寫一首情詩畀暗戀女仔，點知佢出返條謎題畀我.....【各大書局上架】: 第三章
「你做咩咁慘嘅樣？好似死老竇咁。」第二天，吃早餐的時候，阿明問我。
阿明、阿程、龍威和我，四個人在每朝早也會相約於BU的餐廳吃早餐，然後才上學。
你問我為什麼不在家裡吃，因為......和朋友吃飯是最好的調味劑嘛！
「我玩完啦。」我伏在桌面上說。
「你而家先知你人生玩完呀？」
「小藍以為係我將封信公開！你仲好講！」我一手掐住阿明的頸，想殺死他。
「喂，你冷靜啲先。其實係好事嚟架啵。」他拼命掙脫我的手。
「點會係好事，佢話唔係咁好呀！」
「都話宣說主權！全世界都會知小藍有追求者。」
「其實知佢有追求者咁又點？」龍威問。
阿明呆了一呆，望住我恍然大悟說：「又係喎！你都無乜威脅性。」
我有極強烈的殺人衝動！
「哼，咁我直接同佢講係你貼，等佢憎你囉。」我威脅阿明。
「佢態度有無好差先。」阿程問。
「咁又無。」
「你又唔洗太擔心，佢都係怕醜啫。」阿程又說：「不過你又解唔通佢個回覆係咩，In the long run都唔係辦法。」
「有咩方法啫，連我地最聰明嘅數學明都解唔通嘅數字，我又點會明。」我說。
「我睇唔明堆數字有咩邏輯關係。」阿明認輸。
「所以你要繼續搵方法去接近佢先得，如果唔係點培養感情。」阿程繼續說。
「即係點。」
「我知！我知！朋友！」龍威舉手說。
「無錯，要接近一個人，必先要接近佢朋友先。正所謂，近水樓臺先得月！」
「小藍嘅朋友......大佬花？」我驚訝地說。
大佬花，又命人間凶器。
生命值：15000/15000
戰鬥力：無法估計
武器：身體每一部分皆為凶器。
技能：東方は 赤く燃えている
每一個人聽到大佬花的名字，無不聞風喪膽，戰戰兢兢。
她比任何一個男士更具殺傷力，無一個男生能在「咬手瓜」中勝過大佬花。
傳聞在中三時，有一班同學欺負大佬花的朋友，下一個學期，他們全部人都選擇退學，理由是「身心受創」。
「呃......有無第二個方法，我唔想死呀。」
「你係咪想追人先。」阿程問。
「係！當然係！」
「咁你就唔好驚啦！同佢朋友熟，你就可以名正言順一齊出街。」
「你都啱嘅......」
「就咁話啦。」
唉，為什麼戀愛路上總是困難重重。
「攻略小藍的朋友－大佬花作戰開始！」
回到學校，惡霸成第一時間叫我：「喂，詩人！」
「多謝呀成哥。」
「唉，詩人幾時教我作詩呀。」
「唔好玩啦，我哩啲小兒科嚟。」
「你就唔好玩，連我地校花都敢公開追，邊個夠你大膽呀。」惡霸成用腋下挾著我的頭，低聲說：「你知唔知你係全校男生嘅公敵呀。」
「有無咁嚴重呀。」我連成功都算不上，已經是公敵？
「咁究竟小藍佢回啲咩畀你？」
「我都想知呀。」
我是真的不知道。
回到班房，我心裡一直回想著他們所說的話。
要跟大佬花打好關係，要跟大佬花打好關係......
大佬花就坐在小藍的後座，也就是我的前座。
老實說，平時傳簿時我也不敢拍她的背，我只會默默地放在她的桌面。
我深呼吸一口，然後拍一拍他／她的肩膀。
「做咩？」她轉頭，目無表情地說。
「Um……」我發覺我連呼吸也有點困難：「Um......」
「你UmUmUmUmUm夠未啫？」
「你你你睇唔睇到黑板？」
她轉頭望一望黑板，然後再望著我：「睇到，跟住呢？」
「無呀，我都睇到。」
「.......」
大佬花作戰 ROUND 1 失敗！
我嘆一口氣，龍威和阿程則在一旁不斷做動作，著意叫我開始PlanB.
對對對，PlanB.
我從袋中拿出西施狗糧，啊不，是波板糖。
我再次鼓起勇氣，拍拍大佬花的肩膀。
「啊花姐呀，放畀你呀。」
「畀波板糖我做咩？」
「無呀，想請你食之嘛。」
「喔！！！！！！！！！！！！！！！！！！！！阿奶溝完小藍而家溝大佬花！！」惡霸成忽然在班中大叫，聲音大得整個班房知道。
正在教書的Miss張當然非常不滿，皺眉望著我們。
「你地做咩呀？」
「阿奶琴日先表完白，今日又送波板糖畀人呀！」惡霸成舉手說。
「我.....我.....」我手中的波板糖懸在半空。
阿程、阿明和龍威他們三個馬上掩臉不看我。
媽呀，大難臨頭各自飛？簡直不是人。
「佢送畀我咁又點呀，關你咩事啫。」大佬花吼回惡霸成，眾目睽睽中收下我的波板糖。
此時，小藍轉頭過來望著我，大概兩秒後又回頭。
是我錯覺嗎，她好像扁嘴。
「我......咁唔關囉。」惡霸成無理可言。
「喂好啦，專心上堂。」Miss張再說。
課室再次回覆平靜。
可是，可是，我的形象.....
我已變成一個負心漢的形象！
最糟糕的是，大佬花一會真的以為我喜歡她，那怎麼辦？
大佬花作戰 ROUND 2 失敗！
「你地真係人渣嚟，無個幫我，點算呀，一陣大佬花以為我鍾意佢！嗚呀！」在午飯時，我在學校飯堂對他們發牢騷，差點哭出來。
「仲想點呀，以後行出行入都無人敢郁你。」阿明說。
「點幫呀，拿屎上身喎。」龍威說。
「你估我直接去同大佬花講，我其實唔係鍾意佢，咁得唔得？」
「我估你出唔到門口。」龍威說。
「咁點呀，講又死，唔講又死。」
此時，小藍和大佬花經過飯堂，走過我們身邊時，大佬花對我打招呼，而小藍則沒有望過來。
不！！！！小藍難道真的以為我......
「嘩睇嚟你真係幾大鑊。」阿程說。
我拍檯站起身說：「我決定啦，死就死，為咗小藍，我一定要親口同大佬花講：『不！』」
「你諗住幾時講先。」阿明問。
「一定要親口講啦。」阿程建議。
好，再來一個「撥亂反正之我要對大佬花說不！放學大作戰！」
本來我想趁放學時，單獨跟大佬花講明一切。
但由於大佬花今日與小藍一同回家，我只好跟蹤在她們後面。
不過誰也知道，女生放學是不會立即回家，她們結果在商場左逛右逛，又食下午茶，又影貼紙相，然後還在公園打韆鞦。
日落西山，等到大佬花將小藍送上巴士後，我終於有機會，便趁機衝出來找大佬花。
「大佬花。」
「嘩！」她嚇了一跳，然後問：「你點解係度嘅？」
「無呀，我.......我有啲野想同你講。」
「講啦。」
她站著我面前，我簡直覺得有強大的氣場在壓著我，原來......霸氣是真實存在的。
「呃，我想講，其實其實其實其實其實其實其實其實其實其實其實其實其實我唔係咁嘅意思。」
「點嘅意思？」
「即係，阿成佢講嘅意思，我係無架。」
她沉默一會，正當我等著被她一掌打我出新世界時，她卻笑起來。
「哈哈哈哈，我當然知道啦。」
「呃？」
「我當然知道你唔係鍾意我，你靠近我都係想知多啲小藍嘅野啫，係咪？」
呃，某程度上來說是對的。
「即係妳無信惡霸成講嘅野？」
「當然無啦。」
「嚇死我。」我拍一拍自己的胸口。
「我知道唔會有人鍾意我，咁惡嘅女仔，有邊個會欣賞。」大佬花雖然笑著說出來，但我還是感覺到她話中帶點點悲傷。
「所以肯同我做朋友已經好好架啦。」她又說。
大佬花......
我竟然有點點覺得想哭......
我對妳改觀了！對不起！
「妳一定會搵到一個識欣賞妳嘅人架！」我拍一拍她的肩膀。
「多謝你......我都睇得出你係一個真心嘅人。」
「呃，少少啦。」我有點不好意思地說。
「不過如果你對小藍唔好，我唔會放過你架！」她又露出她強而有力的臂彎。
「一定.....一定。」我想了想後說：「咁妳知唔知到底，小藍回應我嘅野係咩意思？」
「我當然唔知啦，我都無睇過封信。」
我把「1C0776將，20001106.3.背看」寫給她看，由於日思夜想，我已懂得背誦。
「唔明。」
「唉，唔該你。」又失望。
「不過，我可以同你講小藍嘅喜好。我相信對你有幫助嘅。」
「喔？」
「佢係一個好鍾意聽周杰倫嘅人。」
大佬花作戰，大成功！
鳥望著天，追逐著風。