✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 時光機篇 #24

#24



研究室突然熄燈，我連華小姐的臉都看不見。

「呀——」

黑暗中傳來她的尖叫聲。





「華小姐！咩事？」

我著急衝過去，一下子就撞上桌子。

正按住大腿站起來，就聽到她快哭出來的聲音︰

「我……我部電腦熄咗！頭、頭先啲changes……」







我呼了一口氣︰

「放心，我哋大server房安咗後備發電機，應該都係唔見咗幾分鐘嘅資料啫。」

「……真嘅？咁都好啲……」

「但真係奇怪，點解會突然間停電？我喺度咁多年都未試過……」

「啊！」





她又驚呼一聲，令我異常緊張︰

「咩、咩事？」

「我記起啦！頭先肥強提我，今晚9點半我哋呢個zone轉電力系統……佢仲叫我早啲走……我完全唔記得咗……」

「吓？乜佢唔同我講嘅？」

雖然肥強剛才叫過我們早點走，但我以為那只是客氣說話啊！



「佢話whatsapp group通知咗大家架……」

「頂……個group每日咁多link，資訊爆晒炸，點留意到呀……」





「……sorry囉！」

糟糕，我忘了分享最多新資訊的人就是她。

「呃，我唔係咁嘅意思……等、我開電話燈先……」

我想打開電話的燈照明，但對著新電話有點狼狽。



黑暗中傳來沙沙響聲，她似是有所動作︰

「啊！」





「冇事呀嘛？」

「我……我電話開唔著……一定係頭先做嘢唔記得叉電……」



我忍不住失笑。

這傢伙，就算長大了還是一樣的大頭蝦啊。

「笑咩喎？」

她嬌叱的聲音真可愛。

「冇嘢……我開到燈啦，我哋一齊走啦，停咗電留喺度都冇用。」





她點點頭，在我的電話燈光之下收拾好東西，然後跟在我身後踏出研究室。



.



走廊沒有窗，假如沒開燈的話根本連一點輪廓都看不見。

我回頭偷望一眼，只見華小姐悄悄地跟我拉近了一點距離，心裡暗暗一甜。

如果每天都來一次停電，那多好啊。







「我哋……係咪應該去嗰邊？」她突然拉一拉我的衣角。

「你想搭lift？但停電應該冇lift喎……」

「咁……我哋要點樣出返去？」

「走廊行到尾有條樓梯架。放心跟我行啦。」



我聽著她的腳步聲，偷偷把手向後伸。

她的外套邊緣依稀掃過我的手，我卻始終沒碰到她的手。

奇怪，應該向左一點嗎？還是向右？依她的方向計算……

嘗試了兩次之後，華小姐又叫住我︰

「flying far……你話樓梯，係咪呢度？」

回頭一看，她正站在太平門邊。

原來，我剛才已經走過龍。



「呃、係、係呀！燈光太暗睇唔到添哈哈哈……」

我把燈光照過去太平門，見到門上有推門就會響的保安裝置。雖然這實驗大樓很舊了，但畢竟有大量研究室，加裝了這種東西也很正常。

華小姐緊張起來︰

「咁……係咪即係唔開得？」

「唔，平時推就會響同通知保安部，但既然停電，應該冇問題嘅……」

說著，我一手推開太平門。



「Vee！Vee！Vee！Vee！Vee！——」

門應聲而開，沒想到，連警號也同聲響起，急速地叫過不停。

華小姐塞住自己耳朵，臉容扭曲地望向我。

這該死的門害我又在她面前丟臉一次！



「哈、冇、冇事嘅！咁、咁我哋始終要搵路走架嘛，唔通留喺度過夜咩……放心啦有人嚟嘅話我會解釋架啦！好，行啦！」

我照著後樓梯，一馬當先走在前面。

「等陣……可唔可以行慢啲？你個電話只照住前面，我睇唔到啲樓級……」

「哦，咁……咁你不如行我隔離呀？咁咪唔怕睇唔清囉？」

她想了一想，默默地走到我的身旁。

Yes！機會嚟啦飛雲——

我偷偷把手伸向她，卻發現她一直舉起雙手塞住耳朵，簡單是完美防備。



我該怎麼辦？如果突然搭她的肩膀，她又會覺得我乘機非禮嗎？

如果搭她的腰……不，這更容易令她反感吧……

正煩惱著，4層樓梯一下走完，我們已到達地面。

走廊盡頭的玻璃門，就是這種大樓的出口，一絲微弱的光從門外傳來。

再也沒有第二次這麼好的機會了！



我站在她身前，擋住她的去路︰

「華、華小姐！我……我想請你聽我講埋先！」

「係……講乜嘢？」

她警戒地退後半步，我隨即深深低下頭︰

「上次我講埋啲咁難聽嘅嘢，其實只係我……我……我一直以為自己已經好努力，但係可能……可能根本、根本仲遠遠唔夠……所以我好焦躁……但係，即使係咁，都唔應該亂講嘢……我……雖然我Whatsapp都講過一次，但係，我想親口同你講句對唔住！好對唔住！」



她微微側著頭，眼眸在漆黑中閃過一絲光芒︰

「嗯，我真係冇放喺心上……你都，唔好再放喺心上啦。我哋都係快啲出返去先。」

說著，她繞過我走過去推玻璃門。

我追在她身後說︰

「華小姐，你聽我講埋先，我同阿Mi真係冇嘢架。我哋唔係你諗嗰種……」

「其實，你唔需要同我解釋呀？我唔係好明……你哋係點樣又關我咩事？」

她絲毫沒有減慢腳步，仍跟上次一樣走得飛快。

我急步跟上去︰

「呃……因為你好似有啲誤會……」



她輕輕一笑︰

「我覺得你唔使咁在意其他人點諗呀？始終都係你哋兩個人嘅事，唔使同其他人交待啊。」

「咁、咁你頭先講乜嘢但係？」

「我幾時有講但係？」

「喺停電之前啊。我話我欠你嘅，你就話但係……」



說話間她已經走到玻璃門前︰

「哦……我意思係，我覺得你冇欠我咪得囉。你真係唔使咁在意喎。」

「我在意係因為……因為我仲鍾意你啊！」

「……」

她瞬間靜止，連推玻璃門的動作也停了下來。



我喜出望外，正想凝視她的臉繼續表白，卻注意到她的臉色異常陰沉。

「呃……我唔係想迫你，只係……」

「flying far……」

「係！」

「度門……鎖住咗……」

「……吓？」

.

by又曦
最新章節請到︰http://bit.ly/2VfUrlf
 
．作者FB︰http://bit.ly/2jHymHF
．作者IG︰http://bit.ly/2rxGoFA