✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: #35

 
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
．作者FB︰http://bit.ly/2jHymHF
．作者IG︰http://bit.ly/2rxGoFA
 
///////////




我們去一間西餐廳坐下，看看餐牌價錢不算便宜。
還好麥當當糧已出，我深深呼了一口氣，既來之則安之。

我們三人點了pizza和意粉分著吃，氣氛還算樂也融融。
Suki表面上沒有生我的氣，但我還是小心翼翼，不敢多言。
阿堅面對Suki不像跟華小姐相處那麼緊張，反而更顯得健談一點。
他問起Suki近況，Suki說，最近情況不好，兩人一問一答，氣氛很快就熱鬧起來。

阿堅︰


「點解呀，放假無去玩咩？」
Suki搖搖頭︰
「呢排邊有心情喎……網上畀人咁搞法，我連MSN都唔敢上囉。」

我忍不住插口︰
「網上？發生乜嘢事？」
Suki望了我一眼，滿臉委屈︰
「咪上次嗰個淫攝囉……佢上私影網周圍唱我呀。貼埋我啲相上forum，話我收錢唔做嘢衰過賊，仲話我……唉，唔想講啦，總之鬧得好難聽。」

「點可以由得呢啲人亂講架？你都要企出嚟講返清楚件事囉！唔係仲有其他女仔受害點算？」


「我有，但係，邊有用喎？佢連埋幾個合作開嘅model一唱三和，係咁踩我囉……唉，算啦，人多蝦人少，網上世界係咁架喎。」
看Suki一臉洩氣的樣子，我有點氣憤。當時我冒險幫她，竟然換來這樣的結果？
她居然這樣就想放棄？這還是我認識的Suki嗎？

我正想發作，阿堅好奇地問我們發生什麼事。
我跟他簡述了一次，他大為震驚︰
「哇，居然有啲咁嘅人……好彩你哋平安無事咋。」
Suki無奈地點頭︰
「係喎。我都唔諗咁多啦，唔想搞大件事。呢啲私影forum都唔多人睇嘅，最驚係畀學校啲人知道囉。傳到返學校，真係俾人笑到臉黃囉……」

.

我熱心地跟Suki討論這話題，完全沒注意到阿堅離座。
餐廳的音樂停了下來，幾秒後，生日歌響起。
我八卦地張望，竟然見到一個蛋糕插著蠟燭點著火，漸漸向我逼近。


在蛋糕上方，阿堅跟著餐廳播出的音樂，笑著唱出︰
「happy birthday to you! happy birthday to you! happy birthday to 阿翔!」
我驚訝地回頭，只見Suki也邊拍手，邊跟著唱和。

阿堅走到桌前，把蛋糕放在我的面前，跟Suki同聲說︰
「「阿翔，生日快樂！」」
是我生日嗎？
我目瞪口呆，看看阿堅、看看Suki、再看看那個插著「1」和「7」的蛋糕，一時間不能言語，只覺眼眶發熱︰
「……你……你哋……」
阿堅笑著截停我︰
「唔好講咁多，許願先！唔係啲蠟滴落嚟啦！」

我凝望搖晃的燭光，在燈紅的火焰裡，依稀見到某人搖擺的身影。
我連忙合上眼睛，在心中默唸︰
「希望我哋一直都咁friend，考埋AL都唔會變。希望華小姐……會得到佢自己嘅幸福，開開心心。」


然後，在阿堅和Suki的拍手聲中，輕輕把蠟燭吹熄。

今天，我已經十七歲了。距離成年，只差一步。

.

我們吃完飯，送Suki上的士之後，我跟阿堅兩個各自拿著一袋衣服漫步回家。
我心情超過好，便問︰
「喂，你同Suki今日……係夾埋架？」
「係啊！我約你買衫嗰時幾驚你會估到！點知你好似真係估唔到咁。」
「哈哈，唔係講笑，我真係估唔到。到生日歌響嗰下，我都唔記得今日係自己生日呀！」

阿堅笑得開懷︰
「你開心就好啦。上個月我本來計劃再約多啲人嘅，不過……呃……總之……最後我搵Suki嗰時，佢一口答應架。」
他還想約誰，我心裡有數。


如果沒有發生這麼多事，就會有阿堅、Suki跟華小姐一起慶祝我的十七歲生日嗎？

我想像著那個平行世界的光景，無奈地笑了起來︰
「都唔使咁多人啦……而家咁都好開心，多謝。」
「講呢啲。今日Suki幫我搞掂埋成個look，到時唔使做毒男，我都放心晒。」
「痴線，你鬼係毒男咩？」
「咁我的確係唔多識呢啲嘢嘛……哈……哈哈……」

阿堅說著，尷尷尬尬地乾笑起來。
一聽他的笑聲，我就覺得有古怪。

.

「做乜事？你有乜嘢想講？」
阿堅被我說中心事，搔搔頭︰


「唔……真係瞞唔到你……」
「廢話！我識得你就嚟十幾年喇！」

阿堅又再乾笑兩聲，邊觀察我的表情邊小心地說︰
「呃……其實就……謝師宴嗰日呢，想同你影張相……」
「哦，仲以為你想講乜。咁謝師宴一定會影相架啦！」
「唔、唔係呀……唔係我想同你影……」

阿堅望著我，堆起大大的笑臉︰
「我哋咪尖沙咀嘅酒店搞謝師宴嘅？唔知係咪嗰日好日呢？所以就……咁呢……」
「喂，你不如直講啦。」
他拍拍額頭，轄出去地說︰
「即係，同一日華同學咁啱就喺隔壁酒店搞謝師宴！佢話，難得大家都著得靚，好想三個人影張相！」

我差點以為自己聽錯︰
「吓？佢……佢仲想、想同我影相？唔係呀？佢想搵你咋？」
「唔係啊……我無講錯，你亦都無聽錯，係三個人！佢想三個人去影幅貼紙相留念，好似啱啱考完會考嗰次咁呢……佢話想留個念，留個美好回憶咁喎。我有同佢講過你未必想，不過……佢都係好想我問咗你先……咁囉。」

.

阿堅這麼一說，我就想起壓在抽屜深處那張貼紙相。
記憶中的那張相裡，她一左一右撟著我們兩人的手臂，舉起V字手勢，笑得燦爛彷彿從來沒有煩惱。
不管現在和將來大家變成怎樣，那個笑容都會永遠留在照片裡。
一想到她那個笑臉，我有點心軟了。

「都……都OK呀。反正大家酒店咁近，喺尖沙咀影張相啫，應該好快搞掂。」
阿堅喜出望外，連聲音都扯高︰
「真係？你真係得？」
我用力點頭︰
「係。都係影張相啫，我得。」
「咁就好啦，我終於完成任務！我今晚返去即時同佢講！」

看阿堅高興得手舞足蹈的樣子，我就覺得自己做對了選擇。
雖然我們三個人都在，但只是拍張照而已，應該不會出什麼意外吧？


 


/////

​
全系列現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
 
．作者FB︰http://bit.ly/2jHymHF
．作者IG︰[url=http://bit.ly/2rxGoFA%5b/url]http://bit.ly/2rxGoFA[/url]