《打賭輸後要溝女神》: 【第十二章】讓我可以暗戀你
經過一輪熱身後我們便開始自由時間，有的拿了籃球出去、有的偷偷去了廁所玩手機、有的坐在一邊有講有笑。
「嚟啦，就嚟呢到。」陳大威把我們帶到樓梯旁靠邊站。
「唔可以比人發現......」江聰明偷偷摸摸的拿出望遠鏡：「睇下泳兒BB係邊先...佢應該打緊排球...」
女生在球場外的空曠位置打着排球，這裏的角度剛好可以看到大部分的女生，包括江聰明的女神林泳兒。
正當我也舉起望遠鏡的時候...
「哇！！」江聰明突然靠前大叫，嚇得我魂飛魄散。
「你 On9 ？等等比人發現就仆街啦。」陳大威用力的拍了一下江聰明的頭蓋。
「唔係啊......啱先泳兒烏低身救波啊！！好撚正！」他興奮地說完後又繼續賊眉鼠眼地開始觀察周圍情況，真是不堪入目...
陳大威搭着我的肩膊道：「你都玩下啦，青春就係要瘋狂睇女！依家唔睇下女，他朝定會後悔。」
陳大威這個「9Up王」又再次爲「青春」寫下新的定義。
「唉...我知道如果我宜家唔睇，會比你哋吵到放學。」我沒好氣地說：「我睇啦......」
甫一擺好位置，眼前的第一個畫面立刻把我愣住了——
「哇！！」我立馬把這魔物從我珍貴的雙眼前離開，然後深呼吸，好讓自己能夠冷靜下來。
「你又做咩學江聰明咁鳩叫呀......」陳大威皺眉問道。
「我第一眼就望到隔離班個肥茜......」我喘着大氣道。
肥茜是全校公認的極品，臉上生滿暗瘡、肥碩無比，任憑是陳大威這樣見慣各種異性奇葩的專家也無法與其直視。她，就是如此可怕的存在。
「唔緊要...失敗乃成功之母。」陳大威抹了一把汗後道：「睇多次，話唔定有意外收穫呢。」
我對人的信任已經到了谷底，不過再試一下也無妨，但願目標會是個可人兒吧...
我徐徐地擺好望遠鏡，細眼一看，眼前...不，是望遠鏡後的畫面是陶海敏...
她正在跟范愛笑在聊天，也許是因爲手傷的關係吧，好像有點悶悶不樂的。
這樣偷窺她的一舉一動實在刺激，讓我的腎上腺素不斷飆高。
她把側額的頭髮撥到耳後，在遠距離狙擊的我也小鹿亂撞了。
「哇，你睇咩睇到咁入神呀......」陳大威奸笑道。
「冇呀......睇下啲女仔打排球姐。」我摸摸後腦笑道。
「喂喂！啱啱泳兒笑得好燦爛呀......」江聰明抓緊胸前的運動衣：「Oh...我已墮入愛河。」
「癡撚線。」陳大威搖頭道。
江聰明沒有理會，又繼續專注着用望遠鏡。
「喂...係時候轉地點啦...最遲要五分鐘轉一個...如果唔係比人發現就食得屎。」陳大威拍了幾下江聰明道。
「唔呀...呢個位睇得啱啱好...轉咗就錯過黃金機會啦...等等先轉啦...」他邊看邊色咪咪地笑道。
「等等死撚緊...」陳大威沒好氣地說。
「你哋係到做咩呀...？」我一轉身，竟是...陶海敏！
慘了，三個男人拿着望遠鏡往女生上課地點看去，這個怎麼解釋也說不通了......真是跳進黃河也洗不清了。
「你相唔相信星座？」陳大威托了一下眼鏡，我便知道他接下來又要「老吹」一波了。
「半信半疑呀~」陶海敏答道。
「咁啱嘅！？我哋都係半信半疑啊！」陳大威故作驚訝地說：「所以我哋用望遠鏡嚟睇星星反射落嚟地面嘅星座。」
「宜家唔係日頭咩...點會有...星星...」她的眼神中充滿疑惑。
「你就有所不知喇......其實日間嘅時候呢因爲太陽太燦爛嘅關係，所以會遮蓋咗星星嘅光芒，但係其實個星座依然會隱約被反射，呢個時候就要靠望遠鏡嚟睇啦！」陳大威露出自信的笑容說出一通廢話。
「真係！？哇！我都要睇！」這女孩還真的天真地相信了。
「我哋去個洗手間先。」陳大威拉着江聰明離開，就只剩下我跟陶海敏獨處在樓梯間。
她的臉上洋溢着好奇的樂容，像個天真無邪、對什麼新事物都很好奇的小孩般笑道：「阿逸，借個望遠鏡比我吖~我想睇星座呀......」
「哦...」我把望遠鏡遞給她，同時調了一下距離：「小心你嘅手傷呀。」
她露出燦爛的笑容，把望遠鏡擺到眼前，後又皺眉問：「好似有啲矇...教我點用吖~」
我禁不住要笑，因爲我的計劃成功了，嘿。
「連個望遠鏡都唔識用......」我搖搖頭笑道：「仲敢話我蠢。」
她不服氣地嘟嘴道：「車...我自己嚟。」
結果她弄了十秒後又放棄掙扎，勉強擠出笑容：「你咁好人又聰明...幫我吖...」
「你啱先連擺嘅位置都唔啱，你擺咁近冇咩效。」說畢，我微微的牽着她那柔細的手，再擺到適當的位置。
「之...之後呢~？」她的臉兒微紅，可愛地說。
「等我調翻好個距離...OK啦......」我輕碰她的雙肩，然後微調位置：「你睇下宜家清唔清楚？」
「哇！好清呀！我睇到笑笑係到打排球呀！哈哈！」她邊看邊大笑道：「仲可以睇到有人食波餅添！嘻！」
她樂在其中，甚至忘記了要看星座這件事。
突然，她轉過身來用望遠鏡看着我。
「哈哈，你做咩呀...」我笑道。
「我要睇下你今日食咗啲咩落肚......」她說。
正當我欲開口的時候，她用望遠鏡輕輕地敲了一下我的前額：「好好玩呀，多謝你！」
我接過望遠鏡後，又在她的前額敲了一下：「唔洗客氣！」
「喂呀！你個衰人做咩打我！？」她生氣的樣子還是這樣的讓人動容。
「我鐘意打咪打~話唔定打完之後你會變聰明呢？」我笑道。
她撅嘴道：「我唔理你啦，今日都唔洗旨意我理你~」
我喜歡她這樣的生氣，因爲我可以假裝是一個男朋友去哄她，儘管只是假裝，但我已心滿意足。
「好啦......唔好嬲啦~」我輕碰她的手臂道。
她別過臉道：「哼~」
這樣就好像一對小情侶在吵架，我心裏又因此暗爽。
「海敏姐姐，你咁好人又靚女又冰雪聰明，不如就大人有大量原諒我一次啦~！」我用手指輕輕地碰着她的肩膊，只是她仍不爲所動，只是搖搖頭。
「最多今日我請你食個雪米糍啦~！」我說。
終於，她回過頭來問：「係咪真㗎...唔好呃我呀...」
「梗係啦，我又點會呃你！」我豎起拇指笑道。
「咁...勾手指尾啦~」她伸出左手手指尾。
// 讓我可以暗戀你 讓我可以喜歡你 //
此刻，心跳彷彿停頓了般，我緩緩地伸出手指，只是那麼的身體接觸，雖然就是手碰手，但卻是世界上最值得讓我高興的事情。
// 讓我可以遠觀 繼續迷離 //
Mr.的《愛你》，在我的腦海中閃過——