜜語。」
這是...這分明就是全部關於男女親密的懲罰牌呀！江聰明果然是聰明絕頂的人，想透過懲罰來親近林泳兒......
陶海敏沒有不情不願，很快便就定位讓我公主抱。
「吖......」抱起來的時候，她嚇得發出誘人叫聲，加上抱緊她時的近距離接觸......我不禁有了生理反應。
一下......
原來抱住一個人深蹲並不是易如反掌的事情。
「二......」我咬緊牙關。
「三...！」心中雖有不捨，但懲罰還是完了。
「你真係好鬼重呀蠢敏。」我笑道。
「咁你啱啱又唔去抱泳泳？」她嘟著嘴道。
「咁係因為......」我不可能說是因為江聰明喜歡她呀。
「因為咩呀？泳泳身材都好苗條啵～」陶海敏撥了撥頭髮後說。
「咁係因為呢，我怕你呢一世都冇第二個男人想抱你，所以我咪比個機會你感受下。」我笑著拍拍她的頭。
「先唔會！大把人鍾意我呀！」她雙手叉腰地說。
「咁如果有人同你表白嘅話呢？」
她想了想後，笑著說：「咁就要睇下對象係邊個啦，如果係你就一定拒絕～！」
也不知道是真或是假，但我心裡有種鬱悶的感覺，信心也受到了些微的動搖。
我們又玩了好幾輪的鋤大弟，到了最後一場，只剩下我跟陶海敏，我只剩下一張「紅心J」，而她則有六張牌。更重要的是，是我的回合。
我慢慢的擺出手中最後一張卡牌，然後說：「你輸咗喇～」
「我突然聽唔到你講咩～」她笑道。
「我讓你一場，今場要認輸啦～」我作勢要彈她的額頭：「如果唔係我彈你額頭㗎。」
「車...罰埋罰～」她滿臉輕鬆的在鐵盒中抽了一張懲罰牌。
我靠近她身旁一起查看懲罰內容。
「今晚要同一位異性單獨共賞星空。」
「呢個就係懲罰？好簡單姐～」陶海敏泛起一絲微笑道：「你會同我睇㗎嘛～」
「點解唔揀聰明？聰明都可以陪你睇！」我有樣學樣的去問她這類問題。
「咁...咁係因為聰明佢...想陪泳泳嘛...」她抓抓頭髮後說道。
「真係因為咁～？」原來問這類題目是這麼有趣的。
「係呀！大話鬼！」她拍了一下我的額頭後輕笑道。
把東西收拾好，待陳大威等人回來後已是五時許。
在這裡能一睹遠處的雲景，片片散雲陪襯著漸紅的天空，滿是高樓大廈的香港難以找到這樣的美景，還能靜下來好好欣賞。
有時候，我們需要的不是拿出手機去拍照紀錄美景，而是靜下心來，好好感受這一刻的感覺，這樣才是最真實、最深刻的回憶。
「我去set定個爐先。」陳大威說。
對，也是時候準備晚餐了。
阿Wing廚藝了得，所以這晚大多的食物都是由她來下廚的。
隨着時間悄悄的逝去，來浪茄灣的露營者越來越多了。
「阿逸，睇下地上嘅人影~」陶海敏突然拍拍我的手臂道。
「有咩特別？」我抓了抓頭髮後說。
「我哋係到拖緊手呀~」她嬌笑道。
我凝視着地上的影子，果真兩隻手是緊貼的。
但我心中更想的，不是牽着影子，而是挽着你的手......
「佢地係到準備緊嘢食，不如我地去嗰邊睇下日落啦~」陶海敏問道。
「你個懶豬想唔做嘢？」我笑道：「好啦，等我陪你。」
我們紮營的位置跟沙灘只有幾步路的距離，陶海敏挽着我的手臂到了海邊，一道道波浪不斷涌來，清澈的海水也被夕陽染上了一層紅暈。
太陽就在遠處的山上慢慢的下沉，白雲聚聚散散後變成了斑斕的紅霞，我們都靜靜的站着，欣賞着大自然的傑作。
「好暖心...」她把手擺在雙眼的斜上方，像是要抵抗太陽燦爛的照耀。
// 擋不住的太陽 不管我抵抗 灑在我胸口最暗的地方 //
這景象讓我突然想到炎亞綸的《擋不住的太陽》。
「逸！」江聰明突然呼叫我：「過過嚟！」
「咁我過去先。」我跟陶海敏笑道。
「乜事？」
「其實係咁嘅，我諗住等等整啲嘢食比泳兒，你覺得O唔OK？」他有點緊張的問。
「你煮嘢食！？」沒記錯...這應該就是他的第一次下廚吧.....
他不會是想把黑暗處女作送給林泳兒然後就這樣失敗告終吧......
「我苦練咗好耐，放心。」他雙手張十的擺在我眼前，原來已經有一半的手指是貼滿膠布。
看來他是真的爲此下過苦功的，那我又怎好意思說不。
「你最好煮好啲，話唔定你個泳兒女神會霖死呢。」我拍他的頭說。
「好！我一定會令佢覺得好幸福！」他握緊拳頭說。
隨着夕陽的落下，阿Wing等人也把晚餐準備好了。
「你哋兩個冇幫手，要罰錢！」范愛笑露出淘氣的笑容。
「好啦，大家食嘢！」衆人齊呼。
我們的晚餐是火腿牛柳通心粉、羅宋湯和啫喱。
「估唔到阿Wing煮嘢食真係咁犀利。」刑百勝笑道：「笑笑你學下嘢啦。」
「咩呀，你讚人唔讚我嘅！」范愛笑別過臉去。
「好啦，唔玩你，錫翻！」刑百勝牽着范愛笑的手大笑道。
「唉...冇心食。」我擺出一副無奈的眼神說。
「咪就係咯！點解食飯要放閃！」陶海敏皺眉說道。
范愛笑嫣然一笑道：「你同藍辰都成日拍拖仔啦~！」
「吓...」我頓時無言以對。
「邊有...食嘢啦！」陶海敏低着頭吃啫喱。
而范愛笑則向我打了個眼色，就像是說「你哋仲唔係拍緊拖？」的意思。
我摸摸後腦搖頭笑道，然後也開餐了。
「啊...好飽，正！露營都可以食得咁正！」江聰明撫摸着腹部滿足地笑着。
「阿Wing真係人靚又犀利！煮嘅嘢食真係頂呱呱！」陳大威豎起拇指笑道。
阿Wing眯着眼的一笑而過。
待大家都吃完了晚餐後，我們便開始收拾着餐具和垃圾。
「我呢到準備咗啲忌廉...不如我哋嚟鬥忍笑，輸咗嘅就......」江聰明提議道。
「喂玩得過啵~！」刑百勝笑道。
「咁一於玩呢個啦！」范愛笑拍手道。
如是者，我們果真來玩「忍笑」了。
江聰明會在手機中播放一些搞笑的影片，而我們八人之中誰先笑就會被其他人用忌廉圍攻。
「好...開始...」江聰明按下了播放的按鈕。
影片中是一條外國人在裝鬼臉...起初也沒什麼感覺，但突然影片中爆出一個尖叫聲！
「啊哈哈哈！！！」這笑聲！！！
「江聰明！！！」我們立馬把手中的一碟忌廉去拍打着他。
「唔好呀...唔好！！」他發出淒厲的哀叫聲，最後全身只有下體是沒有忌廉的。
「點解...」他抹去眼前的忌廉道。
「抵你死啦，鬼叫你笑點低。」陳大威拍了一下他的頭說。
「唔得！我要再玩過！」他說。
然後，我們又再播放另一條笑片。
這是黃子華的棟篤笑，不消十秒，結果又是江聰明爆笑，最後又一次被人圍攻，但這次他學聰明了，竟然還懂反擊，沿路上誰攻他，他就把忌廉拍回去。
結果我們就這樣大混戰了一會，紛紛累得坐在沙灘上。
「嗄...好攰...」江聰明氣喘如牛地說。
「鬼...鬼叫你係咁走......」陳大威臉紅耳赤的指着他說。
「仲要夠膽打翻轉頭！」我笑着說：「今晚你就知死！」
「I am not gay...」他搖頭說不，讓大家忍俊不禁。
之後我們各自也去了洗澡和換好乾淨衣服，回來已經是八點多。
陶海敏換上一件粉紅色的T恤和白色的短褲，有種活潑可愛的感覺。
「阿逸，行啦～」她拉了拉我的衣袖笑說。
「行去邊？」我不解地問。
「你唔記得啦咩？」她笑道：「我今日玩鋤大弟輸咗要去搵你睇星星嘛…」
「好似係喎......」
「你等等我！我係拎少少嘢。」我趕回去帳篷裡，從背包中取出七色手繩放進口袋裡。
同時候，我也拿出一張墊，好讓待會能躺著沙灘看星空。
離開帳篷後，她就已經在沙灘踱步。
「嘿～得啦。」我輕笑道。
我凝視著被星空倒映的海面，心中突然有種說不出的興奮。
我們就這樣躺在地墊上，仰望著滿天閃爍的星星和星斗。
作為都市人，觀星已是十分奢侈。
「真係好想時間永遠停係呢一刻，咁就唔洗怕星空會離我而去～」陶海敏莞爾一笑地說。
「咁啦！」我笑著說：「我哋等等一齊合埋眼，將前一秒嘅星空畫面save低係腦海入面，咁咪會永久保存到咯！」
她怔怔地看著我，然後說：「好！」
我們凝望著整片掛滿星星的夜空，然後一起閉上眼。
就在閉上眼的那一刻，我突然靈機一觸。
這…會是契機嗎？
我......
「陶海敏......可唔可以合埋眼多十秒？」我的心跳加速得可怕。
「做咩...？」她還是緊閉著雙眼。
「等等妳就知道...」說這句話的時候，我把已經在顫抖的手快快的放進口袋裡。
「你可以倒數啦。」我說。
「十…...」她皺起眉頭地開始數著，每一個數字，也打擊著我的心跳和情緒。
我望著眼前的七色手繩，心中是七顛八倒的話語。
「七…...」
怦怦......
怦怦......
我深深呼吸，然後靠近了點她。
「三…...」她忍俊不禁地說。
我把手繩擺在她的眼前。
「二…...」
我在心裡催眠自己要放鬆，但卻是要投降收場。
「一…...」
她徐徐的睜開眼睛，卻又立刻被眼前的七色手繩嚇得搓了好幾次眼睛。
「點解會有呢條手繩㗎你！？」她又驚又喜地說：「明明老闆娘話冇得賣......」
「我自己整㗎...整咗兩日兩夜......」我心亂如麻，快要壓抑不住心中的悸動。
「你......」她清澈單純的雙眼凝視著我。
我咽口水，摸摸後腦......但卻無法抗拒心中的緊張來襲。
「其實我......」
「其實我...咁大個仔都係第一次整手繩，仲要咁鬼複雜...」我傻笑道：「但因為你係我心中係好特別嘅存在...所以我好想將佢送比你......」
即使在藍幽幽的天空下，我也能清楚看見她臉頰緋紅的模樣。
「嗯......」她抬頭那刻，我止住了她。
「其實...你唔洗咁快答我，等你諗清楚先答我都未遲......」我說：「希望你會鍾意呢條手繩......」
說畢，我準備轉身就去。
「藍辰逸…...」她叫停了我。
我發誓，那是我人生中心跳得最快的一次。
「你得返一次呃我嘅機會咋～」她喜孜孜地說。
我心中一沉，原來我的真心告白，被她視為謊言。
也許是我平常一直嬉皮笑臉吧，讓她也不太認為我會認真說話；
也許是我平常一直騙她這蠢材吧，讓她不再會相信我說的真心話。
我也再沒勇氣再一次告白了......
「不過都好多謝你條手繩呀！我真係好鍾意！」她笑得燦爛。
我苦笑一聲，然後轉身離去，留下表情有點愣然的她。
回去營地，江聰明就在遠處坐在石椅上玩手機。
「難得嚟到仲玩手機？」我問。
「唉......啱啱原本同泳兒行緊沙灘嘅，突然有個人打比佢，然後佢就走翻去帳篷入面傾電話。」他神色低落地說：「而且嗰個打過嚟嘅仲要叫老公......唉...」
我拍拍他的後背，然後坐在了他對前的石椅。
「咁你呢，唔係去表白咩？」他問。
「衰咗。」
「衰咗！？連七色手繩都霖唔到佢？」他皺眉問道：「定係你唔知講咗咩咋？」
「佢以爲我呃佢。」我低頭嘆氣：「可能係我一直以嚟講太多次大話，搞到真心話都變大冒險。」
「唉，我去拎啤酒過嚟...」他垂頭喪氣地說。
遙望遠處的帳篷，陶海敏剛收拾好地墊然後往帳篷內去，阿Wing等人則在帳篷附近聚在一起。
待了一會，江聰明帶着半打藍妹啤酒過來，身旁還附帶一個陳大威。
「你唔係同緊阿Wing玩咩？啱啱仲係嗰到...」我愣然道。
「哎呀，咁我見到江聰明條傻仔拎住啲啤酒，就知道兄弟們有點不妙啦，既然兄弟唔Happy，咁我無理由唔過嚟嘅。」他笑道。
我苦笑一聲，慶幸在失落時候，身旁還有兩個兄弟。
結果我和江聰明把各自煩惱的來龍去脈都告訴了他。
「冇講咁多，飲完先算！」陳大威爲我們打開啤酒，然後自己先喝。
連灌下幾口酒，又單純的苦澀變成甘甜，但我的心情卻沒有任何起色。
原來有時候，當你付出了所有的時候，還是無法得到回報。
喝完一罐後身體已經有點承受不住，但我卻不受控制的再去喝一杯，我迷上了喝酒時忘記一切苦惱的感覺，即使酒醒過後可能會更讓人愁惱，但至少我想逃避這刻的痛苦。
也不知道喝了多少罐，只記得合上眼的最後一刻是由陳大威扶我進去帳篷的。
一覺醒來，猛烈的空虛感和頭痛來襲，我慢慢的起來，其餘的人還在睡覺，白霧外是一層微紅的雲霞，看來即將是破曉之時。
「鈴鈴鈴......」旁邊女生帳篷內響起鬧鐘聲。
我想一個人靜靜，所以走到沙灘去，聽着波浪拍打岩石的聲音和看着清澈十分的海水，心境有了一份特別的寧靜。
「咁早起身真係有日出睇咩......」身後突然有人說道。
我回首一看，是陶海敏和林泳兒等四個女生......
我們相視無言，她的臉上沒有昨晚的愉悅，而且還在迴避我的目光。
「藍辰！一齊嚟睇日出啦！」范愛笑突然笑着說。
「唔...唔喇，我想訓多陣...你哋睇啦。」言畢，我便轉身往營地去。
爲什麼愛上了一個人，心中會感到越來越寂寞......